អន្តរជាតិ
លោក ស៊ី ជិនភីង៖ ចិនប្រឆាំងអន្តរាគមន៍យោធាដើម្បីដោះស្រាយវិបត្តិស៊ីរីដាច់ខាត
× ប្រធានាធិបតីចិន ស៊ី ជិនភីង នៅថ្ងៃទី១៩ ខែមេសា បានប្រកាសជំហររបស់ចិនប្រឆាំងអន្តរាគមន៍យោធានៅស៊ីរីជុំវិញការប្រើប្រាស់អាវុធគីមី ដែលក្រុមបស្ចិមប្រទេសចង្អុលដាក់ស៊ីរី។ លោក ស៊ី បានស្នើឲ្យប្រទេសទាំងអស់គោរពអធិបតេយ្យរបស់ស៊ីរី និងបើកការស៊ើបអង្កេតគ្រប់ជ្រុងជ្រោយដើម្បីស្វែងរកការពិតលើករណីវាយប្រហារអាវុធគីមីនៅទីក្រុងឌូម៉ា (Douma) កាលពីដើមមេសា។ ប្រធានាធិបតីចិនលើកឡើងបែបនេះក្នុងការជជែកតាមទូរសព្ទជាមួយមេដឹកនាំអង់គ្លេស និងតួកគី។
ប្រមុខដឹកនាំចិន ស៊ី ជិនភីង បានជជែកតាមទូរសព្ទជាមួយសមភាគីតួកគី តៃយីប អ៊ែរដូហ្កាន់ និងនាយករដ្ឋមន្ត្រីអង់គ្លេស ថេរ៉េសា ម៉េយ៍ នៅថ្ងៃទី១៩ ខែមេសា ។ ក្រៅពីទំនាក់ទំនងទ្វេភាគី លោក ស៊ី ជិនភីង ក៏លើកឡើងពីវិបត្តិស៊ីរី និងការប្រើប្រាស់កម្លាំងយោធាពីសំណាក់អាមេរិក អង់គ្លេស និងបារាំងដើម្បីឆ្លើយតបការប្រើប្រាស់អាវុធគីមីនៅទីក្រុងឌូម៉ា ។ លោក ស៊ី បានប្រាប់មេដឹកនាំប្រទេសទាំងពីរថា បញ្ហាត្រូវដោះស្រាយតាមច្បាប់អន្តរជាតិ។
យោងតាមទីភ្នាក់ងារព័ត៌មាន Xinhua លោក ស៊ី និយាយត្រង់ៗថា ចិនប្រឆាំងដាច់ខាតការប្រើប្រាស់យោធាក្នុងទំនាក់ទំនងអន្តរជាតិ ហើយវិបត្តិនៅស៊ីរីគួរដោះស្រាយឲ្យបានឆាប់តាមរយៈច្បាប់អន្តរជាតិដែលទទួលស្គាល់ដោយប្រទេសលើពិភពលោក។ ក្នុងការសន្ទនាតាមទូរសព្ទទាំងពីរនេះ ប្រធានាធិបតីចិន ក៏រំឭកពីសារសំខាន់ក្នុងការគោរពអធិបតេយ្យ និងបូរណភាពទឹកដីរបស់ប្រទេសទាំងអស់ បូករួមទាំងស៊ីរីផង។
ចំពោះសំណុំរឿងប្រើប្រាស់អាវុធគីមី ដែលអាមេរិក បារាំង និងអង់គ្លេសចោទរដ្ឋាភិបាលក្រុងដាម៉ាស់ លោក ស៊ី បានស្នើឲ្យមានស៊ើបអង្កេតដោយយុត្តិធម៌ គ្រប់ជ្រុងជ្រោយ និងមិនលំអៀង។ ជាមួយគ្នានេះ ចិនក៏ត្រៀមធ្វើការជាមួយភាគីពាក់ព័ន្ធដើម្បីស្វែងរកច្រកចេញនៃវិបត្តិរ៉ាំរ៉ៃរបស់ស៊ីរី និងចៀសវាងធ្វើឲ្យជម្លោះរីករាលដាលថែមទៀត។
តាមពិតទៅ ក្រុមស៊ើបអង្កេតរបស់អង្គការហាមឃាត់ការប្រើប្រាស់អាវុធគីមី (OPCW) បានទៅដល់ទឹកដីស៊ីរីហើយដើម្បីស្វែងរកការពិតលើករណីប្រើប្រាស់អាវុធគីមីនេះ ខណៈដែលរដ្ឋាភិបាលស៊ីរីប្រកាសក្ដែងៗថា នឹងជួយសម្រួលក្រុមស៊ើបអង្កេតមួយទំហឹងតែម្ដង។ ប៉ុន្តែដំណើរការស៊ើបអង្កេតមិនទាន់អាចចាប់ផ្ដើមបានឡើយ ដោយសារមានការវាយប្រហារលើក្រុមសន្តិសុខរបស់អង្គការសហប្រជាជាតិ។
ជំហររបស់ចិន គឺស្របគ្នានឹងជំហររបស់រុស្ស៊ី អ៊ីរ៉ង់ និងសម្ព័ន្ធមិត្តរដ្ឋាភិបាលស៊ីរីមួយចំនួនទៀត។ រុស្ស៊ីចាត់ទុកករណីវាយប្រហារដោយអាវុធគីមីលើជនស្លូតត្រង់ស៊ីរីជារឿងមិនពិត និងបានប្រតិបត្តិការរបស់មហាអំណាចបីប្រទេសជាការបំពានច្បាប់អន្តរជាតិ។ អាមេរិក អង់គ្លេស និងបារាំង បើកយុទ្ធនាការមួយកម្ទេចទីតាំងអភិវឌ្ឍអាវុធគីមីចំនួនបីរបស់ស៊ីរីជាមួយនឹងមីស៊ីលចំនួន១០៤គ្រាប់ ដើម្បីកម្ទេចសមត្ថភាពប្រើប្រាស់អាវុធគីមីនៃរដ្ឋាភិបាលក្រុងដាម៉ាស់៕
Tag:
ចិន
អង់គ្លេស
តួកគី
ស៊ី ជិនភីង
ថេរ៉េសា ម៉េយ៍
© រក្សាសិទ្ធិដោយ thmeythmey.com