៦ខែដើមឆ្នាំនេះ រដ្ឋរកចំណូលពីវិស័យព្រៃឈើបានជាង ៣លានដុល្លារ

ជាតិ

សេដ្ឋកិច្ច

៦ខែដើមឆ្នាំនេះ រដ្ឋរកចំណូលពីវិស័យព្រៃឈើបានជាង ៣លានដុល្លារ

24, Jul 2018 , 10:59 pm

រូបភាព

ដោយ:

ភ្នំពេញ៖ ក្នុងរយៈពេល៦ខែឆ្នាំនេះ វិស័យព្រៃឈើ និងអនុផលព្រៃឈើ បានផ្ដល់ចំណូលជាង ៣លានដុល្លារ។ នេះបើតាមរបាយការណ៍ប្រចាំឆមាសទី១របស់ក្រសួងកសិកម្ម រុក្ខាប្រមាញ់ និងនេសាទ។

ក្នុងឆមាសទី១ឆ្នាំនេះ ក្រុមហ៊ុនចំនួន ១១ បាននាំចេញផលិតផលរានទេវតានិងឈើកែច្នៃ ទៅក្រៅប្រទេស ៣១៥៦ម៉ែត្រគីប ចំណាំងកម្ទេចឈើ ៥០០តោន និងជ័រទឹក ២០៥តោន។ តែទន្ទឹមនឹងនេះ កម្ពុជាក៏បាននាំចូលឈើប្រមាណ ២២៥៨ម៉ែត្រគីបពីក្រៅប្រទេសផងដែរ។

របាយការណ៍ខាងលើឲ្យដឹងថា រដ្ឋបាលព្រៃឈើបានផ្ដល់លិខិតបើកផ្លូវដឹកជញ្ជូនផលព្រៃឈើ និងអនុផលព្រៃឈើជូនក្រុមហ៊ុន និងអតិថិជន ១៨នាក់ ដែលមានឈើហ៊ុបមូលចំនួន ១១៧២៥ ម៉ែត្រគីប, ឈើរអា ២៨២៤ ម៉ែត្រគីប, ឈើជ្រុងនិងឡាំងជ្រុង ៦០៥ម៉ែត្រគីប, ឈើក្រាក់ ១ម៉ែត្រគីប, ឈើប្រណិត ១៧៦៤៧ ម៉ែត្រគីប, អុស៣៧៥៩ស្ទែរ, ជ័រទឹក ៥២៧តោន, ឬស្សីព្រៃ ៦២៧តោន, គល់ធ្នង់ ៦គល់, បង្គោលក្រាក់ ១៣៣៧ដើម, ជន្លង់ម្រេច ១០៣៨ដើម, ពក ៨៤៣គីឡូក្រាម និងធ្យូង ១៧១៨០គីឡូក្រាម។

របាយការណ៍ខាងលើបានឲ្យដឹងថា ក្នុងឆមាសទី១ឆ្នាំនេះ ចំណូលពីថ្លៃសួយសារផល អនុផលព្រៃឈើមានចំនួន ១២ ៥០០ ៨២៩ ៦៤២ រៀល (ប្រហែល ៣,១លានដុល្លារ) និងប្រាក់ដុល្លារ ៩០២២៦ ដុល្លារ។ ទោះយ៉ាងណាសារព័ត៌មានថ្មីៗ មិនអាចសុំការបញ្ជាក់បន្ថែមពីលោក អ៊ុង សំអាត ប្រតិភូរាជរដ្ឋាភិបាលទទួលបន្ទុករដ្ឋបាលព្រៃឈើ អំពីចំណូលពីវិស័យនេះ។

រីឯបទល្មើសព្រៃឈើ សត្វព្រៃ និងកាប់រានដីព្រៃ ដែលកើតឡើងក្នុងរយៈពេល៦ខែនេះ មានចំនួន ៥៧៥ករណី៕