ប្រមុខសិទ្ធិមនុស្សអង្គការសហប្រជាជាតិ ព្រួយបារម្ភពីស្ថានភាពសិទ្ធិមនុស្សប្រទេសតំបន់អាស៊ានប្រាំ

អន្តរជាតិ

ប្រមុខសិទ្ធិមនុស្សអង្គការសហប្រជាជាតិ ព្រួយបារម្ភពីស្ថានភាពសិទ្ធិមនុស្សប្រទេសតំបន់អាស៊ានប្រាំ

11, Mar 2018 , 9:19 pm

រូបភាព

ដោយ:

ឧត្តមស្នងការសិទ្ធិមនុស្សអង្គការសហប្រជាជាតិ Zeid Ra'ad Al Hussein នៅថ្ងៃ៧ មីនាកន្លងទៅ បានថ្លែងរាយការណ៍ទៅក្រុមប្រឹក្សាសិទ្ធិមនុស្សអំពីបច្ចុប្បន្នភាពនៃក្តីបារម្ភសិទ្ធិមនុស្សជារួម ។ តាមរយៈវេទិកានោះ លោកឧត្តមស្នងការ ក៏បានលើកយកបញ្ហាសិទ្ធិមនុស្សរបស់បណ្តាប្រទេសអាស៊ានមួយចំនួនដើម្បីសុំគោលការណ៍ពីក្រុមប្រឹក្សាសិទ្ធិមនុស្សសម្រាប់ចាត់វិធានការបន្ទាប់ផងដែរ ។

នាកិច្ចប្រជុំលើកទី៣៧ របស់ក្រុមប្រឹក្សាសិទ្ធិមនុស្ស ប្រមុខសិទ្ធិមនុស្សអង្គការសហប្រជាជាតិ បានលើកយកបញ្ហា ដែលជាក្តីបារម្ភសិទ្ធិមនុស្សរបស់ប្រទេសអាស៊ានចំនួន ៥ រួមមាន មីយ៉ាន់ម៉ា កម្ពុជា ហ្វីលីពីន ថៃ និង ឥណ្ឌូណេស៊ី ក្នុងចំណោមបញ្ហាសិទ្ធិមនុស្សជាច្រើនផ្សេងទៀត ដែលបានកើតឡើងទូទាំងពិភពលោកទៅកាន់អង្គប្រជុំដើម្បីពិចារណា និងរកដំណោះស្រាយបន្ទាប់ ។

សម្រាប់បញ្ហាសិទ្ធិមនុស្សរបស់មីយ៉ាន់ម៉ា ដែលលោកឧត្តមស្នងការ បានលើកឡើង គ្មានអ្វីក្រៅពី វិបត្តិជនភៀសខ្លួនរ៉ូហ៊ីងយ៉ានោះទេ ។ ប្រមុខសិទ្ធិមនុស្ស បានលើកឡើងថា ខណៈវិបត្តិជនភៀសខ្លួន នៅមិនទាន់រកដំណោះស្រាយបានផង បញ្ហាថ្មី បន្ថែមបានកើតឡើង ។ នោះគឺ រដ្ឋ Rakhine ទំនងជាលែងមានប្រជាជនជនម៉ូស្លីមរស់នៅទៀតហើយ ដែលនេះ ហាក់ដូចជាការរៀបចំការផែនការជាប្រព័ន្ធពីអាជ្ញាធរដើម្បីឲ្យប្រជាជនទាំងនោះចាកចេញ ។ លោក ចង់ឃើញពួកគេទទួលបានការទទួលស្គាល់ជាប្រជាជនស្របច្បាប់របស់មីយ៉ាន់ម៉ា ។

ដោយឡែកសម្រាប់ថៃវិញ លោកឧត្តមស្នងការ តាមរយៈរបាយការណ៍របស់មន្ត្រីជំនាញរបស់លោក នៅតែមើលមិនឃើញពីសេរីភាពនៃការបញ្ចេញមតិ ខណៈដែលរដ្ឋាភិបាលដឹកនាំដោយលោកឧត្តមសេនីយ៍ប្រាយុទ្ធ ចន្ទ អូចា តែងតែអះអាងពីការប្តេជ្ញាចិត្តក្នុងការផ្លាស់ប្តូរប្រទេសទៅជាប្រទេសថៃឲ្យទៅជាប្រទេសប្រជាធិបតេយ្យថ្មី ក្រោយនៃការដឹកនាំរដ្ឋប្រហារទម្លាក់អតីតនាយករដ្ឋមន្ត្រីត្រកូលស៊ីណាវ៉ាត់នៅឆ្នាំ២០១៤របស់លោក ។

នៅពេលនិយាយដល់ស្ថានភាពសិទ្ធិមនុស្សរបស់កម្ពុជា លោកឧត្តមស្នង បានថ្លែងយ៉ាងដូច្នេះថា៖«ខ្ញុំ បានកត់សម្គាល់ និងស្វាគមន៍ ចំពោះភាពល្អប្រសើរចុងក្រោយនៅក្នុងវិស័យនៃសន្តិសុខសង្គម និងប្រាក់ឈ្នួលអប្បរមា ក៏ប៉ុន្តែខ្ញុំ សូមទទូចឲ្យរដ្ឋាភិបាលធានាឲ្យបានសិទ្ធិនយោបាយរបស់ប្រជាជន ,គោរពសិទ្ធិសេរីភាពនៃការបញ្ចេញមតិ , ការប្រមូលផ្តុំដោយសន្តិវិធី និងដោះលែងសកម្មជនសិទ្ធិមនុស្ស និងតួអង្គនយោបាយ» ។

ប្រមុខសិទ្ធិមនុស្សរូបនេះ បានថ្លែងពីប្រទេសអាស៊ានទាំងប៉ុន្មាននេះហើយ ក៏បន្តលើកពីក្តីបារម្ភសិទ្ធិមនុស្សពាក់ព័ន្ធនឹងសង្គ្រាមគ្រឿងញៀនរបស់លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៃហ្វីលីពីន និងភាពផុយស្រួយ នៃសិទ្ធិជំនឿរបស់ជនជាតិភាគតិចនៅឥណ្ឌូណេស៊ី ៕