នាយករដ្ឋមន្ត្រីអ៊ីស្រាអែល៖ មជ្ឈិមបូព៌ាសម្រាប់តែអ្នកខ្លាំង ឯអ្នកទន់ខ្សោយនឹងត្រូវបាត់រូប

អន្តរជាតិ

នាយករដ្ឋមន្ត្រីអ៊ីស្រាអែល៖ មជ្ឈិមបូព៌ាសម្រាប់តែអ្នកខ្លាំង ឯអ្នកទន់ខ្សោយនឹងត្រូវបាត់រូប

30, Aug 2018 , 7:39 pm

រូបភាព

នាយករដ្ឋមន្រ្តីអ៊ីស្រាអែល បេនចាមីន ណេតាន់យ៉ាហ៊ូ (រូបភាព Xinhua)

ដោយ: តន ចាន់រិទ្ធារ៉ា

នៅថ្ងៃទី២៩ ខែសីហា នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ គំរាមវាយប្រហារលើកម្លាំងទ័ពអ៊ីរ៉ង់នៅស៊ីរី ក្រោយអ៊ីរ៉ង់ និងស៊ីរីចុះកិច្ចព្រមព្រៀងលើវិស័យការពារជាតិរួចមក។ អ៊ីស្រាអែល មិនពេញចិត្តឡើយនឹងវត្តមានយោធាអ៊ីរ៉ង់នៅទឹកដីស៊ីរី ព្រោះជាការគំរាមសន្តិសុខរបស់ខ្លួន។ លោក ណេតាន់យ៉ាហ៊ូ ក៏បានព្រមានដែរថា នៅតំបន់មជ្ឈិមបូព៌ា គ្មានទីតាំងឈរជើងសម្រាប់ប្រទេសដែលទន់ខ្សោយឡើយ។

លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ នៅថ្ងៃទី២៩ ខែសីហា បានទៅចូលរួមពិធីប្ដូរឈ្មោះរោងចក្រនុយក្លេអ៊ែរ Negev នៅ Dimona ដោយដាក់ឈ្មោះតាមអតីតនាយករដ្ឋមន្ត្រី Shimon Peres ។ ពីទីនោះ លោក ណេតាន់យ៉ាហ៊ូ បាននិយាយគំរាមអ៊ីរ៉ង់ និងស៊ីរី ដែលទើបចុះកិច្ចព្រមព្រៀងលើកិច្ចសហប្រតិបត្តិការវិស័យការពារជាតិ។ លោកក៏និយាយអួតអាងពីសមត្ថភាពរបស់អ៊ីស្រាអែលយោធាដែលមាននុយក្លេអ៊ែរក្នុងឃ្លាំងរបស់ខ្លួន។

ដោយរំឭកការប្រឹងប្រែងរបស់លោក Peres ដើម្បីបង្កើតសន្តិភាព លោក ណេតាន់យ៉ាហ៊ូ បញ្ជាក់ថា សន្តិភាពអាចសម្រេចបានលុះត្រាតែអ៊ីស្រាអែលអាចបង្កើតអាវុធការពារខ្លួន។ និយាយដល់បញ្ហានេះ ប្រមុខរដ្ឋាភិបាលអ៊ីស្រាអែលរូបនេះលើកឡើងតាមរយៈ Twitter ផ្លូវការរបស់ខ្លួនថា នៅមជ្ឈិមបូព៌ា និងនៅកន្លែងដទៃទៀតលើពិភពលោក មានការពិតដូចគ្នាមួយ គឺគ្មានកន្លែងសម្រាប់ប្រទេសទន់ខ្សោយឡើយ។

«ប្រទេសខ្សោយនឹងវិនាសខ្ទេចខ្ទី និងត្រូវគេលុបចេញពីប្រវត្តិសាស្ត្រ ស្របពេលដែលប្រទេសខ្លាំង ទោះល្អឬអាក្រក់ នឹងមានជីវិត។ ប្រទេសខ្លាំងនឹងទទួលបានការគោរព ហើយអាចបង្កើតមិត្តភក្តិខ្លាំងៗបាន ហើយចុងបញ្ចប់ទៅ សន្តិភាពមានតែជាមួយប្រទេសខ្លាំងប៉ុណ្ណោះ»។ នេះជាការបកស្រាយរបស់លោក ណេតាន់យ៉ាហ៊ូ ។ ដោយចង់សំដៅអ៊ីរ៉ង់ នាយករដ្ឋមន្ត្រីអ៊ីស្រាអែលរូបនេះបន្តថា សត្រូវរបស់អ៊ីស្រាអែលដឹងពីសមត្ថភាពរបស់អ៊ីស្រាអែល គឺអ្នកណាចង់ធ្វើបានអ៊ីស្រាអែល នឹងរងការវាយបកវិញ។

The weak crumble, are slaughtered and are erased from history while the strong, for good or for ill, survive. The strong are respected, and alliances are made with the strong, and in the end peace is made with the strong.
— PM of Israel (@IsraeliPM) August 29, 2018

អ៊ីស្រាអែល និងអ៊ីរ៉ង់ គឺជាសត្រូវស៊ីសាច់ឈាមនៅតំបន់មជ្ឈិមបូព៌ា ហើយជារឿយៗតែងគំរាមកម្ទេចគ្នាទៅវិញទៅមក។ គូប្រជែងទាំងពីរ ក៏សុទ្ធតែបានពង្រឹងសមត្ថភាពយោធារៀងៗខ្លួនដែរ ដោយអ៊ីស្រាអែលមានដល់អាវុធនុយក្លេអ៊ែរឯណោះ ខណៈអ៊ីរ៉ង់ក៏បាននុយក្លេអ៊ែរ តែបានផ្អាកកម្មវិធីនេះសិនក្រោមកិច្ចព្រមព្រៀងជាមួយមហាអំណាច៦ប្រទេសទៀតក្នុងឆ្នាំ២០១៥ ។ ប៉ុន្តែអ៊ីស្រាអែលបានបញ្ចុះបញ្ចូលឲ្យអាមេរិកដើរចេញ ដែលធ្វើកិច្ចព្រមព្រៀងដ៏សំខាន់នេះរកកល់នឹងដួលទៅហើយ។

បន្ថែមពីលលើនេះ វត្តមានយោធាអ៊ីរ៉ង់នៅស៊ីរី កំពុងតែធ្វើឲ្យអ៊ីស្រាអែលមិនសប្បាយចិត្ត ព្រោះមានន័យថា អ៊ីរ៉ង់ចូលកាន់តែកៀកអ៊ីស្រាអែលទៅហើយ។ ប្រមុខរដ្ឋាភិបាលអ៊ីស្រាអែលរូបនេះ បានប្រតិកម្មខ្លាំងៗប្រឆាំងកិច្ចព្រមព្រៀងរវាងក្រុងតេហេរ៉ង់ និងក្រុងដាម៉ាស់ ដែលបន្តពេលស្នាក់នៅរបស់ទាហានអ៊ីរ៉ង់។ លោក ណេតាន់យ៉ាហ៊ូ បានព្រមានថា កិច្ចព្រមព្រៀងនេះមិនអាចធ្វើឲ្យអ៊ីស្រាអែលញញើតឡើយ៕