ជាតិ
សេដ្ឋកិច្ច
ក្រសួងស្ដាយចំនួនភ្ញៀវដែលមកតាមនាវាធំៗ ដោយមិនទាន់អាចភ្ជាប់ទៅលេងអង្គរ ភ្ញៀវទេសចរចុះពីនាវាទេសចរណ៍អន្តរជាតិនៅផែព្រះសីហនុ(រូបពីក្រសួង)
× ភ្នំពេញ៖ មន្ត្រីជាន់ខ្ពស់ក្រសួងទេសចរណ៍អះអាងថា ភ្ញៀវអន្តរជាតិភាគច្រើនដែលមកកម្សាន្តតាមនាវាទេសចរណ៍ចូលចតនៅផែព្រះសីហនុ ក៏ចង់ទៅទស្សនារមណីយដ្ឋានអង្គរ ឬកោះផ្សេងៗផងដែរ ប៉ុន្តែមិនមានសេវាដឹកជញ្ជូនតាមផ្លូវអាកាស ដែលអាចវិលវិញទាន់ពេលចាកចេញរបស់នាវា។
បញ្ហានេះត្រូវបានលើកឡើងដោយលោក ហោ សារុន អនុរដ្ឋលេខាធិការក្រសួងទេសចរណ៍ ក្នុងកិច្ចប្រជុំពេញអង្គលើកទី១អាណត្តិទី៦របស់គណៈកម្មការអន្តរក្រសួង នៅថ្ងៃទី៨ខែឧសភា។ លោក ហោ សារុន ត្រូវបានស្រង់សំដី និងសរសេរលើហ្វេសប៊ុកក្រសួងទេសចរណ៍ដូច្នេះថា៖«ភ្ញៀវទេសចរភាគច្រើនមានបំណងទៅទស្សនាតាមកោះនានា និងចង់ជិះយន្តហោះទៅទស្សនាកម្សាន្តនៅប្រាសាទអង្គរវត្ត ដោយវិលល្ងាចឲ្យទាន់ជើងនាវាចេញទៅវិញ ប៉ុន្តែជាការលំបាក នាវាទេសចរណ៍មិនមានម៉ោងកំណត់ជាក់លាក់ ហើយជើងហោះហើរមិនទៀងទាត់»។
ក្រសួងទេសចរណ៍ឲ្យដឹងថា ចំណុចនេះធ្វើឲ្យខាតបង់ដល់កំណើនភ្ញៀវទេសចរដែលទៅទស្សនារមណីយដ្ឋានអង្គរ ដោយសារបញ្ហាការដឹកជញ្ជូនតាមផ្លូវអាកាស និងភាពមិនទៀងទាត់នៃការចាកចេញរបស់នាវាទេសចរណ៍អន្តរជាតិទាំងនោះ។
ក្នុងរយៈពេល៤ខែដើមឆ្នាំ២០១៩នេះ នាវាទេសចរណ៍ចំនួន ៣០គ្រឿង ដោយផ្ទុកទេសចរ ២,៩ម៉ឺននាក់។ ដោយឡែកក្នុងឆ្នាំ២០១៨កន្លងទៅ ការកត់ត្រាចំនួននាវាទេសចរណ៍ចូលចតកំពង់ផែមានចំនួន ៣៧គ្រឿង កើនឡើង២៣ភាគរយ ដែលក្នុងនោះមានភ្ញៀវសរុប ៤ម៉ឺននាក់ កើនឡើង ៥៩ភាគរយ។ នេះបើតាមតួលេខដែលលើកឡើងដោយលោក លូ គឹមឈុន អគ្គនាយកកំពង់ផែស្វយ័តក្រុងព្រះសីហនុ។ លោកបញ្ជាក់ថា ជាមធ្យមនាវាទាំងនោះចូលចតត្រឹមតែ ១៥ម៉ោងប៉ុណ្ណោះ។
រដ្ឋមន្ត្រីក្រសួងទេសចរណ៍ លោក ថោង ខុន មានប្រសាសន៍ថា បញ្ហានេះចាំបាច់ត្រូវដោះស្រាយជាកញ្ចប់ ហើយតម្រូវឲ្យមានការចូលរួមពីគ្រប់ភាគីពាក់ព័ន្ធ រួមទាំងវិស័យឯកជន។ លោកបានណែនាំឲ្យរៀបចំកិច្ចប្រជុំពិសេសមួយជាបន្ទាន់ ដើម្បីរួមគ្នាដោះស្រាយបញ្ហានេះ ពីព្រោះនេះមិនមែនគ្រាន់តែជាឱកាសដែលកម្ពុជាអាចចាប់យកទេសចរជាក្រុមធំៗប៉ុណ្ណោះទេ តែក៏ជាឱកាសនៃការត្រៀមរៀបចំជាម្ចាស់ផ្ទះនៃកិច្ចប្រជុំកំពូលអាស៊ាននៅឆ្នាំ២០២២ ផងដែរ៕
Tag:
នាវាទេសចរណ៍
ថោង ខុន
© រក្សាសិទ្ធិដោយ thmeythmey.com