ខ្មែរក្រហម
ជាតិ
សង្គមស៊ីវិលទូលព្រះមហាក្សត្រឲ្យបដិសេធច្បាប់ប្រឆាំងអ្នកមិនទទួលស្គាល់របបខ្មែរក្រហម
× ដោយចាត់ទុកច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាប្រជាធិបតេយ្យ ដែលត្រូវបានសភាអនុម័តកាលពីថ្ងៃទី៧ ខែមិថុនាកន្លងទៅនោះថា ជាច្បាប់មោឃៈ និងគ្មានន័យនោះ នៅថ្ងៃទី១០ខែមិថុនានេះ ក្រុមអង្គការសង្គមស៊ីវិលនៅកម្ពុជាចំនួន១៦អង្គភាព បានសហការគ្នាចេញមុខស្នើទៅកាន់ព្រះករុណាព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដោយសុំឲ្យទ្រង់ប្រោសព្រះរាជទាននូវការបដិសេធក្នុងការឡាយព្រះហស្ថលេខាលើច្បាប់ខាងលើនេះ។
យោងតាមសេចក្ដីថ្លែងការណ៍ចេញដោយអង្គការលីកាដូនោះ សំណើរនេះត្រូវបានធ្វើឡើងបន្ទាប់ ពីអង្គការទាំង១៦នោះ សង្កេតឃើញថាការអនុម័តច្បាប់ស្ដីពី«ការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាប្រជាធិបតេយ្យ»នេះមិនសមស្របទៅនឹងរដ្ឋធម្មនុញ្ញនៃព្រះរាជាណាចក្រកម្ពុជា ហើយថា ប្រសិនបើគណបក្សកាន់អំណាចនៅតែបន្ត ធ្វើការប្រជុំរដ្ឋសភាដោយអធម្មនុញ្ញបែបនេះ នោះគ្រប់ច្បាប់ទាំងអស់ដែលត្រូវបានសភាអនុម័ត នឹងត្រូវចាត់ទុកជាគ្មានន័យ និងមោឃៈ។
សេចក្ដីថ្លែងការណ៍បានបញ្ជាក់ថា នៅពេលដែលច្បាប់ខាងលើនេះ មិនទាន់ត្រូវបានព្រះមហាក្សត្រឡាយព្រះហស្ថលេខាប្រកាសឲ្យប្រើនោះ អង្គការសង្គមស៊ីវិលចំនួន១៦អង្គភាព សូមព្រះរាជទាន ទ្រង់ព្រះមេត្តាប្រោសបដិសេធក្នុងការឡាយព្រះហស្ថលេខាប្រកាសឲ្យប្រើច្បាប់ស្ដីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាប្រជាធិបតេយ្យនេះ ជាបណ្ដោះអាសន្នសិនរហូតមានដំណើរការពិភាក្សាណាមួយដែលអាចឲ្យច្បាប់នេះមានខ្លឹមសារស្របទៅនឹងបញ្ញត្តិរបស់រដ្ឋធម្មនុញ្ញនៃព្រះរាជាណាចក្រកម្ពុជា។
អង្គការសង្គមស៊ីវិលទាំង១៦នោះរួមមាន មជ្ឈមណ្ឌលអប់រំច្បាប់សម្រាប់សហគមន៍ សម្ព័ន្ធសហជីពចំណីអាហារ និងសេវាកម្មកម្ពុជា មជ្ឈមណ្ឌលកម្ពុជាសម្រាប់ប្រព័ន្ធផ្សព្វផ្សាយព័ត៌មានឯករាជ្យ សមាគមន៍មន្ត្រីរាជការកម្ពុជា សម្ព័ន្ធខ្មែរជំរឿននិងការការពារសិទ្ធិមនុស្សលីកាដូ មណ្ឌលអភិវឌ្ឍន៍កម្មករកម្ពុជា បណ្ដាញយុវជនកម្ពុជា សម្ព័ន្ធសហគមន៍កសិករកម្ពុជា សមធម៌កម្ពុជា សមាគមន៍អភិវឌ្ឍន៍កសិករ សមាគមន៍ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ គណៈកម្មាធិការអព្យាក្រិត និងយុត្តិធម៌ ដើម្បីការបោះឆ្នោតដោយសេរីនិងត្រឹមត្រូវ សកម្មភាពប្រជាជនដើម្បីការផ្លាស់ប្ដូរ សមាគមធាងត្នោត និង គណៈកម្មាធិការនៃអង្គការមិនមែនរដ្ឋាភិបាលកម្ពុជា ដើម្បីអនុសញ្ញាលុបបំបាត់រាល់ទម្រង់នៃការរើសអើងស្ត្រីភេទ។
គួរបញ្ជាក់ថា រដ្ឋធម្មនុញ្ញនៃព្រះរាជានាចក្រកម្ពុជាត្រង់ ជំពូក២ មាត្រា២៨ បានចែងកំណត់ថា៖ « ព្រះមហាក្សត្រទ្រងឡាយព្រះហស្ថលេខាលើព្រះរាជក្រម ប្រកាសឲ្យប្រើរដ្ឋម្មនុញ្ញ ច្បាប់ដែលរដ្ឋសភាបានអនុម័ត និងព្រឹទ្ធសភាបានពិនិត្យចប់សព្វគ្រប់រួចហើយ និងទ្រង់ឡាយព្រះហស្ថលេខាលើព្រះរាជក្រឹត្យ តាមសេចក្ដីស្នើសុំពីគណៈរដ្ឋមន្ត្រី។
គួរម្លឹកថានៅថ្ងៃទី៧ ខែមិថុនាកន្លងទៅនេះ រដ្ឋសភា ដោយមានសំណើរពីរាជរដ្ឋាភិបាល បានពិភាក្សាអនុម័តលើសេចក្ដីស្នើច្បាប់ស្ដីពី «ការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាប្រជាធិបតេយ្យ»ក្នុងសំឡេង៨៦ លើ ៨៦ ដែលភាគច្រើនជាសំឡេងរបស់តំណាងរាស្ត្រមកពីគណបក្សប្រជាជនកម្ពុជា៕
© រក្សាសិទ្ធិដោយ thmeythmey.com