ជាតិ
នយោបាយជាតិ
ចៅក្រមស៊ើបសួរ នឹងទៅជួបលោក កឹម សុខា ដល់ពន្ធនាគារ ដើម្បីប្រាប់ថាដោះលែងឬបន្តឃុំ ![លោក កឹម សុខា ចេញឃោសនាក្នុងខេត្តសៀមរាប កាលពីបោះឆ្នោតឃុំ-សង្កាត់ ឆ្នាំ២0១៧។ រូបភាពពីហ្វេសបុក Kem Sokha](https://image.thmeythmey.com/pictures/2018/08/24/kha.jpg)
លោក កឹម សុខា ចេញឃោសនាក្នុងខេត្តសៀមរាប កាលពីបោះឆ្នោតឃុំ-សង្កាត់ ឆ្នាំ២0១៧។ រូបភាពពីហ្វេសបុក Kem Sokha
×![]()
ភ្នំពេញ៖ លោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ នឹងធ្វើដំណើរទៅជួបលោក កឹម សុខា អតីតប្រធានគណបក្សសង្គ្រោះជាតិ ដល់ពន្ធនាគារត្រពាំងផ្លុង ក្នុងខេត្តត្បូងសាជាថ្មី នៅព្រឹកថ្ងៃទី៣០ ខែសីហា ឆ្នាំ២០១៨នេះ ដើម្បីបើកសវនាការនៅទីនោះតែម្តង។
លោក ចាន់ ចេន មេធាវីម្នាក់របស់លោក កឹម សុខា អះអាងថា លោក បានទទួលដីកាអញ្ជើញពីចៅក្រមស៊ើបសួររួចហើយ។ លោក ប្រាប់សារព័ត៌មានថ្មីៗ តាមទូរសព្ទយ៉ាងដូច្នេះថា៖«សវនាការនេះ គឺជានីតិវិធី ដែលធ្វើឡើងដើម្បីសម្រេចថាត្រូវដោះលែង ឬបន្តឃុំខ្លួន។ វា ជារឿងសំខាន់ណាស់សម្រាប់កូនក្តីរបស់ពួកខ្ញុំ ដូច្នេះ ពួកខ្ញុំ នឹងទៅចូលរួមទាំងអស់គ្នា»។
លោកមេធាវីរូបនេះ គ្រាន់តែបង្ហាញក្តីសង្ឃឹមថាលោក កឹម សុខា អាចនឹងទទួលបានលទ្ធផលវិជ្ជមាន ក្នុងការបើកសវនាការនាពេលខាងមុខ។ ប៉ុន្តែ លោក មិនហ៊ានអះអាងទេ ថាអតីតប្រធានគណបក្សប្រឆាំង នឹងត្រូវបានដោះលែង។ លោក ពន្យល់ថា ដោះលែងឬមិនដោះលែង គឺជាឆន្ទានុសិទ្ធិរបស់ចៅក្រមស៊ើបសួរ។
ក្នុងបទល្មើសឧក្រិដ្ឋ ចៅក្រមស៊ើបសួរ អាចបន្តឃុំជនត្រូវចោទ រហូតដល់ទៅ១៨ខែឯណោះ។ ជានីតិវិធី ក្នុងរយៈ៦ខែ ចៅក្រមស៊ើបសួរ ត្រូវធ្វើសេចក្តីសម្រេចម្តង ថាត្រូវដោះលែង ឬក៏ត្រូវបន្តឃុំខ្លួន។
ចៅក្រមស៊ើបសួរ បានទៅជួបលោក កឹម សុខា ៣លើករួចមកហើយនាពេលកន្លងមក។ ក្រោយលោក កឹម សុខា ជាប់ឃុំបាន៦ខែ ចៅក្រមស៊ើបសួរ បានធ្វើសេចក្តីសម្រេចម្តង ដោយកាលនោះ សម្រេចបន្តឃុំខ្លួន។ ឥឡូវ ជិតដល់រយៈពេល៦ខែទៀតហើយ ដូច្នេះ ចៅក្រមស៊ើបសួរ ត្រូវទៅជួបលោក កឹម សុខា ដើម្បីសម្រេចជាថ្មីថា ត្រូវបន្តឃុំខ្លួនទៀត ឬក៏ត្រូវដោះលែង។
មជ្ឍដ្ឋានជាច្រើន រួមទាំងសហគមន៍អន្តរជាតិផង ហាក់សង្ឃឹមថា លោក កឹម សុខា អាចនឹងត្រូវបានដោះលែងក្នុងពេលឆាប់ៗនេះ។ មជ្ឈដ្ឋានទាំងនោះ សង្ឃឹមបែបនេះ ដោយសារតែពួកគេ ឃើញមនុស្សមួយចំនួន រួមមាន អ្នកនយោបាយ អ្នកវិភាគ សកម្មជនដីធ្លី និងអតីតអ្នកកាសែត ត្រូវបានដោះលែងជាបន្តបន្ទាប់។
លោក កឹម សុខា ត្រូវបានចាប់ខ្លួនកាលដើមខែកញ្ញា ឆ្នាំ២០១៧ ក្រោមការសង្ស័យរបស់តុលាការថា លួចគប់គិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា។ បើគិតទៅ លោក បានជាប់ឃុំជិត១២ខែហើយ៕
Tag:
កឹម សុខា
មេធាវី
តុលាការ
© រក្សាសិទ្ធិដោយ thmeythmey.com