សាលារចនា រៀបចំកម្មវិធីមួយសតវត្សរ៍បូកមួយបង្ហាញស្នាដៃនិស្សិត

ជាតិ

សិល្បះ

សាលារចនា រៀបចំកម្មវិធីមួយសតវត្សរ៍បូកមួយបង្ហាញស្នាដៃនិស្សិត

02, May 2018 , 7:59 am

រូបភាព

ដោយ: ប៉ូ សាគុន

និស្សិតនៃសាលាភូមិន្ទវិចិត្រសិល្បៈ ឬសាលារចនា កំពុងមមាញញឹករៀបចំកម្មវិធីមួយសតវត្សរ៍បូកមួយ ដែលមានការតាំងពិព័រណ៍ស្នាដៃនិស្សិត ដើម្បីផ្សព្វផ្សាយពីសិល្បៈ វប្បធម៌ជាតិខ្មែរ។ កម្មវិធីនេះ នឹងធ្វើនៅថ្ងៃទី៣ ដល់ទី៥ ខែឧសភានេះ។

កញ្ញា ក្រួច ច័ន្ទវត្តីស្រីវលក្ខណ៏ ប្រធានគណៈកម្មការនិស្សិត នៅសាកលវិទ្យាល័យភូមិន្ទវិចិត្រសិល្បៈ បានឱ្យដឹងថា កម្មវិធីមួយសតវត្សរ៍បូកមួយ ចូលរួមរៀបចំឡើង ដោយមហាវិទ្យាល័យចំនួនប្រាំ មានមហាវិទ្យាល័យនាដសាស្ត្រ, មហាវិទ្យាល័យបុរាណវិទ្យា, មហាវិទ្យាល័យសូនរូប, មហាវិទ្យាល័យស្ថាបត្យកម្ម, មហាវិទ្យាល័យតូរ្យតន្ត្រី និងថ្នាក់ឆ្នាំសិក្សាមូលដ្ឋាន។

តាមប្រធានគណៈកម្មការនិស្សិតដដែល ក្នុងកម្មវិធីកម្មវិធីមួយសតវត្សរ៍បូកមួយ នឹងមានការតាំងពិព័រណ៍បង្ហាញនូវស្នាដៃថ្មីៗ របស់មហាវិទ្យាល័យទាំង៥ ដែលមានដូចជា ចម្លាក់ គំនូរ គំរូប្លង់ផ្ទះ របាំ ល្ខោននិយាយ និងការសម្ដែងសិល្បៈទាំងបុរាណ និងសម័យជាដើម។ កញ្ញា ក្រួច ច័ន្ទវត្តីស្រីវលក្ខណ៏បញ្ជាក់ដូច្នេះ៖«កម្មវិធីនេះ យើងធ្វើឡើងមានគោលដៅផ្សព្វផ្សាយពីវប្បធម៌ជាតិខ្មែរ។ យើងមានគំរូស្នាដៃ និងស្នាដៃថ្មីៗជាច្រើន ដែលនិស្សិតនៅមហាវិទ្យាល័យទាំង៥ រួមទាំងថ្នាក់ឆ្នាំសិក្សាមូលដ្ឋានមកបង្ហាញ»។

បើតាម ច័ន្ទវត្តីស្រីវលក្ខណ៏ កាលពីឆ្នាំមុន ការរៀបចំកម្មវិធីបែបនេះ មានអ្នកចូលរួមខ្ទង់២ម៉ឺននាក់ ខណៈឆ្នាំនេះ នាងមិនរំពឹងថា នឹមានអ្នកចូលរួមប៉ុន្មាននៅឡើយ ព្រោះពេលវេលារៀបចំផ្សេងគ្នា។ វលក្ខណ៏ បញ្ជាក់បន្ថែម៖ «ឆ្នាំមុន រៀបចំមុនចូលឆ្នាំ ឥឡូវក្រោយវិញ។ យើងមិនអាចប៉ាន់ប្រមាណបានថានឹ ងមានអ្នកចូលរួមប៉ុន្មាននៅឡើយ ព្រោះយើងរៀបចំពេលខុសគ្នា។ តែខ្ញុំសង្ឃឹមថា នឹងមានអ្នកចូលរួមប្រហាក់ប្រហែលឆ្នាំមុន៕