អន្តរជាតិ
នាយករដ្ឋមន្ត្រីថ្មីអូស្ត្រាលី ទៅឥណ្ឌូណេស៊ីមុនគេ ដើម្បីប្រកាសកិច្ចព្រមព្រៀងពាណិជ្ជកម្ម នាយករដ្ឋមន្រ្តីថ្មីអូស្ត្រាលី ស្កុត ម៉ូរីសុន (រូបភាព AFP)
× នាយករដ្ឋមន្ត្រីថ្មីអូស្ត្រាលី ស្កុត ម៉ូរីសុន នឹងចាប់ផ្ដើមទស្សនកិច្ចនៅឥណ្ឌូណេស៊ីនៅថ្ងៃទី៣០ ខែសីហា ក្រោយកាន់តំណែងថ្មីៗ។ លោក ម៉ូរីសុន រំពឹងថា នឹងប្រកាសកិច្ចព្រមព្រៀងសេដ្ឋកិច្ចទ្វេភាគីរវាងសមាជិកនៃក្រុមប្រទេសមានសេដ្ឋកិច្ចរីកចម្រើនទាំង២០ របស់ពិភពលោក។ កិច្ចព្រមព្រៀងនេះ នឹងជំរុញទំនាក់ទំនងផ្នែកនយោបាយរវាងប្រទេសទាំងពីរ ក៏ដូចជាទំនាក់ទំនងផ្នែកពាណិជ្ជកម្ម និងការពង្រីកទីផ្សារផង។
ទើបក្លាយជានាយករដ្ឋមន្ត្រីថ្មីរបស់អូស្ត្រាលី លោក ស្កុត ម៉ូរីសុន បានជ្រើសរើសបងធំអាស៊ានឥណ្ឌូណេស៊ី ជាទិសដៅមុនគេនៃដំណើរទស្សនកិច្ចនៅបរទេស។ អាចថា មិនមែនជារឿងចម្លែកទេដែលលោក ម៉ូរីសុន ជ្រើសរើសឥណ្ឌូណេស៊ី ដោយលោកនិយាយមុនទស្សនកិច្ចនេះថា ជាការឲ្យតម្លៃលើទំនាក់ទំនងទ្វេភាគី និងការប្ដេជ្ញាចិត្តរបស់រដ្ឋាភិបាលអូស្ត្រាលីថ្មីក្នុងការពង្រឹងកិច្ចសហប្រតិបត្តិការសេដ្ឋកិច្ច និងសន្តិសុខ។
អ្វីគួរឲ្យចាប់អារម្មណ៍ លោក ម៉ូរីសុន និងប្រធានាធិបតីឥណ្ឌូណេស៊ី ចូកូ វីដូដូ ត្រូវរំពឹងថា នឹងប្រកាសបញ្ចប់កិច្ចព្រមព្រៀងពាណិជ្ជកម្មទ្វេភាគីផង។ យោងតាមសារព័ត៌មាន Financial Review មន្ត្រីក្រុងកង់ប៉េរ៉ា និងក្រុងហ្សាការតាបានបញ្ចប់ការចរចាហើយកាលពីសប្ដាហ៍មុន ឯកិច្ចព្រមព្រៀងក៏មានរួចដែរ។ កិច្ចព្រមព្រៀងនេះ នឹងបើកឱកាសឲ្យអូស្ត្រាលីអាចបើកសាកលវិទ្យាល័យនៅទឹកដីឥណ្ឌូណេស៊ី ហើយឥណ្ឌូណេស៊ីក៏បង្កើនការនាំចេញសាច់គោទៅទីផ្សារអូស្ត្រាលី។
ចាប់ផ្ដើមចរចានៅឆ្នាំ២០១០ កិច្ចព្រមព្រៀងនេះបានជួបឧបសគ្គជាច្រើនរហូតជាប់គាំង មុននឹងមានដង្ហើមឡើងវិញនៅឆ្នាំ២០១៦ ។ ចរន្តគាំពារនិយមនៅឥណ្ឌូណេស៊ី បានក្លាយជាកម្លាំងរាំងស្ទះដល់ការចរចា បន្ថែមពីលើកត្តាដែលឥណ្ឌូណេស៊ីមិនមែនជាប្រទេសដែលសកម្មក្នុងការចរចាពាណិជ្ជកម្មផងនោះ។ សម្រាប់ឥណ្ឌូណេស៊ី កិច្ចព្រមព្រៀងភាគច្រើនឆ្លងកាត់សមាគមអាស៊ាន លើកលែងកិច្ចព្រមព្រៀងឆ្នាំ២០០៨ ជាមួយជប៉ុនប៉ុណ្ណោះ។
ដំណើរទស្សនកិច្ចរបស់លោក ម៉ូរីសុន នៅឥណ្ឌូណេស៊ី ក៏ជាផ្នែកមួយនៃការពង្រឹងទំនាក់ទំនងពាណិជជ្ជកម្មតម្លៃ១៦ពាន់លានដុល្លារដែលសម្រេចបានអំឡុងរដ្ឋាភិបាលអតីតនាយករដ្ឋមន្ត្រី ម៉ាល់ខម ធើនប៊ូល ជាមួយនឹងលោក វីដូដូ ។ លោក ម៉ូរីសុន បញ្ជាក់ថា អូស្ត្រាលី និងឥណ្ឌូណេស៊ី មានទីតាំងភូមិសាស្ត្រក្បែរគ្នា ទំនាក់ទំនងប្រវត្តិសាស្ត្រស៊ីជម្រៅ ហើយទំនាក់ទំនងជិតស្និទ្ធលើគ្រប់វិស័យនឹងធ្វើឲ្យប្រទេសទាំងពីរកាន់តែខ្លាំង សុវត្ថិភាព និងរីកចម្រើន។
ក្រៅពីកិច្ចព្រមព្រៀងពាណិជ្ជកម្មសេរី អូស្ត្រាលី និងឥណ្ឌូណេស៊ី ទំនងជាប្រកាសបង្កើតទំនាក់ទំនងភាពជាដៃគូយុទ្ធសាស្ត្រផងអំឡុងទស្សនកិច្ចរបស់លោក ម៉ូរីសុន ដែលកាន់តំណែងបានទើបមួយសប្ដាហ៍។ វានឹងក្លាយជាបង្កើនទំនាក់ទំនងការទូតដល់កម្រិតមួយខ្ពស់ ដែលនាំឲ្យមានជំនួបថ្នាក់ខ្ពស់រវាងរដ្ឋមន្ត្រីប្រទេសទាំងពីរផងដែរ។ នៅអាស៊ាន អូស្ត្រាលីទើបបង្កើតទំនាក់ទំនងយុទ្ធសាស្ត្រជាមួយវៀតណាមកាលពីខែមីនាកន្លងទៅ៕
Tag:
អូស្ត្រាលី
ឥណ្ឌូណេស៊ី
ស្កុត ម៉ូរីសុន
ចូកូ វីដូដូ
© រក្សាសិទ្ធិដោយ thmeythmey.com