មកស្គាល់សមាសភាពថ្នាក់ដឹកនាំថ្មីរបស់បក្សកុម្មុយនីស្តចិន

អន្តរជាតិ

មកស្គាល់សមាសភាពថ្នាក់ដឹកនាំថ្មីរបស់បក្សកុម្មុយនីស្តចិន

27, Oct 2017 , 7:39 pm

រូបភាព

ដោយ: តន ចាន់រិទ្ធារ៉ា

ប៉េកាំង៖ ថ្នាក់ដឹកនាំកំពូលរបស់បក្សកុម្មុយនីស្តចិនចំនួន៧រូប បានបង្ហាញខ្លួនចំពោះមុខអ្នកសារព័ត៌មាននៅថ្ងៃទី២៥ ខែតុលា បន្ទាប់ពីត្រូវបានគាំទ្រដោយគណៈកម្មាធិការមជ្ឈិមបក្សរួចមក។ ជាសមាជិកគណៈកម្មាធិការអចិន្ត្រៃយ៍នៃការិយាល័យនយោបាយដ៏មានឥទ្ធិពល បុគ្គលទាំង៧រូប គឺជាអ្នកសម្រេចជោគវាសនានៃប្រជាជនចិនទាំងជាង១,៣ពាន់លាននាក់សម្រាប់រយៈពេល៥ឆ្នាំខាងមុខនេះ។

១. ស៊ី ជិនភីង (Xi Jinping)
ជាអគ្គលេខាធិការគណៈកម្មាធិការមជ្ឈិមបក្សកុម្មុយនីស្តចិន និងជាប្រធានគណៈកម្មការយោធាមជ្ឈិម លោក ស៊ី ជិនភីង ក្លាយជាមេដឹកនាំចិនជំនាន់ថ្មីដែលមានអំណាចបំផុតចាប់តាំងពីសម័យលោក ម៉ៅ សេទុង និងបន្ទាប់មកលោក តេង ស៊ាវភីង ។ ឈ្មោះរបស់លោក ស៊ី ជិនភីង ទើបត្រូវបានមហាសន្និបាតបក្សលើកទី១៩ អនុម័តបញ្ចូលក្នុងរដ្ឋធម្មនុញ្ញរបស់ខ្លួន។ លោក ស៊ី ជិនភីង ក៏រំពឹថា បន្តតំណែងប្រធានាធិបតីដូចគ្នា។

២. លី ខឺឈាំង (Li Keqiang)
ជាមនុស្សលំដាប់ទី២ ក្នុងជួរបក្សកុម្មុយនីស្តចិនបន្ទាប់ពីលោក ស៊ី ជិនភីង ។ លោក លី ខឺឈាំង ក៏ត្រូវបានគណៈកម្មាធិការមជ្ឈិមបក្សគាំទ្រជាសមាជិកគណៈកម្មាធិការអចិន្ត្រៃយ៍នៃការិយាល័នយោបាយដែរ។ ក្នុងអាណត្តិទី១ ប្រជាប្រិយភាពរបស់លោក លី ខឺឈាំង មិនសូវលេចធ្លោដូចលោក ស៊ី ជិនភីង ឡើយ ហើយក៏មិនសូវមានឥទ្ធិពលខ្លាំងដែរ។ នៅអាណត្តិនេះ លោក លី ខឺឈាំង ទំនងជាបន្តអង្គុយកៅអីនាយករដ្ឋមន្ត្រីដដែល។

៣. លី ចាន់ស៊ូ (Li Zhanshu)
លោក លី ចាន់ស៊ូ ត្រូវបានចាត់ទុកជាដៃស្ដាំរបស់លោក ស៊ី ជិនភីង។ ជាអតីតលេខាបក្សខេត្តគុយចូវ នោង លោក លី គឺជាសមាជិកថ្មីនៃគណៈកម្មាធិការអចិន្ត្រៃយ៍ការិយាល័យនយោបាយ ហើយលោកបានធ្វើដំណើរអមលោក ស៊ី ក្នុងទស្សនកិច្ចនៅបរទេស។ លោក លី ត្រូវបានចាត់ទុកជាមនុស្សទី៣ នៃថ្នាក់ដឹកនាំទាំង៧ ហើយលោកទំនងក្លាយជាប្រធានសភាប្រជាជនចិន ជំនួសលោក ចាង តេជាំង ក្នុងការរុះរើថ្នាក់ដឹកនាំរដ្ឋនៅខែមីនាខាងមុខ។

៤. វ៉ាង យ៉ាង (Wang Yang)
មានវ័យ៦២ឆ្នាំ លោក វ៉ាង យ៉ាង ជាមនុស្សថ្មីនៃគណៈកម្មាធិការអចិន្ត្រៃយ៍ការិយាល័យនយោបាយ។ លោក វ៉ាង ជាឧបនាយករដ្ឋមន្ត្រីមួយក្នុងរដ្ឋាភិបាលលោក លី ខឺឈាំង ទទួលលបន្ទុកនយោបាយហិរញ្ញវត្ថុ និងសេដ្ឋកិច្ច ហើយជាមនុស្សមានគំនិតកែទម្រង់និយម គាំទ្រសេដ្ឋកិច្ចទីផ្សារ។ លោក វ៉ាង អាចបន្តកាន់តំណែងឧបនាយករដ្ឋមន្ត្រីទៀត ឬក៏ទៅធ្វើប្រធានសភាពិគ្រោះយោបល់ជំនួសលោក យូ ជឹងសឹង ដែលចាកចេញ។

៥. វ៉ាង ហ៊ូនីង (Wang Huning)
លោក វ៉ាង ហ៊ូនីង ត្រូវបានគេជឿថា ជាជំនួយការផ្នែកនយោបាយការបរទេសរបស់លោក ស៊ី ជិនភីង និងត្រូវបានហៅជា Kissinger របស់ចិនទៀតផង។ ជាអតីតសាស្ត្រាចារ្យសាកលវិទ្យាល័យក្នុងក្រុងសៀងហៃ លោក វ៉ាង គឺជាទីប្រឹក្សាមេដឹកនាំកំពូលចិន៣ជំនាន់ គឺជាចាប់ពីអតីតលេខាបក្ស ចាង ហ្សេមីន លោក ហ៊ូ ជិនតាវ រហូតដល់លោក ស៊ី ជិនភីង។ ចំពោះភារកិច្ចថ្មី លោក វ៉ាង ទំនងជាទទួលបន្ទុកកិច្ចការផ្សព្វផ្សាយនយោបាយរបស់បក្ស និងគ្រប់គ្រងប្រព័ន្ធដើម្បីធានាថា អ្វីៗស្ថិតលើផ្លូវដែលបក្សកំណត់។

៦. ចាវ ឡឺជី (Zhao Leji)
សមាជិកថ្មីមួយទៀតនៃគណៈកម្មាធិការអចិន្ត្រៃយ៍ គឺលោក ចាវ ឡឺជី ដែលជាប្រធាននាយកដ្ឋានរៀបចំនៃបក្សកុម្មុយនីស្តចិន ទទួលបន្ទុកត្រួតពិនិត្យសមត្ថភាពមន្ត្រីបក្ស។ ក្រៅពីតំណែងថ្នាក់ដឹកនាំកំពូល លោក ចាវ ដែលមានវ័យ៦០ឆ្នាំ ក៏កាន់តំណែងប្រធានគណៈកម្មការត្រួតពិនិត្យវិន័យ ជំនួសលោក វ៉ាង ជីសាន ដែលចូលនិវត្តន៍ និងបន្តដឹកនាំយុទ្ធនាការបោសសម្អាតអំពើពុករលួយ។ ជាសមាជិកវ័យក្មេងជាងគេក្នុងគណៈកម្មាធិការអចិន្ត្រៃយ៍លើកនេះ លោក ចាវ ទំនងជាបន្តស្ថិតក្នុងរង្វង់ថ្នាក់ដឹកនាំកំពូលរយៈពេល១០ឆ្នាំពេញ។

៧. ហាន ចឹង (Han Zheng)
មេដឹកនាំលំដាប់ទី៧ គឺលោក ហាន ចឹង លេខាបក្សក្រុងសៀងហៃ។ មានជំនាញខាងសេដ្ឋកិច្ច លោក ហាន បានរះត្រដែតនៅសៀងហៃតាំងពីឆ្នាំ២០០២ មក គឺជាចាប់តាំងពីតំណែងក្រុងសៀងហៃក្មេងជាងគេក្នុងឆ្នាំ២០០៣ រហូតដល់ក្លាយជាលេខាបក្សក្នុងឆ្នាំ២០១២ ។ ជុំវិញការងារថ្មី លោក ហាន អាចកាន់តំណែងឧបនាយករដ្ឋមន្ត្រីជំនួសលោក វ៉ាង យ៉ាង ក្នុងករណីលោក វ៉ាង ចាកចេញទៅកាន់តំណែងថ្មីជាប្រធានសភាពិគ្រោះយោបល់នោះ៕