អន្តរជាតិ
លោក ម៉ាក្រុង ស្នើឲ្យអន្តរជាតិមានជំហររួមនិងរឹងមាំ ដើម្បីជួយដោះស្រាយវិបត្តិលីប៊ី ប្រធានាធិបតីបារាំង អេម៉ានុយអែល ម៉ាក្រុង (រូបភាព AFP)
× ប្រធានាធិបតីបារាំង អេម៉ានុយអែល ម៉ាក្រុង នៅថ្ងៃទី៦ ខែកញ្ញា បានទាមទារឲ្យសហគមន៍អន្តរជាតិមានជំហររឹងមាំ និងរួមគ្នាដើម្បីជួយដោះស្រាយវិបត្តិនៅលីប៊ី។ លីប៊ី ដែលធ្លាប់មានឈ្មោះជាប្រទេសរីកចម្រើនមួយនៅអាហ្វ្រិកប៉ែកខាងជើង នោះបានធ្លាក់ចូលវិបត្តិនយោបាយដ៏ជ្រៅ ក្រោយការដួលរលំរបបដឹកនាំលោក មូអាម៉ា ហ្កាដាហ្វី កាលពីឆ្នាំ២០១១ ។ លីប៊ីតែមួយបានបែកខ្ញែកទៅជាចម្រៀកស្ថិតក្រោមការគ្រប់គ្រងដោយយោធាធំៗពីរផ្សេងគ្នា និងវាយប្រយុទ្ធជាញឹកញយទៀតផង។
ក្រោយការដួលរលំរបស់របបមេដឹកនាំផ្ដាច់ការ ម៉ូអាម៉ា ហ្គាដាហ្វី នៅឆ្នាំ២០១១ លីប៊ី ដែលធ្លាប់តែសុខសាន្តត្រាននោះ បានជួបបញ្ហាមិនចេះចប់។ សកម្មជនជាច្រើនក្រុម និងក្រុមភេរវជនផងនោះ បានវាយប្រយុទ្ធគ្នាដណ្ដើមត្រួតត្រាទីក្រុងធំៗរបស់រដ្ឋអាហ្វ្រិកខាងជើងមួយនេះ។ វិបត្តិមួយនេះចេះតែបន្តផុងជ្រៅ ទោះជាមានអន្តរាគមន៍ពីប្រទេសក្នុងតំបន់ដូចជាកាតា តួកគី អេហ្ស៊ីប និងមហាអំណាចធំៗដូចជាបារាំង អាមេរិក និងអង់គ្លេសជាដើម។
ដោយមើលឃើញពីស្ថានភាពមិនល្អ ប្រធានាធិបតីបារាំង អេម៉ានុយអែល ម៉ាក្រុង បានទាមទារឲ្យអន្តរជាតិពួតដៃដើម្បីដោះស្រាយវិបត្តិរ៉ាំរ៉ៃមួយនេះ។ នៅថ្ងៃទី៦ ខែកញ្ញា លោក ម៉ាក្រុង បានជជែកជាមួយនាយករដ្ឋមន្ត្រីលីប៊ីគាំទ្រដោយអង្គការសហប្រជាជាតិ Fayez Serraj ជុំវិញស្ថានការណ៍នៅលីប៊ី ដែលមានការប្រយុទ្ធថ្មីៗនេះ។ លោក ម៉ាក្រុង ក៏បានថ្កោលទោសការវាយប្រហារលើជនស៊ីវិល និងស្ថាប័នរដ្ឋនានាផង។
យោងតាមទីភ្នាក់ងារព័ត៌មាន Xinhua ប្រធានាធិបតីបារាំងក៏បានសន្យាប្រឹងប្រែងក្នុងប៉ុន្មានសប្ដាហ៍ខាងមុខដើម្បីសម្រេចបានគោលដៅបី គឺការប្រយុទ្ធប្រឆាំងភេរវករ ការគ្រប់គ្រងលំហូរជនអន្តោប្រវេសន៍ និងអនុវត្តរបៀបវារៈនយោបាយ ក៏ដូចជាដំណើរការបោះឆ្នោត ព្រមគ្នានឹងការគោរពសិទ្ធិមនុស្សនិងសេរីភាពជាមូលដ្ឋាន។ ឯលោក Serraj វិញ ស្នើឲ្យអន្តរជាតិមានជំហរឲ្យមុតមាំចំពោះលីប៊ី និងកាត់ទោសអ្នកបង្អាក់ដំណើរទៅមុខនៅលីប៊ីដែរ។
សូមបញ្ជាក់ថា នៅប៉ុន្មានថ្ងៃមកនេះ ការវាយប្រយុទ្ធបានផ្ទុះឡើងក្នុងទីក្រុងទ្រីប៉ូលីរវាងកម្លាំងរដ្ឋាភិបាលដែលអន្តរជាតិទទួលស្គាល់ និងសកម្មជនប្រយុទ្ធមកពីកងពលទី៧ ដែលមានទីតាំងនៅទីក្រុង Tarhuna ចម្ងាយជាង៨០គីឡូម៉ែត្រភាគអាគ្នេយ៍ក្រុងទ្រីប៉ូលី។ នៅថ្ងៃទី៦ ខែកញ្ញា បេសកកម្មអង្គការសហប្រជាជាតិប្រចាំលីប៊ីប្រកាសថា ភាគីប្រយុទ្ធទាំងអស់បានចុះបទឈប់បាញ់ដើម្បីបញ្ចប់ជម្លោះ ដែលសម្លាប់មនុស្ស៦៣នាក់ របួស១៥៩នាក់ និងជិតពីរពាន់គ្រួសារភៀសខ្លួន។
តាមពិតទៅ ក្រោយរបបលោក ហ្កាដាហ្វី ដួលរលំទៅ លីប៊ីមិនដែលស្គាល់ក្ដីសុខឡើយ។ លោក ហ្កាដាហ្វី ដែលក្ដាប់អំណាចជិត៤២ឆ្នាំ ត្រូវបានបញ្ចប់ជីវិតដោយក្រុមឧទ្ទាមប្រឆាំងរដ្ឋាភិបាលក្នុងឆ្នាំ២០១១ ក្រោមជំនួយរបស់សម្ព័ន្ធយោធាណាតូ ដែលមានអាមេរិក អង់គ្លេស និងបារាំង ជាអ្នកដឹកនាំប្រតិបត្តិការយោធា៕
Tag:
បារាំង
លីប៊ី
អេម៉ានុយអែល ម៉ាក្រុង
© រក្សាសិទ្ធិដោយ thmeythmey.com