ជាតិ
កម្ពុជា សុំសម្ភារទំនើបៗពីឥណ្ឌា ដើម្បីយកមកបំផ្លាញមីន និងរក្សាសន្តិភាព សម្តេច ទៀ បាញ់ ជួបលោកស្រី ស្រីម៉ាទី នីម៉ាឡា នៅទីស្តីការគណៈរដ្ឋមន្រ្តី កាលពីថ្ងៃទី១១ ខែមិថុនា ឆ្នាំ២០១៨។ រូបពីក្រសួងការពារជាតិកម្ពុជា
× កម្ពុជា បានស្នើឲ្យឥណ្ឌា ជួយផ្តល់សម្ភារទំនើបៗ ដើម្បីយកមកបំផ្លាញគ្រាន់មីន [ដែលសល់ពីសម័យសង្គ្រាម] និងដើម្បីបំរើឲ្យកិច្ចប្រតិបត្តិការរក្សាសន្តិភាព។ នេះបើតាមព័ត៌មានដែលចុះផ្យាយលើគេហទំព័រនៃក្រសួងការពារជាតិកម្ពុជា។
សំណើនេះ គឺសម្តេច ទៀ បាញ់ រដ្ឋមន្ត្រីក្រសួងការពារជាតិ ជាអ្នកលើកឡើង ក្នុងជំនួបជាមួយលោកស្រី ស្រីម៉ានី នីម៉ាឡា រដ្ឋមន្ត្រីក្រសួងការពារជាតិឥណ្ឌា នៅថ្ងៃទី១១ ខែមិថុនា ឆ្នាំ២០១៨។ ព័ត៌មានលើគេទំព័រនៃក្រសួងការពារជាតិកម្ពុជាដដែល បានចុះផ្សាយថា នៅចំពោះមុខលោកស្រី ស្រីម៉ានី នីម៉ាឡា សម្តេច ទៀ បាញ់ ក៏បានស្នើឲ្យភាគីឥណ្ឌា ជួយបណ្តុះបណ្តាលកងយោធពលខេមរភូមិន្ទកម្ពុជាទាំងនៅក្នុងប្រទេស ក៏ដូចជាកងកម្លាំង ដែលត្រូវបានបញ្ជូនឲ្យទៅរៀននៅឥណ្ឌា ផងដែរ។
ព័ត៌មានលើគេហទំព័រនៃក្រសួងការពារជាតិកម្ពុជា ពុំបានបញ្ជាក់ពីការឆ្លើយតបរបស់លោកស្រី ស្រីម៉ានី នីម៉ាឡា ជុំវិញសំណើសុំសម្ភារទំនើបៗនោះទេ។ ប៉ុន្តែ ប្រភពខាងលើ បញ្ជាក់ថា លោកស្រី បានលើកឡើងពីបំណង ដែលចង់ឲ្យកងយោធពលខេមរភូមិន្ទកម្ពុជា ដែលជាសិក្ខាកាម បានទៅរៀនសូត្រឲ្យបានច្រើននៅប្រទេសឥណ្ឌា លើមុខជំនាញថែរក្សាសន្តិភាព។
ប្រភពដដែល បានឲ្យដឹងទៀតថា លោកស្រី ស្រីម៉ានី នីម៉ាឡា បានស្នើឲ្យក្រុមការងារជំនាញ នៃក្រសួងការពារជាតិទាំងពីរ ធ្វើការរួមគ្នា ដើម្បីរិះរកវិធីយ៉ាងណា ឲ្យដំណើរការបណ្តុះបណ្តាលដល់សិក្ខាកាមយោធាកម្ពុជា ទទួលបានលទ្ធផលល្អ។
គួររម្លឹកថា ដំណើរទស្សនកិច្ចរបស់លោកស្រី ស្រីម៉ានី នីម៉ាឡា និងគណៈប្រតិភូឥណ្ឌា នៅកម្ពុជា គឺចាប់ពីថ្ងៃទី១០ ដល់ថ្ងៃ១២ ខែមិថុនា ឆ្នាំ២០១៨៕
Tag:
កម្ពុជា
ឥណ្ឌា
សន្តិសុខ
© រក្សាសិទ្ធិដោយ thmeythmey.com