ឌូទើតេ ដាក់ផែនការកម្ចាត់មន្ត្រីខិលខូចដែលប្រព្រឹត្តអំពើពុករលួយបន្ថែម

អន្តរជាតិ

ឌូទើតេ ដាក់ផែនការកម្ចាត់មន្ត្រីខិលខូចដែលប្រព្រឹត្តអំពើពុករលួយបន្ថែម

07, Apr 2019 , 3:59 pm

រូបភាព

រូបភាព៖ ការិយាល័យប្រធានាធិបតីហ្វីលីពីន

ដោយ:

បើមិនមានការប្រែប្រួលនោះទេ នៅសប្តាហ៍ក្រោយ មន្ត្រីជាន់ខ្ពស់របស់រដ្ឋាភិបាលហ្វីលីពីនមួយចំនួន អាចនឹងត្រូវប្រឈមនឹងការបណ្តេញចេញដោយផ្ទាល់ពីលោកប្រធានាធិបតី រ៉ូឌ្រីហ្គោ ឌូទើតេ។ ការបណ្តេញចេញនេះ នឹងកើតឡើងប្រសិនបើ លោកប្រធានាធិបតី ឌូទើតេ រកឃើញថា មន្ត្រីទាំងនោះ បានប្រព្រឹត្តអំពើពុករលួយពិតប្រាកដមែន។

អ្នកនាំពាក្យប្រធានាធិបតីហ្វីលីពីន លោក Salvador Panelo នៅថ្ងៃ៣ មេសា កន្លងទៅបានអះអាងថា លោកប្រធានាធិបតី រ៉ូឌ្រីហ្គោ ឌូទើតេ នឹងជួបសំណេះសំណាលជាមួយនឹងក្រុមអ្នកជំនួញនៅសប្តាហ៍ក្រោយ ហើយលោកប្រធានាធិបតី ក៏នឹងឆ្លៀតឱកាសនោះបណ្តេញមន្ត្រីខិលខូចមួយចំនួនផងដែរ ប្រសិនបើលោក បានទទួលរបាយការណ៍ជាក់លាក់ថាពួកគេ មានជាប់ពាក់ព័ន្ធនឹងអំពើពុករលួយ។

តាមការចុះផ្សាយរបស់សារព័ត៌មានហ្វីលីពីន Philstar អ្នកនាំពាក្យរូបនេះ មិនបានបញ្ជាក់បន្ថែម និងអះអាងពីភាពជាក់លាក់នៃផែនការនេះបានឡើយ ក៏ប៉ុន្តែនៅថ្ងៃ២៦ មីនាកន្លងទៅ លោកប្រធានាធិបតី ក៏បានបញ្ជាក់ស្រដៀងគ្នាថា លោក នឹងបណ្តេញមន្ត្រីមួយចំនួន ដែលយកមុខតំណែងក្នុងរដ្ឋាភិបាលដើម្បីគេងចំណេញផលប្រយោជន៍ផ្ទាល់ខ្លួន។

នាឱកាសនោះ លោកប្រធានាធិបតី បានគូសបញ្ជាក់ថា ប្រទេសរបស់លោក នឹងមិនអាចក្លាយជាប្រទេសអភិវឌ្ឍបានឡើយ ប្រសិនបើអំពើពុករលួយ ការបំពានច្បាប់ និងបញ្ហាសណ្តាប់ធ្នាប់ នៅតែបន្តមាននោះ។ លោក លើកឡើង ត្រង់ៗថា មន្ត្រីហ្វីលីពីន ពិតជាបានប្រព្រឹត្តអំពើពុករលួយទាំងនៅថ្នាក់ជាតិ និងថ្នាក់ក្រោមជាតិ។

លោកប្រធានាធិបតី បានកំណត់សម្គាល់ថា មន្ត្រីពុករលួយ ជានិច្ចកាល ប្រើប្រាស់រូបភាពនៃការផ្តល់អាជ្ញាប័ណ្ណធ្វើអាជីវកម្ម ដើម្បីកំហែងយកប្រាក់ពីប្រជាជន ឬអ្នកជំនួញ។ លោកប្រធានាធិបតី ហាក់ដូចជាដាក់គោលដៅនៃអ្នកប្រព្រឹត្តអំពើពុករលួយខ្លាំងទៅកាន់មន្ត្រីថា្នក់ក្រោមជាតិ ឬថ្នាក់មូលដ្ឋាន ដែលជាអ្នកធ្វើការជាប់ជាមួយនឹងប្រជាជន ដោយលោក អះអាងថា សមាជិកគណៈរដ្ឋមន្ត្រី ដែលគ្រប់គ្រងដោយរូបលោកផ្ទាល់ មិនមានបញ្ហានោះទេ. គួរជម្រាបផងដែរថា ការលុបបំបាត់អំពើពុករលួយចេញពីជួររដ្ឋាភិបាល ក៏ជាគោលនយោបាយអាទិភាពមួយរបស់លោកប្រធានាធិបតី រ៉ូឌ្រីហ្គោ ឌូទើតេ ដូចការបោសសម្អាតគ្រឿងញៀនផងដែរ។ ក្នុងឆ្នាំ២០១៧ និង២០១៨ លោកប្រធានាធិបតី បានបណ្តេញមន្ត្រីរបស់លោកមួយចំនួនពាក់ព័ន្ធនឹងការប្រព្រឹត្តខុសបទបញ្ជា និងជាប់ពាក់ព័ន្ធនឹងអំពើពុករលួយផងដែរ៕