អន្តរជាតិ
រដ្ឋបាលលោក ត្រាំ ស្នើឲ្យមានការបណ្តេញ វេណេស៊ុយអេឡា ចេញពីអង្គការរដ្ឋអាមេរិក សហរដ្ឋអាមេរិក និងសមាជិកគីឡូធ្ងន់ប្រាំមួយផ្សេងទៀតបានស្នើឲ្យអង្គការរដ្ឋអាមេរិក (OAS) ទាត់ចោលលទ្ធផលបោះឆ្នោតប្រធានាធិបតីនៅបណ្តេញវេណេស៊ុយអេឡា និងបណ្តេញប្រទេសនេះចេញពីក្លិបនៅថ្ងៃចន្ទទី ៤ខែមិថុនា។
ក្នុងកិច្ចប្រជុំប្រចាំឆ្នាំលើកទី ៤៨ នៃអង្គការរដ្ឋអាមេរិក សហរដ្ឋអាមេរិក កាណាដា អាហ្សង់ទីន ប្រេស៊ីល កាណាដា ស៊ីលី និងបេរ៉ូ បានដាក់ស្នើដំណោះស្រាយមួយដោយបដិសេធលទ្ធផលបោះឆ្នោតវេណេស៊ុយអេឡាកាលពីខែមុនផង។
យោងតាមទីភ្នាក់ងារព័ត៌មាន AFP សំណើរនេះអាចនឹងត្រូវគេបោះឆ្នោតនៅថ្ងៃអង្គារទី ៥ ខែមិថុនា ហើយបើសិនជាសមាជិកបោះឆ្នោតអនុម័ត វានឹងកំណត់ឲ្យមានការព្យួរសមាជិកភាពរបស់វេណេស៊ុយអេឡាផងដែរ។ យ៉ាងណាមិញ រដ្ឋាភិបាលលោក នីកូឡាស ម៉ាឌូរ៉ូ បានបង្ហាញឆន្ទៈចង់ចាកចេញពីអង្គការនេះរួចមកហើយកន្លងមក។
រដ្ឋមន្ត្រីការបរទេសអាមេរិកលោក ម៉ៃ ប៉ុមប៉េអូ (Mike Pompeo) ដែលចូលរួមក្នុងកិច្ចប្រជុំថ្នាក់តំបន់នេះក៏បានចោទប្រកាន់ថា រដ្ឋាភិបាលវេណេស៊ុយអេឡាព្យាយាមបំផ្លាញប្រជាធិបតេយ្យនៅក្នុងប្រទេសផងដែរ។ ការព្យួរបេក្ខភាពវេណេស៊ុយអេឡានេះ ជាសារមួយសម្រាប់របបដឹកនាំវេណេស៊ុយអេឡា ដែលបញ្ជាក់ថាមានតែប្រទេសដែលរៀបចំការបោះឆ្នោតត្រឹមត្រូវ សេរី និងយុត្តិធម៌ប៉ណ្ណោះទើបអាចស្ថិតក្នុងក្រុមគ្រួសាររដ្ឋអាមេរិកបាន។
លោក ប៉ុមប៉េអូ បាននិយាយដូច្នេះ៖« យើងទទូចឲ្យសមាជិកអង្គការរដ្ឋអាមេរិកចូលរួមគ្នាពេលនេះជុំវិញបញ្ហាវេណេស៊ុយអេឡា ហើយនៅពេលខាងមុខក៏ត្រូវចាត់វិធានការគ្រប់យ៉ាងដែលចាំបាច់ដើម្បីការពារតំបន់និងលើពិភពលោក»។
ក្រោយលោកថ្លែងចប់ អគ្គលេខាងធិការអង្គការរដ្ឋអាមេរិកលោក Luis Almagro បានចេញមុខរិះគន់រដ្ឋាភិបាលវេណេស៊ុយអេឡាដែរ ដោយលោកអះអាងថា ទ្វីបអាមេរិកមិនត្រូវការឡើយរបបផ្តាច់ការឡើយ។
តាមពិតទៅ កាលពីខែឧសភាកន្លងទៅ លោក ម៉ាឌូរ៉ូ បានជាប់ឆ្នោតជាថ្មីក្នុងការបោះឆ្នោតដែលគ្មានការចូលរួមពីបក្សប្រឆាំង ហើយត្រូវបានរិះគន់ខ្លាំងពីសហគមន៍អន្តរជាតិជាពិសេសអាមេរិក និងរដ្ឋអាមេរិកឡាទីន។
ដោយក្នុងកិច្ចប្រជុំនេះ គេឃើញឯកអគ្គរដ្ឋទូតវេណេស៊ុយអេឡា Jorge Arreaza នៅក្នុងអង្គប្រជុំនេះដែរ ដោយលោកមានតួនាទីជាអ្នកការពារជំហររដ្ឋាភិបាលផងដែរ។ ចំណែកលោក ម៉ាឌូ ឯណោះវិញបានទិតៀនសកម្មភាពអាមេរិកផងដែរ ក្រោយមានការស្នើឲ្យដកបេក្ខភាពវេណេស៊ុយអេឡា និងបដិសេធលទ្ធផលបោះឆ្នោតនោះ។ លោកបានចាត់ទុកថា អាមេរិកកំពុងរៀបចំយុទ្ធនាការរគំរាមកំហែងប្រទេសដទៃនៅអាមេរិកឡាទីនដោយធ្វើតាមខ្លួនផងដែរ។
Tag:
OAS
ដូណាល់ ត្រាំ
វេណេស៊ុយអេឡា
© រក្សាសិទ្ធិដោយ thmeythmey.com