អន្តរជាតិ
លោក គីម ជុងអ៊ុន លួចទៅជួបលោក ស៊ី ជិនភីង ម្ដងទៀតមុនជួបលោក ត្រាំ យន្តហោះដែលគេជឿថា ជារបស់លោក គីម ជុងអ៊ុន ចុះចតនៅព្រលានយន្តហោះ Dalian ប្រទេសចិន
× មេដឹកនាំកូរ៉េខាងជើង គីម ជុងអ៊ុន បានធ្វើទស្សនកិច្ចនៅទឹកដីចិនម្ដងទៀតនៅដើមសប្ដាហ៍នេះ និងជួបជាមួយប្រធានាធិបតីចិន ស៊ី ជិនភីង នៅទីក្រុង Dalian ខេត្ត Liaoning ផង។ សន្តិសុខត្រូវបានពង្រឹងយ៉ាងតឹងរ៉ឹងនៅព្រលានយន្តហោះ និងផ្ទះសំណាក់ភ្ញៀវរដ្ឋនៅក្នុងទីក្រុង Dalian។
ក្រសួងការបរទេសចិនបានប្រកាសថា លោក គីម ជុងអ៊ុន បានទៅជួបជាមួយលោក ស៊ី ជីនភីង កាលពីថ្ងៃចន្ទ និងថ្ងៃអង្គារនេះនៅទីក្រុង Dalian ខេត្ត Liaoning។ ទីភ្នាក់ងារព័ត៌មានកូរ៉េខាងជើង KCTV បានប្រកាសថា លោក គីម បានធ្វើដំណើរតាមយន្តហោះផ្ទាល់ខ្លួនទៅកាន់ក្រុង Dalian កាលពីថ្ងៃចន្ទ ហើយលោកត្រូវបានទទួលស្វាគមន៍ដោយមន្ត្រីជាន់ខ្ពស់ចិនច្រើននាក់ផង។
បើតាមការចុះផ្សាយរបស់ទីភ្នាក់ងារព័ត៌មានចិនស៊ីនហួរ ក្នុងជំនួបជាមួយលោក គីម លោក ស៊ី ជីនភីង បានកោតសរសើរលោកដែលជំរុញកិច្ចសន្ទនាកូរ៉េទាំងពីរ និងមានឆន្ទៈក្នុងការកាត់បន្ថយភាពតានតឹង ជាពិសេសការប្តេជ្ញាចិត្តរំសាយអាវុធនុយក្លេអ៊ែរនៅឧបទ្វិបកូរ៉េនោះ។ យ៉ាងណាក៏ដោយលោក គីម បានបញ្ជាក់់ឡើងវិញដែរថា លោកនឹងរំសាយអាវុធដរាបណាភាគីពាក់ព័ន្ធបញ្ចប់នយោបាយអរិភាព និងគំរាមកំហែងកូរ៉េខាងជើងទៀត។
មុនមានការប្រកាសជាផ្លូវការនេះដែរ វាមានការសង្ស័យដែរចំពោះជំនួបមេដឹកនាំកំពូលប្រទេសទាំងពិរនេះ ព្រោះផ្លូវក្នុងក្រុងត្រូវបានយាមកាមយ៉ាងតឹងរ៉ឹងបំផុតចាប់តាំងពីថ្ងៃទី៧ ខែឧសភាមក។ នៅឯព្រលានយន្តហោះអន្តរជាតិ Dalian សន្តិសុខក៏ត្រូវបានពង្រឹងដែរ។ ទូរទស្សន៍ជប៉ុន NHK បានផ្សាយថា ក្បួនរថយន្តពិសេសបានបើកឆ្លងកាត់វិថីនានាក្នុងទីក្រុង ដោយមានប៉ូលិសឈរយាមតាមផ្លូវទៀតផង។ គេក៏ឃើញយន្តហោះរបស់ក្រុមហ៊ុនកូរ៉េខាងជើង Air Koryo បានចុះចតនៅព្រលានយន្តហោះ Dalian ហើយបន្ទាប់មកគេក៏ឃើញយន្តហោះរបស់លោក គីម ចុះចតក្បែនោះដែរ។
ដោយសារតែគ្មានការហោះហើររវាងកូរ៉េខាងជើង និងទីក្រុង Dalian នោះ ទើបគេសន្និដ្ឋានថា មន្ត្រីជាន់ខ្ពស់នៃរបបដឹកនាំក្រុងព្យុងយ៉ាងអាចស្ថិតនៅទឹកដីចិនក្នុងទស្សនកិច្ចកម្រិតខ្ពស់ណាមួយ។ ទីភ្នាក់ងារព័ត៌មានកូរ៉េខាងត្បូង Yonhap ផ្សាយថា ការរៀបចំពិធីការ និងការពង្រឹងសន្តិសុខពីសំណាក់អាជ្ញាធរចិននៅ Dalian គឺមានគោលដៅទទួលភ្ញៀវពិសេសតែម្ដង ហើយលទ្ធភាពដែលលោក គីម ទៅកាន់ចិនពេលនេះ ក៏មានភាគរយខ្ពស់ដែរ។
តាមពិតទៅ វាគឺជាដំណើរទស្សនកិច្ចលើកទីពីររបស់មេដឹកនាំកូរ៉េខាងជើងរូបនេះទៅកាន់ទឹកដីចិន ដោយលើកទីមួយធ្វើឡើងនៅខែមីនា។ ជំនួបនេះអាចពាក់ព័ន្ធគម្រោងជំនួបរវាងលោក គីម និងប្រធានាធិបតីអាមេរិក ដូណាល់ ត្រាំ ស្ដីពីការលុបបំបាត់នុយក្លេអ៊ែរដែលអាចធ្វើនៅចុងខែនេះ ឬនៅខែមិថុនាខាងមុខ។ កាលបរិច្ឆេទ និងទីកន្លែងជួបគ្នានឹងត្រូវនៅពេលឆាប់ៗនេះ៕
Tag:
កូរ៉េខាងជើង
ចិន
គីម ជុងអ៊ុន
ស៊ី ជិនភីង
© រក្សាសិទ្ធិដោយ thmeythmey.com