អន្តរជាតិ
ប្រធានាធិបតីបារាំងទស្សនកិច្ចនៅនីហ្សេរីយ៉ាដើម្បីពង្រឹងកិច្ចសហប្រតិបត្តិការសន្តិសុខ និងប្រឆាំងភេរវកម្ម
× ប្រធានាធិបតីបារាំងលោក អេម៉ានុយអែល ម៉ាក្រុងកំពុងបំពេញទស្សនកិច្ចនៅក្នុងប្រទេសនីហ្សេរីយ៉ាចាប់ពីថ្ងៃអង្គារទី ៣ ខែកក្កដាម្សិលមិញ។ គោលដៅសំខាន់នៃដំណើរទស្សនកិច្ចនេះគឺពង្រឹងកិច្ចសហប្រតិបត្តិការសន្តិសុខ និងការទូតជាមួយរដ្ឋអាហ្វ្រិកមួយនេះផង។
ពេលយន្តហោះរបស់លោក ម៉ាក្រុង ចុះចតនៅព្រលានយន្តហោះរដ្ឋធានី អាប៊ូហ្សា គេឃើញរដ្ឋមន្ត្រីការបរទេសនីហ្សេរីយ៉ាលោក Geoffrey Onyeama ឈរចាំទទួលស្វាគមន៍ដែរ។ បន្ទាប់មក លោក ម៉ាក្រុង ក៏ធ្វើដំណើរទៅជួបជាមួយសមភាគីនីហ្សេរីយ៉ាលោក Muhammadu Buhari និវេសនដ្ឋានរបស់លោកតែម្តង។
បើតាមទីភ្នាក់ងារព័ត៌មាន AFP មុនមកដល់រដ្ឋធានីអាប៊ូហ្សា លោក ម៉ាក្រុង បានចូលទស្សនកិច្ចនៅប្រទេសម៉ូរីតានី ដោយលោកបានចូលរួមក្នុងកិច្ចប្រជុំកំពូសហភាពអាហ្វ្រិកផងដែរ។ កិច្ចប្រជុំតំបន់នេះផ្តោតសំខាន់លើបញ្ហាសន្តិសុខជាពិសេសក្នុងតំបន់ សាហែល (Sahel) ផង។
លោក ម៉ាក្រុង បញ្ជាក់ថា លោកខ្វល់ខ្លាំងពីបញ្ហាសន្តិសុខតំបន់អាហ្វ្រិក ហើយលោកធានាលើកយកបញ្ហានេះជាពិសេសការប្រយុទ្ធប្រឆាំងភេរវកម្មជាពិសេសក្រុមបូកូហារ៉ាមនោះក្នុងជំនួបជាមួយលោក Buhari ផងដែរ។
នីហ្សេរីយ៉ា ក៏ដូចជាបណ្តារដ្ឋអាហ្វ្រិកផ្សេងទៀតស្ថិតនៅតំបន់បឹងឆាត (Chad Lake) រងគ្រោះខ្លាំងដោយសារបញ្ហាហិង្សាប្រដាប់អាវុធរយៈពេលប្រាំបួនឆ្នាំមកនេះ។ ដូច្នេះហើយបានជាលោក ម៉ាក្រុងចង់ឲ្យមានការពង្រឹងកិច្ចសហប្រតិបត្តិការបន្ថែមរវាងរដ្ឋអាហ្វ្រិកដើម្បីដោះស្រាយបញ្ហាសន្តិសុខតំបន់នេះ។
បច្ចុប្បន្ននីហ្សេរីយ៉ានិងប្រទេសជិតខាងមានកាមេរ៉ូន, ឆាត និងនីហ្សេ មានប្រតិបត្តិការយោធារួមគ្នាក្នុងការប្រឆាំងចលនាក្រុមជីហាត ដែលបន្តបង្កហិង្សាដែលឆក់យកជីវិតមនុស្សយ៉ាងហោចណាស់ ២០០០០នាក់រួចទៅហើយនោះ។
ដោយឡែក លោក ម៉ាក្រុង មានអនុស្សាវរីយ៍ច្រើននៅរដ្ឋអាហ្វ្រិកនីហ្សេរីយ៉ា ព្រោះលោកធ្លាប់ធ្វើជាមន្ត្រីហាត់ការនៅក្នុងស្ថានទូតបារាំងប្រចាំក្រុងអាប៊ូហ្សាផងដែរនៅដើមឆ្នាំ ២០០០នោះ។ លោក ម៉ាក្រុង បានថ្លែងប្រាប់អ្នកសារព័ត៌មានដូច្នេះ៖ «ខ្ញុំចូលចិត្តនីហ្សេរីយ៉ា ជាប្រទេសដែលទាក់ទាញ ហើយខ្ញុំមានអនុស្សាវរីយ៍ច្រើនណាស់ដែលខ្ញុំមិនអាចបំភ្លេចបាននោះ»។
ចាប់ពីឡើងកាន់តំណែងកាលពីខែឧសភាឆ្នាំមុន រដ្ឋបាលក្រុងប៉ារីសព្យាយាមពង្រឹងទំនាក់ទំនងជាមួយបណ្តាប្រទេសនៅអាហ្វ្រិកដែលធ្លាប់ស្ថិតនៅក្រោមអាណានិគមបារាំង ក៏ដូចជាព្យាយាមពង្រឹងចំណងពាណិជ្ជកម្មជាមួយរដ្ឋនិយាយភាសាអង់គ្លេសដែរ។
កន្លងមកលោក ម៉ាក្រុង បានក៏ទៅទស្សនកិច្ចនៅហ្កាណា ឆ្នាំមុន ហើយលើកនេះនៅនីហ្សេរីយ៉ា។ នីហ្សេរីយ៉ាត្រូវបានគេស្គាល់ថា ជាប្រទេសដែលមានប្រជាជនរហូតដល់ ១៨០ លាននាក់ និងជាប្រទេសដែលមានសេដ្ឋកិច្ចធំផុតគេនៅក្នុងតំបន់អាហ្វ្រិកផងដែរ។ រដ្ឋអាហ្វ្រិកមួយនេះអាចផលិតប្រេងបានមួយថ្ងៃជិត ២០០លានបារ៉ែល និងជាដៃគូសេដ្ឋកិច្ចធំបំផុតមួយរបស់បារាំងផងដែរ៕
Tag:
អេម៉ានុយអែល ម៉ាក្រុង
នីហ្សេរីយ៉ា
© រក្សាសិទ្ធិដោយ thmeythmey.com