អន្តរជាតិ
អាមេរិកចាត់ទុកម៉ាឡេស៊ីជារដ្ឋប្រជាធិបតេយ្យខ្លាំង ដោយសារបក្សប្រឆាំងអាចឈ្នះបក្សកាន់អំណាច រដ្ឋមន្រ្តីការបរទេសអាមេរិក ម៉ៃ ប៉ុមប៉េអូ ចាប់ដៃនាយករដ្ឋមន្ត្រីម៉ាឡេស៊ី មហាធៀ មហាម៉ាត់ នាជំនួបទ្វេភាគី (រូបភាព AFP)
× ការបោះឆ្នោតនៅម៉ាឡេស៊ី ដែលសម្ព័ន្ធបក្សប្រឆាំងដឹកនាំលោក មហាធៀ មហាម៉ាត់ ផ្ដួលសម្ព័ន្ធភាពកាន់អំណាច ត្រូវបានអាមេរិកចាត់ទុកជារឿងប្រវត្តិសាស្ត្រ។ មន្ត្រីជាន់ខ្ពស់ក្រសួងការបរទេសអាមេរិក នៅថ្ងៃទី២ ខែសីហា និយាយថា ជ័យជម្នះរបស់ក្រុមប្រឆាំងរបស់លោក មហាធៀ បានបង្ហាញពីភាពរឹងមាំនៃប្រជាធិបតេយ្យនៅម៉ាឡេស៊ី។ ទោះមានការផ្លាស់ប្ដូររដ្ឋាភិបាលនៅម៉ាឡេស៊ីក្ដី អាមេរិកនៅរំពឹងថា ទំនាក់ទំនងទ្វេភាគីនឹងនៅតែល្អប្រសើរដដែល។
ការវិលត្រឡប់របស់លោក មហាធៀ មហាម៉ាត់ ជានាយករដ្ឋមន្ត្រីរបស់ម៉ាឡេស៊ី គឺជារឿងគួរឲ្យចាប់អារម្មណ៍មួយសម្រាប់អាមេរិក។ នេះជាការលើកឡើងរបស់មន្ត្រីជាន់ខ្ពស់ក្រសួងការបរទេសអាមេរិក នៅថ្ងៃទី២ ខែសីហា នៅមុនការទៅដល់ម៉ាឡេស៊ីរបស់រដ្ឋមន្ត្រីការបរទេស ម៉ៃ ប៉ុមប៉េអូ ។ លោក ប៉ុមប៉េអូ ជាមន្ត្រីជាន់ខ្ពស់របស់អាមេរិកទីមួយដែលធ្វើទស្សនកិច្ចនៅម៉ាឡេស៊ី ក្រោយការបោះឆ្នោតដែលសម្ព័ន្ធភាពប្រឆាំងផ្ដួលសម្ព័ន្ធភាពកាន់អំណាច។
ថ្លែងទៅកាន់អ្នកសារព័ត៌មានពីលើយន្តហោះក្នុងដំណើរទៅម៉ាឡេស៊ី មន្ត្រីជាន់ខ្ពស់នៅក្រសួងការបរទេសអាមេរិកបានកត់សម្គាល់ថា នេះជាលើកទីមួយក្នុងប្រវត្តិសាស្ត្រម៉ាឡេស៊ីដែលបក្សប្រឆាំងជាអ្នកឈ្នះ។ បើតាមមន្ត្រីដដែលនេះ ជ័យជម្នះបានបង្ហាញពីកម្រិតអភិបាលកិច្ច និងប្រជាធិបតេយ្យដែលលេចរូបរាងច្បាស់នៅម៉ាឡេស៊ី ហើយក៏បង្ហាញថា ម៉ាឡេស៊ីជាប្រទេសមានប្រជាធិបតេយ្យខ្លាំងក្នុងចំណោមសមាជិកអាស៊ានដែរ។
លោក មហាធៀ ជានាយករដ្ឋមន្ត្រីដែលកាន់តំណែងយូរជាងគេរបស់ម៉ាឡេស៊ី ដោយដឹកនាំរដ្ឋាភិបាលចាប់ពីឆ្នាំ ១៩៨១ ដល់ឆ្នាំ ២០០៣ កាលនៅជាមេដឹកនាំបក្សកាន់អំណាច UMNO ។ ប៉ុន្តែលោកសម្រេចចិត្តចាកចេញមកបង្កើតបក្សខ្លួនឯងនៅក្នុងឆ្នាំ ២០១៥ ក្រោយមានជម្លោះជាមួយលោក ណាជីប រ៉ាហ្សាក់ ដោយសារសំណុំរឿងពុករលួយ 1MDB។ លោកក៏សម្រេចចាប់ដៃសត្រូវចាស់លោក អាន់វ៉ា អ៊ីប្រាហ៊ីម ដើម្បីពង្រឹងសម្ព័ន្ធបក្សប្រឆាំងហើយក៏ឈ្នះការបោះឆ្នោតខែឧសភា។
«លោក មហាធៀ បានត្រឡប់ទៅកាន់តួនាទីដឹកនាំវិញតាមផ្លូវផ្សេង ហើយនេះជាការសង្កេតរបស់អាមេរិកលើការបោះឆ្នោតនៅម៉ាឡេស៊ី»។ នេះជាសម្ដីរបស់មន្ត្រីជាន់ខ្ពស់អាមេរិក មុននឹងបន្តថា លោក មហាធៀ ជារដ្ឋបុរសរបស់ម៉ាឡេស៊ី និងតំបន់ទាំងមូល ហើយពោរពេញដោយបទពិសោធន៍គ្រប់គ្រងរដ្ឋាភិបាល។
ទោះជាម៉ាឡេស៊ីបានផ្លាស់ប្ដូរក្បាលម៉ាស៊ីនដឹកនាំក្ដី មន្ត្រីក្រុងវ៉ាស៊ីនតោននៅតែជឿថា ទំនាក់ទំនងស៊ីជម្រៅលើវិស័យជាច្រើនដែលមានស្រាប់រវាងអាមេរិក និងម៉ាឡេស៊ី នឹងនៅតែល្អប្រសើរដដែល។ ទស្សនកិច្ចរបស់លោក ប៉ុមប៉េអូ ដែលមានបញ្ចូលជំនួបជាមួយលោក មហាធៀ ផងនោះ គឺជាឱកាសសម្រាប់ក្រុងវ៉ាស៊ីនតោន និងគួឡាឡាំពួរ បន្តការងារថ្មី ជាពិសេសគោលនយោបាយពាណិជ្ជកម្មរបស់លោកប្រធានាធិបតី ដូណាល់ ត្រាំ ៕
Tag:
អាមេរិក
ម៉ាឡេស៊ី
Mike Pompeo
ប្រជាធិបតេយ្យ
© រក្សាសិទ្ធិដោយ thmeythmey.com