អន្តរជាតិ
ស្វែងយល់ពីសម័យប្រជុំពេញអង្គសភាប្រជាជនចិនដែលនឹងចាប់ផ្តើមនៅដើមខែមីនា
×![]()
ដោយ: តន ចាន់រិទ្ធារ៉ា
សភាទាំងពីររបស់ប្រទេសចិន នឹងបើកសម័យប្រជុំចាំឆ្នាំរបស់ខ្លួននៅដើមខែមីនាខាងមុខ ដើម្បីអនុម័តច្បាប់ថ្មី ត្រួតពិនិត្យរបាយការណ៍ប្រចាំឆ្នាំរបស់រដ្ឋាភិបាល និងអ្វីដែលសំខាន់នោះ គឺជ្រើសរើសតាំងក្បាលម៉ាស៊ីនដឹកនាំរដ្ឋថ្មី។ ក្នុងកិច្ចប្រជុំឆ្នាំ២០១៨ សមាសភាពដឹកនាំរដ្ឋជាច្រើន នឹងត្រូវផ្លាស់ប្ដូរ ព្រោះមន្ត្រីខ្លះដល់អាយុចូលនិវត្តន៍។ លោក ស៊ី ជិនភីង នឹងបន្តតំណែងប្រធានាធិបតីរបស់ខ្លួន៥ឆ្នាំ ព្រមគ្នានឹងលោកនាយករដ្ឋមន្ត្រី លី ខឹឈាំង ដែរ។
សភាប្រជាជនចិន នឹងចាប់ផ្ដើមសម័យប្រជុំរបស់ខ្លួននៅថ្ងៃទី៥ ខែមីនា ឯសភាពិគ្រោះយោបល់ប្រជាជនចិន នឹងចាប់ផ្ដើមនៅថ្ងៃទី៣ ខែមីនា នៅឯមហាវិមានប្រជាជនក្នុងរដ្ឋធានីប៉េកាំង។ ប្រតិភូច្រើនជាង៦ពាន់នាក់នឹងចូលរួមក្នុងកិច្ចប្រជុំប្រចាំឆ្នាំទាំងពីរនេះ។ សម្រាប់ឆ្នាំ២០១៨ នេះ ការជួបជុំនយោបាយដ៏ធំនេះមានលក្ខណៈពិសេសជាងឆ្នាំមុនៗ ដោយនឹងមានការរុះរើតំណែងសំខាន់ក្នុងជួរថ្នាក់ដឹកនាំរដ្ឋ។
ក្នុងមហាសន្និបាតបក្សកុម្មុយនីស្តចិនលើកទី១៩ ខែតុលា ឆ្នាំ២០១៧ សមាជិកសំខាន់ៗក្នុងជួរបក្សកុម្មុយនីស្តចិនបានចូលនិវត្តន៍ពីតំណែង ជាពិសេសមាជិកការិយាល័យនយោបាយ និងគណៈកម្មាធិការអចិន្ត្រយ៍ការិយាល័យនយោបាយ ហើយជំនួសវិញដោយសមាជិកថ្មី។ សមាជិកចាស់ៗទាំងនោះក៏ត្រូវចូលនិវត្តន៍ពីតំណែងដឹកនាំប្រទេសដែរ។ សភាប្រជាជនចិនដែលមិនសូវមានអំណាច នឹងអនុម័តយល់ព្រមលើបេក្ខភាពថ្មីសម្រាប់ជំនួសកន្លែងដែលទំនេរ។
សមាជិក៥នាក់នៃគណៈកម្មាធិការអចិន្ត្រៃយ៍ការិយាល័យនយោបាយដ៏មានឥទ្ធិពលចំនួន៥នាក់ក្នុងចំណោម៧នាក់ ត្រូវចូលនិវត្តន៍ គឺប្រធានសភាលោក ចាង តេជាំង, ប្រធានសភាពិគ្រោះយោបល់លោក យូ ជឹងសឹង, លោក លីវ យុនសាន, លោក វ៉ាង ឈីសាន និងឧបនាយករដ្ឋមន្ត្រី ចាង កាវលី។ ដោយឡែកលោក ស៊ី ជិនភីង ដែលជាលេខាបក្ស នឹងបន្តតំណែងជាប្រធានាធិបតី៥ឆ្នាំទៀត ដូចគ្នានឹងលោកនាយករដ្ឋមន្ត្រី លី ខឹឈាំង ។
មនុស្សជំនិតរបស់លោក ស៊ី ជិនភីង រំពឹងថា នឹងក្ដាប់តំណែងដឹកនាំប្រទេសដែលនៅទំនេរ។ សម្រាប់តំណែងប្រធានសភាថ្មី ទំនងជាធ្លាក់លើលោក លី ចាន់ស៊ូ ហើយកៅអីប្រធានសភាពិគ្រោះយោបល់ អាចបានទៅលោក វ៉ាង យ៉ាង ដែលជាឧបនាយករដ្ឋមន្ត្រីបច្ចុប្បន្ន។ លោក វ៉ាង ហ៊ូនីង ទំនងជាទទួលបន្ទុកកិច្ចការផ្សព្វផ្សាយនយោបាយរបស់បក្ស និងគ្រប់គ្រងប្រព័ន្ធជុំវិញការងារថ្មី។ លោក ហាន ចឹង អាចកាន់តំណែងឧបនាយករដ្ឋមន្ត្រីជំនួសលោក វ៉ាង យ៉ាង ក្នុងករណីលោក វ៉ាង កាន់តំណែងថ្មីជាប្រធានសភាពិគ្រោះយោបល់។ អ្នកទាំងបួនគឺជាសមាជិកថ្មីនៃគណៈអចិន្ត្រយ៍បក្ស។
ក្រៅពីនោះ តំណែងដឹកនាំរដ្ឋ និងរដ្ឋមន្ត្រីក្នុងរដ្ឋាភិបាលជាច្រើនទៀតក៏ត្រូវផ្លាស់ប្ដូរដែរ ហើយសមាជិកភាគច្រើនមកពីការិយាល័យនយោបាយដែលមានសមាជិក២៥នាក់។ លោក ស៊ី ជិនភីង បានដាក់មនុស្សស្និទ្ធខ្លួនក្នុងតំណែងធំៗជាច្រើននតួយ៉ាងលោក លីវ ហឹ (Liu He) ជាទីប្រឹក្សាសេដ្ឋកិច្ច អាចកាន់តំណែងឧបនាយករដ្ឋមន្ត្រីទទួលបន្ទុកសេដ្ឋកិច្ចផង៕
Tag:
ចិន
ស៊ី ជិនភីង
© រក្សាសិទ្ធិដោយ thmeythmey.com
