អន្តរជាតិ
×![]()
ខណៈដែលឆ្នាំ ២០១៩ ចូលមកដល់ ធនាគារពិភពលោក បានចេញរបាយការណ៍មួយស្តី «ពិភពលោកឆ្នាំក្នុង២០១៨»។ ក្នុងរបាយការណ៍នេះ អង្គការអន្តរជាតិដ៏ធំមួយនេះ បានពណ៌នាអំពីបញ្ហាដែលពិភពលោកកំពុងជួបប្រទះ ព្រមទាំងដំណោះស្រាយផងដែរ។ ចំណុចខាងក្រោមនេះជាអ្វី ដែលធនាគារពិភពលោកបានលើកឡើង។
១. ប្រជាជនប្រមាណ៦៨,៥លាននាក់ ត្រូវបានបង្ខំឲ្យផ្លាស់ប្តូរទីតាំងរស់នៅ
ចំនួនមនុស្សជាច្រើននៅទូទាំងពិភពលោក ត្រូវបានបង្ខំឲ្យផ្លាស់ប្តូរទីតាំងរស់នៅ ដោយសារតែ ការធ្វើទុក្ខបុកម្នេញ (ភាគច្រើនកើតឡើងដោយសារជំនឿសាសនា, ពូជសាសន៍, នយោបាយ), ជម្លោះ ឬអំពើហិង្សាជាដើម។ យោងតាមភ្នាក់ងារជនភៀសខ្លួនរបស់អង្គការសហប្រជាជាតិ មនុស្សប្រមាណ៤០លាននាក់ បានសម្រេចចិត្តរស់នៅបន្តក្នុងប្រទេសរបស់ពួកគេ រីឯមនុស្សប្រមាណ ២៥, ៤លាននាក់ផ្សេងទៀត បានចាកចេញទៅរស់នៅបរទេស។ ប្រមាណ៨៥ភាគរយនៃជនភៀសខ្លួនពិភពលោកទាំងនោះ ត្រូវបានផ្លាស់ទីទៅកាន់បណ្តាប្រទេសកំពុងអភិវឌ្ឍ ក្នុងឆ្នាំ២០១៧។
២. ៩១ភាគរយនៃប្រជាជនពិភពលោក កំពុងរស់នៅក្នុងទីកន្លែង ដែលមានគុណភាពខ្យល់មិនល្អ
មនុស្ស៩នាក់ក្នុងចំណោម១០នាក់នៅទូទាំងពិភពលោក កំពុងស្រូបយកខ្យល់បំពុល។ នេះបើតាមទិន្នន័យរបស់អង្គការសុខភាពពិភពលោក (WHO) ដែលគ្របដណ្តប់ទីក្រុងចំនួន ៤៣០០ នៅក្នុងប្រទេសចំនួន ១០៨។ ទិន្នន័យដដែលបង្ហាញថា កម្រិតខ្យល់បំពុលខ្ពស់បំផុតគឺស្ថិតនៅក្នុងតំបន់មេឌីទែរ៉ាណេខាងកើត និងតំបន់អាស៊ីអាគ្នេយ៍ ដោយមានកម្រិតបំពុល៥ដងលើសពីកម្រិតកំណត់របស់អង្គការ WHO ។ អង្គការ WTOបានប៉ាន់ស្មានថា ប្រជាជនចំនួន៧លាននាក់បាត់បង់ជីវិតជារៀងរាល់ឆ្នាំ ដោយសារតែខ្យល់បំពុល ដោយក្នុងនោះ ៩០ភាគរយនៃអ្នកស្លាប់គឺនៅក្នុងបណ្តាប្រទេសមានប្រាក់ចំណូលទាប និងមធ្យម។
៣. ៣៣ភាគរយនៃសំរាមនៅទូទាំងពិភពលោក ពុំត្រូវបានចាត់ចែងឲ្យបានត្រឹមត្រូវ
ការគ្រប់គ្រងសំរាមនៅបណ្តាប្រទេសមានប្រាក់ចំណូលទាប ពុំត្រូវបានធ្វើឡើងឲ្យត្រឹមត្រូវនោះទេ។ តួយ៉ាង ក្នុងបណ្តាប្រទេសមានប្រាក់ចំណូលទាប ៩៣ភាគរយនៃសំរាមត្រូវបានដុតចោល ឬបោះចោលយ៉ាងអនាធិបតេយ្យនៅលើដងផ្លូវ ឬមាត់ទឹក បើធៀបទៅនឹងប្រទេសមានប្រាក់ចំណូលខ្ពស់មានត្រឹមតែ២ភាគរយប៉ុណ្ណោះ។ នៅទូទាំងពិភពលោក សំរាមរឹងបានប៉ះពាល់យ៉ាងធ្ងន់ធ្ងរ ដល់ការប្រែប្រួលអាកាសធាតុ និងជាប្រភពដ៏ធំបំផុតមួយនៃការបំពុលទឹកសមុទ្រ។ យោងតាមរបាយការណ៍មួយចំណងជើង What A Waste 2.0 ក្នុងឆ្នាំ២០១៦ ពិភពលោក បានបង្កើតសំរាមផ្លាស្ទិកដល់ទៅជាង ២៤២លានតោន។
៤. ប្រាក់កម្ចីបណ្តាប្រទេសមានប្រាក់ចំណូលទាប និងមធ្យម បានកើនឡើងរហូតជាង៣ដង
ប្រាក់កម្ចីរបស់បណ្តាប្រទេសមានប្រាក់ចំណូលទាប និងមធ្យមបានហក់ឡើងដល់ ៦០៧ពាន់លានដុល្លារ ក្នុងឆ្នាំ២០១៧ ដែលកើនឡើងចំនួន ១៨១ ពាន់លានដុល្លារកាលពីឆ្នាំ២០១៦ ពោលគឺជាកម្រិតខ្ពស់បំផុតក្នុងរយៈពេល៣ឆ្នាំចុងក្រោយនេះ។ នេះបើតាមទិន្នន័យរបស់អង្គការស្ថិតិបំណុលអន្តរជាតិ។ កំណើននៃបំណុលរបស់បណ្តាប្រទេសមានប្រាក់ចំណូលទាប និងមធ្យមនេះ បានបង្កជាក្តីបារម្ភទៅដល់បំណុលពិភពលោកសរុប ដែលត្រូវបានគេប៉ាន់ស្មានថា មានចំនួន៦០ភាគរយ លើសពីពេល ដែលពិភពលោកបានប្រឈមមុខនឹងវិបត្តិហិរញ្ញវត្ថុឆ្នាំ២០០៨ទៅទៀត។
កម្រិតបំណុលដ៏ខ្ពស់ រួមបញ្ចូលនឹងភាពតានតឹងផ្នែកពាណិជ្ជកម្មនាពេលថ្មីៗនេះផង បានបង្កើនហានិភ័យកាន់តែខ្លាំងបន្ថែមទៀត សម្រាប់កំណើនសេដ្ឋកិច្ចសកល និងការកាត់បន្ថយភាពក្រីក្រ។ បច្ចុប្បន្ននេះ ធនាគារពិភពលោក កំពុងធ្វើការជាមួយបណ្តាប្រទេសផ្សេងៗទៀត ក្នុងគោលដៅជួយចាត់ចែងកម្រិតបំណុល និងពង្រឹងសេដ្ឋកិច្ចរបស់ប្រទេសទាំងនោះ ដោយទាក់ទាញការវិនិយោគវិស័យឯកជន និងបង្កើនការប្រើប្រាស់បច្ចេកវិទ្យាទំនើប។
៥.ក្នុងឆ្នាំ២០៥០ ៩០ភាគរយនៃកំណើនប្រជាជនទីក្រុងរបស់ពិភពលោក នឹងកើតឡើងក្នុងបណ្តាប្រទេសកំពុងអភិវឌ្ឍ
ក្នុងឆ្នាំ១៩៦០ មួយភាគបីនៃប្រជាជនពិភពលោកបានរស់នៅក្នុងទីក្រុង។ បច្ចុប្បន្ននេះ ក្នុងឆ្នាំ២០១៨ ភាគរយនៃប្រជាជនទីក្រុងបានកើនឡើងដល់៥៥ភាគរយ ហើយការចំណាកស្រុកទៅកាន់ទីក្រុងចេះតែបន្ត ដោយសារតែ ប្រជាជនស្វះស្វែងរកការងារធ្វើ, ការអប់រំ និងឱកាស។ ចន្លោះពីឆ្នាំ២០១៨ និងឆ្នាំ២០៥០ ៩០ភាគរយនៃកំណើនប្រជាជនទីក្រុងរបស់ពិភពលោក នឹងធ្វើឡើងនៅក្នុងបណ្តាប្រទេសកំពុងអភិវឌ្ឍ ដូចជា តំបន់អាហ្វ្រិក និងតំបន់អាស៊ី ជាពិសេស អាស៊ីខាងត្បូង។
តំបន់ទីក្រុងបង្កើត ៨០ភាគរយនៃទ្រព្យសម្បត្តិសកលលោក ប៉ុន្តែពួកគេប្រើប្រាស់ជិតពីរភាគបីនៃថាមពលពិភពលោក និងរ៉ាប់រងជាង ៧០ភាគរយនៃការបញ្ចេញឧស្ម័នផ្ទះកញ្ចក់ពិភពលោកសរុប។ ធនាគារពិភពលោកបានធ្វើការវិនិយោគជាមធ្យមប្រមាណ ៦ពាន់លានដុល្លារក្នុងគម្រោងអភិវឌ្ឍន៍ទីប្រជុំជន ជារៀងរាល់ឆ្នាំ ជាមួយដៃគូ ក្នុងគោលបំណងបង្កើតបណ្តាញទីក្រុងដែលមានហិរញ្ញវត្ថុគ្រប់គ្រាន់, រឹងមាំ និងឆ្លាតវៃផ្នែកអាកាសធាតុ។
៦. ក្មេងៗលូតលាស់ពុំបានល្អ ដោយសារការរស់នៅកង្វះអនាម័យ
មនុស្សជាង២,៦ពាន់លាននាក់ ពុំទទួលបានការប្រើប្រាស់បង្គន់អនាម័យបានត្រឹមត្រូវ ឬប្រភពទឹកស្អាតសម្រាប់ប្រើប្រាស់ឬទទួលទាននោះទេ។ អនាម័យមិនល្អ បានបណ្តាលឲ្យជីវិតប្រមាណ១,៦លាននាក់បាត់បង់ជារៀងរាល់ឆ្នាំ និងបង្កឲ្យក្មេងៗជាច្រើនលាននាក់ មានការលូតលាស់ពុំបានល្អថែមទៀតផង។ នៅទូទាំងពិភពលោក ក្មេងៗជាង ១៥០លាននាក់មានការលូតលាស់ពុំបានល្អ ដោយសារតែ កង្វះខាតការលូតលាស់ពីកំណើត ដ្បិតពុំទទួលបានការថែទាំឲ្យបានដិតដល់ពីម្តាយនិងកង្វះអាហារូបត្ថម្ភជាដើម។ ធនាគារពិភពលោក បានចាប់ដៃគូជាមួយមូលនិតិ Bill & Melinda Gates ដើម្បីបង្កើតបច្ចេកវិទ្យាឈានមុខមួយ ក្នុងគោលបំណងនាំយកភាពស្អាត និងមានអនាម័យដល់មនុស្សគ្រប់គ្នា៕
Tag:
ធនាគារពិភពលោក
របាយការណ៍
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
