ផេឡូស៊ី៖«ខ្ញុំមិនគាំទ្រនីតិវិធីដកហូតតំណែងប្រធានាធិបតី ដ្បិតលោក ត្រាំ គ្មានតម្លៃគ្រប់គ្រាន់ឡើយ»

អន្តរជាតិ

ផេឡូស៊ី៖«ខ្ញុំមិនគាំទ្រនីតិវិធីដកហូតតំណែងប្រធានាធិបតី ដ្បិតលោក ត្រាំ គ្មានតម្លៃគ្រប់គ្រាន់ឡើយ»

12, Mar 2019 , 8:59 pm

រូបភាព

ដោយ: ថ្មីៗ

ប្រធានសភាលោកស្រី ណាន់ស៊ី ផេឡូស៊ី បានបញ្ជាក់ថា លោកស្រីមិនគាំទ្រឡើយការអនុវត្តនីតិវិធីដកហូតតំណែងប្រធានាធិបតី ដ្បិតវានឹងធ្វើឲ្យមានការបែកខ្ញែកនយោបាយកាន់តែខ្លាំងក្នុងសង្គមអាមេរិក។ អ្វីដែលសំខាន់មេដឹកនាំបក្សប្រជាធិបតេយ្យរូបនេះអះអាងថា ប្រធានាធិបតី ដូណាល់ ត្រាំ គ្មានតម្លៃគ្រប់គ្រាន់សម្រាប់ការអនុវត្តនីតិវិធីនេះឡើយ។

នីតិវិធីដកហូតតំណែងប្រធានាធិបតីកំពុងក្លាយជាប្រធានបទក្តៅនៅក្នុងនយោបាយអាមេរិក ខណៈដែលការយុទ្ធនាការបោះឆ្នោតប្រធានាធិបតីកាន់តែខិតជិតមកដល់។ ប៉ុន្តែប្រធានសភាតំណាងលោកស្រី ណាន់ស៊ី ផេឡូស៊ី បានប្រកាសច្បាស់ហើយថា បក្សប្រជាធិបតីមិនចាប់ផ្តើមនីតិវិធីដកហូតតំណែងប្រធានាធិបតីលោក ដូណាល់ ត្រាំឡើយ។

ក្នុងបទសម្ភាសន៍ជាមួយសារព័ត៌មាន Washington Post លោកស្រី ផេឡូស៊ី បានពន្យល់ថា នីតិវិធីដកហូតតំណែងប្រធានាធិបតីជារឿងមួយដ៏ចម្រូងចម្រាស និងធ្វើឲ្យសង្គមអាមេរិកកាន់តែបែកខ្ញែកខ្លាំងខាងផ្នែកនយោបាយថែមទៀត។ ផេឡូស៊ី បានលើកយកការប្រើប្រាស់នីតិវិធីដកហូតតំណែងប្រធានាធិបតី ប៊ីល គ្លីនតុន នៅឆ្នាំ ១៩៩៨ ដែលបានបរាជ័យនៅព្រឹទ្ធសភាកាលនោះ ជាឧទាហរណ៍ដែរ។

លោកស្រីនិយាយបែបនេះ៖ « ខ្ញុំមិនគាំទ្រនីតិវីធីនេះឡើយ។ ការដកហូតតំណែងប្រធានាធិបតីធ្វើឲ្យមានភាពប្រេះឆាក្នុងសង្គមយើងកាន់តែខ្លាំង ប្រសិនជាមិនមានការចាំបាច់ខ្លាំង និងមិនត្រូវបានធ្វើឡើងដោយមានការគាំទ្រពីបក្សទាំងពីរទេនោះ។ ខ្ញុំមិនគិតថាយើងគួរដើរលើផ្លូវនេះទេព្រោះវាធ្វើឲ្យមានការប្រទេសយើងបែកបាក់គ្នាកាន់តែខ្លាំង»។

«ហើយម្យ៉ាងទៀត ត្រាំ មិនមានតម្លៃគ្រប់គ្រាន់សម្រាប់អនុវត្តនីតីវិធីនេះឡើយ»។ លោកស្រី ផេឡូស៊ី អះអាងបន្ថែមបែបនេះ។

ការលើកឡើងរបស់ប្រធានសភារូបនេះធ្វើឡើង ស្របពេលដែលលោក ត្រាំ និងមនុស្សជំនិតរបស់ខ្លួនប្រឈមមុខនឹងការស៊ើបអង្កើតមួយចំនួនជាពិសេសសំណុរឿងពាក់ព័ន្ធជាមួយការលូកដៃរបស់រុស្ស៊ីក្នុងការបោះឆ្នោតឆ្នាំ ២០១៦ ដែលការស៊ើបអង្កេតដឹកនាំដោយរដ្ឋអាជ្ញាពិសេសលោក Robert Mueller។

ម្យ៉ាងកាលពីចុងខែមុន លោក ត្រាំ ត្រូវអតីតមេធាវីខ្លួនលោក Michael Cohen បកអាក្រាតរឿងអាស្រូវផ្លូវភេទ និងទិតៀនមួយទំហឹងក្នុងពេលដែលខ្លួនផ្ដល់សក្ខីកម្មក្នុងសភា។ លោក Cohen បានហៅលោក ត្រាំ ថាជាមនុស្សបោកប្រាស់ និងប្រព្រឹត្តកំហុសឆ្គងច្រើនថែមទៀត។

ត្រឡប់មកវិញ ថ្វីបើលោកស្រី ផេឡូស៊ី មិនគាំទ្រការដកហូតតំណែងប្រធានាធិបតីក៏ដោយ លោកស្រីបានបង្ហើបថា លោក ត្រាំ មិនសក្តិសមនឹងកាន់តំណែង និងដឹកនាំប្រទេសឡើយទាំងផ្នែកបញ្ញា និងសីលធម៌តែម្តង។