World Cup៖ ស្វែងយល់ពូល F រវាង អាល្លឺម៉ង់ ម៉ិកស៊ិក ស៊ុយអែត និងកូរ៉េខាងត្បូង

កីឡាអន្តរជាតិ

អន្តរជាតិ

World Cup៖ ស្វែងយល់ពូល F រវាង អាល្លឺម៉ង់ ម៉ិកស៊ិក ស៊ុយអែត និងកូរ៉េខាងត្បូង

17, Apr 2018 , 7:59 am

រូបភាព

ដោយ: ទេព ពិទូរ្យ

នៅក្នុងពូល F នៃការប្រកួតពានរង្វាន់ FIFA World Cup ឆ្នាំ២០១៨ នៅរុស្ស៊ី ដែលមានវត្តមានក្រុមការពារតំណែងជើងឯកអាល្លឺម៉ង់ នឹងផ្តល់ការប្រកួតគួរឲ្យចាប់អារម្មណ៍មួយចំនួន។ ម្ចាស់ជើងឯកពានរង្វាន់កីឡាបាល់ទាត់ពិភពលោក៤សម័យ ឈរនៅលេខរៀតទី១ក្នុងពូល ហើយក៏ជាក្រុមដែលសង្ឃឹមឡើងទៅវគ្គបន្តច្រើនជាក្រុម៣ទៀត រួមមាន ម៉ិកស៊ិក ស៊ុយអែត និងកូរ៉េខាងត្បូង។

ជំនួបសំខាន់សម្រាប់ពូល F ត្រូវបានគេចាត់ទុកលើការប្រកួតរវាងម៉ិកស៊ិក ទល់នឹងស៊ុយអែតនាថ្ងៃទី ១៧ ខែមិថុនា ឆ្នាំ២០១៨ នាកីឡដ្ឋាន Luzhniki ក្រុងមូស្គូ។ ក្នុងនាមម្ចាស់ការពារតំណែងជើងឯក World Cup ឆ្នាំ២០១៤ និងជាម្ចាស់ពានរង្វាន់ FIFA Confederations Cup ទៀតនោះ អាល្លឺម៉ង់ត្រូវបានគេរំពឹងទុកថានឹងឈរលើកំពូលតារាងនៃវគ្គសន្សំពិន្ទុពូល F នេះ។ ដូច្នេះ មានន័យថាការប្រកួតរវាងម៉ិកស៊ិក និងស៊ុយអែតអាចជាគូប្រជែងដ៏ស្វិតស្វាញជាងគេបំផុតក្នុងការដណ្តើមកៅអីចំណាត់ថ្នាក់លេខ២ ដើម្បីឈានទៅវគ្គ១៦ក្រុមចុងក្រោយ ខណៈកូរ៉េខាងត្បូងត្រូវបានគេគិតថាជាក្រុមខ្សោយជាគេ។

ប្រវត្តិខ្លះៗនៃការជួបគ្នារវាងក្រុមទាំង៤ ពូល F
- អាល្លឺម៉ង់ និងម៉ិកស៊ិកធ្លាប់ជួបគ្នាម្តងដែរក្នុងវគ្គពាក់កណ្តាលផ្តាច់ព្រ័ត្រនៃការប្រកួតពានរង្វាន់ FIFA Confederations Cup កាលពីខែមិថុនា ឆ្នាំ២០១៧។ កាលនោះ ក្រុមឥន្ទ្រីដែកបានទទួលជ័យជម្នះ ៤-១ ប៉ុន្តែកីឡាករ Marco Fabian របស់ម៉ិកស៊ិកជាអ្នកស៊ុតបញ្ចូលទីដ៏អស្ចារ្យបំផុតសម្រាប់ជំនួបនោះដែរ។

- ចំនួនការប្រកួតដែលមិននឹកស្មានដល់របស់កូរ៉េខាងត្បូង គឺធ្លាប់លេងទល់នឹងអាល្លឺម៉ង់៣ដង និងស៊ុយអែត៤លើក ហើយអ្វីដែលមិនគួរឲ្យជឿនោះគឺធ្លាប់ប៉ះម៉ិកស៊ិកចំនួន១២ដងឯណោះ។

- ស៊ុយអ៊ែតកំពុងប្រឈមនឹងក្រុមដែលមានកំណត់ត្រាឈានដល់វគ្គផ្តាច់ព្រ័ត្រ ៨លើកនៃការប្រកួតកីឡាបាល់ទាត់ពិភពលោក អាល្លឺម៉ង់។ ប៉ុន្តែអ្នកគាំទ្រកីឡាបាល់ទាត់ជាច្រើនប្រហែលជាមិនចាំទេថា ស៊ុយអ៊ែតក៏ជាអតីតក្រុមដែលអាចឈានទៅវគ្គផ្តាច់ព្រ័ត្រម្តងដែរ ដែលកាលនោះពួកគេចាញ់ម្ចាស់ផ្ទះប្រេស៊ីល ៥-២ កាលពីឆ្នាំ១៩៥៨ ក្នុងសម័យលោក Pele ។

១៦ ជាចំនួនគ្រាប់បាល់ស៊ុតបញ្ចូលទីក្នុងការប្រកួតរវាងស៊ុយអែតនិងអាល្លឺម៉ង់ក្នុងជំនួប២ប្រកួតប៉ុណ្ណោះ អំឡុងការប្រកួតជម្រុះ FIFA World Cup ឆ្នាំ ២០១៤។ ក្រុមទាំងពីរស៊ុតបញ្ចូលទីគ្នា ៤គ្រាប់ម្នាក់ក្នុងការប្រកួតកាលពីខែតុលា ឆ្នាំ២០១២ មុនមួយឆ្នាំដែលអាល្លឺម៉ង់យកឈ្នះស៊ុយអែតក្នុងលទ្ធផល ៥-៣៕