ជាតិ
នយោបាយជាតិ
ក្រសួងព័ត៌មាន ព្រមានដកអាជ្ញាប័ណ្ណប្រព័ន្ធផ្សព្វផ្សាយណា ដែលចុះផ្សាយរឿងនយោបាយ នៅថ្ងៃ«ស» ![](https://image.thmeythmey.com/pictures/2018/07/28/phos_sovan.jpg)
×![]()
ភ្នំពេញ៖ ក្រសួងព័ត៌មាន ព្រមានដកអាជ្ញាប័ណ្ណរបស់ស្ថាប័នប្រព័ន្ធផ្សព្វផ្សាយណា ដែលបន្តចុះផ្សាយពីរឿងនយោបាយ នៅថ្ងៃ«ស» មុនការបោះឆ្នោតនេះ។
អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន លោក ផុស សុវណ្ណ បាននិយាយថា ក្រសួងកំពុងតាមដានមើលប្រព័ន្ធផ្សព្វផ្សាយទាំងអស់នៅកម្ពុជា អំពីដំណើរការចុះផ្សាយអត្ថបទព័ត៌មាន នៅថ្ងៃ«ស» ដែលហាមនិយាយពីរឿងនយោបាយនេះ។ លោក ផុស សុវណ្ណ បានបន្ថែមថា បើក្រសួងរកឃើញប្រព័ន្ធផ្សព្វផ្សាយណា ដែលធ្វើផ្ទុយពីបម្រាម គ.ជ.បនោះ ក្រសួងនឹងចាត់វិធានការតាមច្បាប់របស់ព័ត៌មាន ដែលបានកំណត់។
ថ្លែងប្រាប់សារព័ត៌មានថ្មីៗ តាមទូរស័ព្ទ អគ្គនាយកនៃអគ្គនាយកដ្ឋានព័ត៌មានរូបនេះ បាននិយាយថា៖មកដល់ពេលនេះ យើងមិនទាន់ឃើញមានការស្ថាប័នព័ត៌មានណា ចុះផ្សាយរឿងនយោបាយផ្ទុយពីច្បាប់ឡើយ។ ប៉ុន្តែបើយើងពិនិត្យឃើញថា មានស្ថាប័នណាចុះផ្សាយនោះ គឺយើងផ្ដល់កាតលឿង ឬកាតក្រហមទៅស្ថាប័ននោះ ដោយហៅម្ចាស់ស្ថាប័នមកព្រមាន ឬដកអាជ្ញាបណ្ណពីពួកគេតែម្ដង»។
លោក ផុស សុវណ្ណ ស្នើឲ្យស្ថាប័នព័ត៌មានទាំងអស់ ចុះផ្សាយអត្ថបទឲ្យបានត្រឹមត្រូវ តាមច្បាប់ដែលបានកំណត់។ ស្ថាប័នព័ត៌មានអនឡាញនៅកម្ពុជា មាន២០០អង្គភាព ស្ថាប័នកាសែត វិទ្យុ និងទូរទស្សន៍មាន៧០០អង្គភាព ដែលបានចុះបញ្ជីនៅក្រសួងព័ត៌មាន។ នេះបើតាមលោក ផុស សុវណ្ណ។
ថ្ងៃ«ស» តម្រូវឲ្យគ្រប់ប្រព័ន្ធផ្សព្វផ្សាយ គណបក្សនយោបាយ និងប្រជាពលរដ្ឋ រក្សាភាពស្ងៀមស្ងាត់ ដោយមិនត្រូវធ្វើសកម្មភាពណាមួយ ដើម្បីឃោសនាពីគោលនយោបាយ ឬសារនយោបាយ និងកម្មវិធីនយោបាយ ក្នុងគោលបំណងទាក់ទាញសន្លឹកឆ្នោតនោះទេ។ នេះជាការពន្យល់លោក ស៊ិក ប៊ុនហុក ដែលអំពាវនាវឲ្យរក្សាភាពស្ងប់ស្ងាត់ ចាប់ពីម៉ោង១២:០០ យប់ថ្ងៃទី២៧ ដល់ម៉ោង១២:០០ យប់ថ្ងៃទី២៩ ខែកក្កដា៕
Tag:
ផុស សុវណ្ណ
បោះឆ្នោត
គ.ជ.ប
© រក្សាសិទ្ធិដោយ thmeythmey.com