អត្ថបទពាណិជ្ជកម្ម
អភិបាលខេត្តព្រះសីហនុ ផ្ដួចផ្ដើមគំនិតកែប្រែខេត្តខ្លួន ឲ្យក្លាយជាខេត្តដែលមានសុវត្ថិភាពម្ហូបអាហារ
× ព្រះសីហនុ៖ ឯកឧត្ដម យន្ត មីន អភិបាល នៃគណៈអភិបាលខេត្តព្រះសីហនុ បានផ្ដួចផ្ដើមគំនិត ធ្វើយ៉ាងណាឲ្យខេត្តរបស់ខ្លួន ក្លាយជាខេត្តមួយ ដែលមានសុវត្ថិភាពម្ហូបអាហារ ខណៈដែម្ហូបអាហារ ជាឬសគល់នៃបញ្ហាសុខភាព ដែលជាចំណុចសំខាន់បំផុត សម្រាប់គ្រប់ក្រុមគ្រួសារ។
ថ្មីៗនេះ ឯកឧត្ដមបានសរសេរលើទំព័រហ្វេសប៊ុករបស់ខ្លួនថា ខេត្តព្រះសីហនុ គឺជាខេត្តទេសចរណ៍ដែលមានការពាក់ព័ន្ធយ៉ាងស៊ីជម្រៅ លើវិស័យម្ហូបអាហារ។ ដើម្បីសម្រេចក្ដីប្រាថ្នាមួយនេះ ឯកឧត្ដមផ្ទាល់ មានផែនការជំរុញឲ្យគ្រប់អាហារដ្ឋានទាំងអស់ កែប្រែពីការប្រកួតប្រជែងគ្នា ដើម្បីតែរកប្រាក់ចំណេញ មកជាការប្រកួតប្រជែងគ្នា ក្នុងការផ្ដល់សេវាម្ហូបអាហារ មានអនាម័យល្អ គ្មានជាតិគីមី ដើម្បីធានាសុវត្ថិភាពសុខភាព របស់អតិថិជនរបស់ខ្លួន។
គណៈអភិបាលខេត្តព្រះសីហនុ ក្រោមការដឹកនាំរបស់ឯកឧត្ដមផ្ទាល់ នឹងរៀបចំក្រុមការងារមួយ ចុះអនុវត្តការចុះដាក់ពិន្ទុ បិទសញ្ញាសម្គាល់តាមអាហារដ្ឋាន និងទីតាំងផ្គត់ផ្គង់ម្ហូបអាហារនានា នូវកម្រិតសុវត្ថិភាពម្ហូបអាហារ ដើម្បីមានភាពងាយស្រួល ដល់បងប្អូនជ្រើសរើស។
ជាក់ស្ដែង កាលពីរសៀលថ្ងៃទី១៧ ខែឧសភា កន្លងទៅ ឯកឧត្ដម យន្ត មីន បានអញ្ជើញជាអធិបតី ក្នុងកិច្ចប្រជុំពិភាក្សា រៀបចំការដាក់តាំងពិព័រណ៍ម្ហូបអាហារ បន្លែ ផ្លែឈើ ផលិតផលក្នុងស្រុក គ្មានសារធាតុគីមីហាមឃាត់ ដែលនឹងប្រព្រឹត្តទៅ រយៈពេលបីថ្ងៃ គឺចាប់ពីថ្ងៃទី១៨ ដល់ថ្ងៃទី២០ ខែមិថុនាខាងមុខនេះ។
ក្នុងនាមជាគណៈអភិបាលខេត្ត ឯកឧត្ដមបានអំពាវនាវដល់បងប្អូនទាំងអស់ ឲ្យផ្តល់មតិយោបល់ថែមទៀត លើគំនិតផ្តួចផ្តើមនេះ ដើម្បីឲ្យផែនការនេះ សម្រេចបានដោយជោគជ័យ ផ្លែផ្កាល្អ។ ឯកឧត្ដម ក៏បានបញ្ជើញបងប្អូនទាំងអស់ ចូលរួមក្នុងកម្មវិធីខាងលើ និងជួយគាំទ្រចលនានេះ ដើម្បីជាការការពារសុខភាពខ្លួនឯង និងក្រុមគ្រួសារ តាមរយៈលើកទឹកចិត្ត អាហារដ្ឋានដែលផ្តល់សេវាម្ហូបអាហារ ដែលមានសុវត្ថិភាព។
គួរបញ្ជាក់ផងដែរថា រដ្ឋបាលខេត្តព្រះសីហនុ តែងតែយកចិត្តទុកដាក់ខ្ពស់ ចំពោះជីវភាពរស់នៅរបស់ប្រជាពលរដ្ឋខ្លួន ដោយបានបន្តអនុវត្ត និងដោះស្រាយនូវរាល់បញ្ហា ដែលប្រជាពលរដ្ឋជួបប្រទះ ដូចជាបញ្ហាបរិស្ថាន សុខមាលភាព និងសុវត្ថិភាព របស់ប្រជាពលរដ្ឋក្នុងខេត្តសក្តានុពលទេសចរណ៍ជាប់សមុទ្រមួយនេះ ៕
© រក្សាសិទ្ធិដោយ thmeythmey.com