ជាតិ
សម្តេច ស ខេង ថា ការតែងតាំងមន្ត្រីសក្តិ១ ឲ្យឡើងជាអនុប្រធាននាយកដ្ឋាន គឺមិនខុសច្បាប់ឡើយ ស ខេង រដ្ឋមន្រ្តីក្រសួងមហាផ្ទៃ ថ្លែងក្នុងពិធីអបអរសាទរទិវាសិទ្ធិនារីអន្តរជាតិលើកទី១០៧។ រូបពីក្រសួងមហាផ្ទៃ
× លោក គិន សុលីតា ដែលមានឋានៈត្រឹមជាអនុសេនីយ៍ត្រី (សក្តិ១) ត្រូវបានតែងតាំងជាអនុប្រធាននាយកដ្ឋានគ្រប់គ្រងប្រព័ន្ធបច្ចេកវិទ្យានៃអគ្គនាយកដ្ឋានអត្តសញ្ញាណកម្ម ក្នុងក្រសួងមហាផ្ទៃ។ ការតែងតាំងលោក គិន សុលីតា ធ្វើឡើងតាមរយៈប្រកាស ដែលចុះហត្ថលេខាដោយសម្តេច ស ខេង រដ្ឋមន្ត្រីក្រសួងមហាផ្ទៃ តាំងពីចុងខែមករា ឆ្នាំ២0១៨ មកម្ល៉េះ។ ប៉ុន្តែប្រកាសនៃការតែងតាំងនេះ ទើបនឹងបែកធ្លាយ។
ការតែងតាំងលោក គិន សុលីតា ដែលពាក់ត្រឹមសក្តិ១ ឲ្យឡើងកាន់តំណែងរហូតដល់អនុប្រធាននាយកដ្ឋាន បានរងការរិះគន់យ៉ាងខ្លាំងពីសាធារណជនមួយចំនួន ជាពិសេសអ្នកប្រើប្រាស់បណ្តាញសង្គមហ្វេសប៊ុក។ យ៉ាងណាក៏ដោយ សម្តេច ស ខេង បានអះអាងថា ការតែងតាំងនេះ មិនមានអ្វីដែលខុសឆ្គងពីក្រឹត្យក្រមនៃច្បាប់ឡើយ។
រដ្ឋមន្ត្រីក្រសួងមហាផ្ទៃ បានបកស្រាយយ៉ាងដូច្នេះថា៖«បើថាមិនសូវទំនង ទើបសមបន្តិច។ តែវា មិនមានបញ្ហាអ្វីទេ ព្រោះជាករណីចាំបាច់។ មិនតែប៉ុណ្ណោះ វា អាស្រ័យទៅលើចំណេះដឹង និងជំនាញ ដែលគេអាចធ្វើបាន ទើបមានការស្នើសុំបែបនេះ។ ដូច្នេះ សូមអស់លោកមេត្តាជ្រាប និងកុំភាន់ច្រឡំទៀត»។
ការបកស្រាយរបស់សម្តេច ស ខេង ខាងលើ គឺធ្វើឡើងក្នុងពិធីអបអរសាទរទិវាសិទ្ធិនារីអន្តរជាតិលើកទី១០៧ ដែលរៀបចំឡើងនៅក្រសួងមហាផ្ទៃ។ ប្រសាសន៍របស់សម្តេច ស ខេង ត្រូវបានស្រង់យកទៅចុះផ្សាយក្នុងគេហទំព័របស់ក្រសួងមហាផ្ទៃ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានបំភ្លឺថា លោក គិន សុលីតា ត្រូវបានផ្តល់តែតំណែងជាអនុប្រធាននាយកដ្ឋានប៉ុណ្ណោះ។ អ្នកនាំពាក្យរូបនេះ បន្តថា ចំណែកសក្តិវិញ មិនត្រូវបានដំឡើងបន្ថែមជូនលោក គិន សុលីតា ឡើយ។ លោក ពន្យល់បែបនេះថា៖«គាត់ [លោក គិន សុលីតា] ពាក់សក្តិ១ នៅតែសក្តិ១ដដែលទេ។ គ្រាន់តែគាត់ ត្រូវបានតែងតាំងជាអនុប្រធាននាយកដ្ឋាន។ មិនមែនសក្តិ១ ធ្វើជាអនុប្រធាននាយកដ្ឋានមិនបានឯណា។ សំខាន់ គេមានជំនាញនិងចំណេះដឹងខ្ពស់ ហើយអាចធ្វើការងារហ្នឹងបាន»។
អ្នកដែលសរសេរលិខិតស្នើសុំឲ្យសម្តេច ស ខេង តែងតាំងលោក គិន សុលីតា គឺលោក ព្រំ សុខា រដ្ឋលេខាធិការក្រសួងមហាផ្ទៃ។ តាមរយៈលិខិតនោះ លោក ព្រំ សុខា បានលើកពីគុណសម្បត្តិរបស់លោក គិន សុលីតា ប្រាប់ទៅសម្តេច ស ខេង យ៉ាងដូច្នេះថា៖«ដោយសារសាមីខ្លួន ខិតខំបំពេញការងារ និងរៀនសូត្រទទួលបានសញ្ញាបត្រពីអាមេរិក និងដើម្បីលើកទឹកចិត្ត ខ្ញុំ សូមស្នើសុំការអនុញ្ញាតដ៏ខ្ពង់ខ្ពស់ ពីសម្តេចក្រឡាហោម [ស ខេង] តែងតាំងលោក គិន សុលីតា ជាអនុប្រធាននាយកដ្ឋានគ្រប់គ្រងបច្ចេកវិទ្យានៃអគ្គនាយកដ្ឋានអត្តសញ្ញាណកម្ម ដោយអនុគ្រោះ»។
បើតាមការចុះផ្សាយរបស់សារព័ត៌មាន Swift News លោក គិន សុលីតា ទើបនឹងចូលបម្រើការងារក្នុងក្រសួងមហាផ្ទៃ បានតែជាង១ឆ្នាំប៉ុណ្ណោះ៕
Tag:
ស ខេង
គិន សុលីតា
© រក្សាសិទ្ធិដោយ thmeythmey.com