ជាតិ
សម្តេចព្រះវររាជមាតា៖ ស្ត្រីជាសមាជិកដ៏មានតម្លៃសម្រាប់ការអភិវឌ្ឍន៍សេដ្ឋកិច្ចគ្រួសារ និងសង្គម សម្តេចព្រះវររាជមាតាជាតិខ្មែរ នរោត្តម មុនិនាថ សីហនុ។ រូបថត AFP
× នាឱកាសអបអរសាទរខួបលើកទី១០៧នៃទិវានារីអន្តរជាតិ ៨មីនា សម្តេចព្រះវររាជមាតាជាតិខ្មែរ ព្រះមហាក្សត្រី នរោត្តម មុនិនាថ សីហនុ បានចេញព្រះរាជសារអបអរសាទរ ដោយព្រះអង្គបានបង្ហាញពីព្រះរាជទ័យគាំទ្រលើប្រធានបទស្តីពី «ស្ត្រីរួមគ្នារក្សាសន្តិភាព ដើម្បីអភិវឌ្ឍន៍ជាតិ»។ យោងតាមព្រះរាជចំណារ ប្រធានបទនេះ បានធ្វើឲ្យនឹកឃើញឡើងវិញពីសម័យសង្គមរាស្ត្រនិយមដ៏រុងរឿង ក្រោមព្រះរាជបូជនីយកិច្ចដឹកនាំរបស់ព្រះមហាវីរក្សត្រ ព្រះវររាជបិតា ព្រះបរមរតនកោដ្ឋ។
តាមរយៈព្រះរាជសារ សម្តេចព្រះរាជមាតា បានកត់សម្គាល់ថា៖ «ស្ត្រីមានឱកាសសិក្សារៀនសូត្រ បង្កើនចំណេះដឹង និងជំនាញជ្រៅជ្រះ សម្រាប់យកទៅប្រកបការងារ និងមានមុខរបរបង្កើនប្រាក់ចំណូលសម្រាប់គ្រួសារ និងសេដ្ឋកិច្ចជាតិ»។
ក្រៅពីការកោតសរសើ ការខំប្រឹងប្រែងរបស់រដ្ឋាភិបាល សម្តេចព្រះរររាជមាតា បានកោតសរសើចំពោះការរួមចំណែករបស់សម្តេច ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក៏ដូចជាមន្ត្រីរាជការគ្រប់ក្រសួង ជាពិសេសក្រសួងកិច្ចការនារី ស្ថាប័នផ្នែកឯកជន និងដៃគូអភិវឌ្ឍន៍ ដែលរួមគ្នាលើកកម្ពស់សមភាពយេនឌ័រ ដើម្បីស្ត្រីបានទទួលកិច្ចការពារសិទ្ធិ និងផលប្រយោជន៍ ។
«ខ្ញុំសូមគាំទ្រការផ្តល់កាលានុវត្តភាពឲ្យស្ត្រីបានកសាង និងអភិវឌ្ឍន៍សមត្ថភាព ក៏ដូចជាបានរួមចំណែកក្នុងគ្រប់ការងារ គ្រប់វិស័យប្រកបដោយសមធម៌»។ នេះបើតាមព្រះរាជចំណាររបស់សម្តេចម៉ែ ដោយព្រះអង្គសង្ឃឹមថា នឹងមានកិច្ចប្រឹងប្រែងបន្តទៀត ក្នុងការលើកកម្ពស់តួនាទីស្ត្រីជាសមាជិកដ៏មានតម្លៃសម្រាប់អភិវឌ្ឍន៍សេដ្ឋកិច្ចគ្រួសារ និងសង្គម៕
Tag:
សម្តេចវររាជមាតា
សិទ្ធិនារី
IWD2018
© រក្សាសិទ្ធិដោយ thmeythmey.com