អ្នកជំនាញ៖«សន្តិសុខបច្ចេកវិទ្យាកម្ពុជានៅមានកម្រិតទាបស្មើឡាវ និងមីយ៉ាន់ម៉ាប៉ុណ្ណោះ»

ជាតិ

បច្ចេកវិទ្យា

អ្នកជំនាញ៖«សន្តិសុខបច្ចេកវិទ្យាកម្ពុជានៅមានកម្រិតទាបស្មើឡាវ និងមីយ៉ាន់ម៉ាប៉ុណ្ណោះ»

21, Jun 2018 , 3:34 pm

រូបភាព

លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យានិងព័ត៌មាននៃក្រសួងប្រៃសណីយ៍ និងទូរគមនាគមន៍

ដោយ: តន ចាន់រិទ្ធារ៉ា

សន្តិសុខបច្ចេកវិទ្យា (Cybersecurity) គឺជាបញ្ហាប្រឈមសម្រាប់ពិភពលោក ខណៈបច្ចេកវិទ្យាព័ត៌មានបានផ្លាស់ប្ដូរយ៉ាងខ្លាំងនៅប៉ុន្មានឆ្នាំមកនេះ ដោយនាំទាំងផលប្រយោជន៍ និងបញ្ហា។ មិនថាបុគ្គល ឬស្ថាប័នណាមួយឡើយ សុទ្ធតែងាយស្រួលក្លាយជាជនរងគ្រោះនៃការវាយប្រហារតាមបណ្ដាញអនឡាញទាំងអស់។ សម្រាប់កម្ពុជាវិញ សមត្ថភាពដោះស្រាយបញ្ហាសន្តិសុខបច្ចេកវិទ្យានេះ នៅមានកម្រិតនៅឡើយដោយសារកង្វះធនធាន និងយុទ្ធសាស្ត្ររួមផង។

លោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យានិងព័ត៌មាន និយាយថា សមត្ថភាពរបស់កម្ពុជាក្នុងវិស័យសន្តិសុខបច្ចេកវិទ្យា នៅមានកម្រិតនៅឡើយ បើប្រៀបធៀបជាមួយប្រទេសក្នុងតំបន់។ លោកនិយាយបែបនេះនាកិច្ចពិភាក្សាអាហារពេលព្រឹកដែលរៀបចំដោយសភាពាណិជ្ជកម្មអឺរ៉ុបនៅកម្ពុជា (EUROCHAM) នាថ្ងៃទី២១ ខែមិថុនា នៅឯសណ្ឋាគារឡឺ រ៉ូយ៉ាល់ ។

ថ្លែងប្រាប់អ្នកសារព័ត៌មានថ្មីៗ លោក ផាន់ណារិទ្ធ បានលើកឡើងប្រទេសក្នុងតំបន់ខ្លះដែលមានផែនការយុទ្ធសាស្ត្រសន្តិសុខបច្ចេកវិទ្យាគមនាគមន៍និងព័ត៌មាន ខណៈកម្ពុជាមិនមាននៅឡើយ។ លោកបញ្ជាក់ថា កម្ពុជាមិនទាន់មានយុទ្ធសាស្ត្រទេ មានតែផែនការមេស្ដីពីការអភិវឌ្ឍវិស័យបច្ចេកវិទ្យា គមនាគមន៍ និងព័ត៌មានឆ្នាំ២០២០។ តែលោកសង្ឃឹមថា នៅអាណត្តិរដ្ឋាភិបាលថ្មី នឹងមានការរៀបចំយុទ្ធសាស្ត្រដើម្បីប្រើប្រាស់ក្នុងប្រទេស និងស៊ីសង្វាក់តាមការអភិវឌ្ឍក្នុងតំបន់។

ជុំវិញសមត្ថភាពឆ្លើយតបពេលមានការប្រហារ មន្ត្រីក្រសួងប្រៃសណីយ៍និងទូរគមនាគមន៍រូបនេះអះអាងថា កម្ពុជានៅមានការខ្វះខាតច្រើន ហើយមានកម្រិតស្មើឡាវ និងមីយ៉ាន់ម៉ាប៉ុណ្ណោះ។ បើតាមលោក ផាន់ណារិទ្ធ សាកលវិទ្យាល័យនៅកម្ពុជាគ្មានជំនាញនេះទេ ហើយនិស្សិតរៀនចប់ក៏គ្មានសមត្ថភាពលើជំនាញនេះដែរ ខណៈប្រទេសផ្សេង ការអប់រំលើជំនាញនេះមានចាប់ពីថ្នាក់វិទ្យាល័យឡើង។

យ៉ាងណាមិញ មន្ត្រីដដែលនេះបន្តថា៖ «យើងកំពុងព្យាយាមពង្រឹងសមត្ថភាព បណ្ដុះបណ្ដាលមន្ត្រីឲ្យបានច្រើន ដើម្បីឈានដល់កម្រិតស្មើថៃ និងវៀតណាម»។

ពាក់ព័ន្ធសន្តិសុខបច្ចេកវិទ្យានេះដែរ អ្នកជំនាញខាងលើនិយាយថា ការទប់ស្កាត់មិនមានប្រសិទ្ធភាព១០០ភាគរយឡើយ ព្រោះប្រព័ន្ធប្រតិបត្តិការកាន់តែធំ។ លោក ផាន់ណារិទ្ធ បានណែនាំឲ្យមានការផ្ដោតឲ្យបានច្រើនលើការឃ្លាំមើល និងលើការឆ្លើយតបវិញ។ ចំណុចសំខាន់ គឺមានយន្តការដើម្បីចាប់សកម្មភាពវាយប្រហារឲ្យបានលឿន និងវិធីសាស្ត្រឆ្លើយតបឲ្យមានប្រសិទ្ធភាព ។

ដោយឡែកក្នុងកម្មវីធីសន្ទនាដដែល លោក Pinyo Treepetcharaporn អ្នកជំនាញក្នុងវិស័យសន្តិសុខបច្ចេកវិទ្យានៃក្រុមហ៊ុន Deloitte ដែរ លើកឡើងថា ការវាយប្រហារតាមប្រព័ន្ធអនឡាញនេះបានកើនឡើងខ្លាំង ស្របពេលដែលការអភិវឌ្ឍផ្នែកឌីជីថលកំពុងប្រែប្រួលខ្លាំងដែរ។ ដើម្បីទប់ស្កាត់ការគំរាមកំហែង អ្នកជនជាតិរូបនេះបានលើកឡើងពីស្តង់ដាអន្តរជាតិ IS0 27001:2013 ដែលជាស្តង់ដាការពារការវាយប្រហារបច្ចេកវិទ្យា៕