ជាតិ
២៥ខេត្ត/រាជធានី
ស.ស.ក និងអង្គការដៃគូ ប្រកាសផ្តល់ជំនួយខ្នាតតូចដល់សហគមន៍កសិកម្ម ![](https://image.thmeythmey.com/pictures/2019/01/27/31229903_443258132790046_1879528979229048832_n.jpg)
×![]()
សមាគមសម្របសម្រួលសេដ្ឋកិច្ចសហគមន៍កសិកម្ម ហៅកាត់ថា ស.ស.ក (Facilitation Association of Economy for Cooperatives - FAEC) បានប្រកាសផ្តល់ថវិកា២៥០០ដុល្លារ ជូនអង្គការកសិករណាដែលមានគោលដៅជាក់លាក់ ក្នុងការពង្រីកអាជីវកម្មក្នុងវិស័យកសិកម្មរបស់ខ្លួន។
លោក ច័ន្ទ សុធា ប្រធានស.ស.ក បានប្រាប់សារព័ត៌មានថ្មីៗថា ស្ថាប័នខ្លួនកំពុងសហការអនុវត្តកម្មវិធីសហប្រតិបត្តិការរយៈពេលមធ្យម ដំណាក់កាលទី២ (MTCP-2) ក្រោមការឧបត្ថម្ភពីសហភាពអឺរ៉ុប តាមរយៈ IFAD និង AFA ដែលនឹងផ្តល់ឱកាសពង្រីកអាជីវកម្ម បង្កើនចំណូលទៅដល់កសិករ។ លោក ច័ន្ទ សុធា បញ្ជាក់ដូច្នេះ៖«ថវិកានេះផ្តល់ជូនអង្គការកសិករណាដែលមានគោលដៅជាក់លាក់ ក្នុងការពង្រីកអាជីវកម្ម ក្នុងវិស័យកសិកម្មដែលមានស្រាប់ ហើយអង្គការកសិករនោះត្រូវមានរចនាសម្ព័ន្ធដឹកនាំត្រឹមត្រូវស្របតាមគោលការណ៍អភិបាលកិច្ចល្អ និងមានផែនការអាជីវកម្មច្បាស់លាស់»។
តាមប្រធាន ស.ស.ក កម្មវិធីសហប្រតិបត្តិការរយៈពេលមធ្យមដំណាក់កាលទី១ បានបង្រៀនអង្គការកសិករ ឲ្យយល់ដឹងពីការគ្រប់គ្រង, ដឹកនាំ, និងផែនការអាជីវកម្ម និងគ្មានការប្រកួតយកថវិកាជំនួយដូចលើកនេះនោះទេ។
សម្រាប់ពាក្យសុំ និងព័ត៌មានផ្សេងៗ ពីការប្រកួតប្រជែងយកថវិកាចំនួន២៥០០ដុល្លារនេះ ប្រើប្រាស់ អាចទាក់ទងទៅកាន់ការិយាល័យ ស.ស.ក។ ក្រុមការងារនឹងចុះទៅវាយតម្លៃដោយផ្ទាល់ដល់ស្ថាប័នអង្គការកសិករដែលបានដាក់ពាក្យស្នើសុំថវិកានេះ មុននឹងសម្រេចផ្តល់ ឬមិនផ្តល់។ នេះបើតាម លោក ច័ន្ទ សុធា៕
Tag:
កសិករ
កសិកម្ម
អាជីវកម្ម
អង្គការ
© រក្សាសិទ្ធិដោយ thmeythmey.com