ជាតិ
ក្រសួងការបរទេស អះអាងពីយកចិត្តទុកដាក់លើនិស្សិតខ្មែរនៅចិនជាប្រចាំ ដោយមិនទុកពួកគេចោលនោះឡើយ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស។ រូបថត AFP
× ក្រសួងការបរទេស និងសហប្រតិបត្តិការអន្តរជាតិ នាយប់ថ្ងៃទី៣ ខែកុម្ភៈ បានចេញសេចក្តីជូនព័ត៌មានមួយដើម្បីអះអាងពីការយកចិត្តទុកដាក់របស់រដ្ឋាភិបាលចំពោះស្ថានការណ៍វិវត្តនៃជំងឺរលាកសួតបង្កដោយមេរោគកូរ៉ូណាប្រភេទថ្មី នៅប្រទេសចិន។ ក្រសួងបានបញ្ជាក់ថា ក្រសួង និងបណ្តាស្ថានតំណាងកម្ពុជានៅចិន បានទាក់ទងយ៉ាងជិតស្និទ្ធជាមួយអាជ្ញាធរចិន ដើម្បីតាមដានបច្ចុប្បន្នភាពពលរដ្ឋខ្មែរ ជាពិសេសនិស្សិតខ្មែរដែលកំពុងសិក្សានៅចិន។
មកដល់បច្ចុប្បន្ន ពុំមានករណីឆ្លងមេរោគនេះលើពលរដ្ឋខ្មែរទេ»។ ក្រសួងការបរទេសបានបញ្ជាក់យ៉ាងដូច្នេះ ដោយមើលឃើញពីការទទួលខុសត្រូវរបស់ភាគីចិន ក៏ដូចជាការអនុវត្ត និងគោរពវិធានការបង្ការយ៉ាងល្អរបស់ក្រុមនិស្សិត។
ក្រៅពីការសហការផ្តល់គ្រឿងបរិក្ខាអនាម័យចាំបាច់នានាដល់និស្សិតខ្មែរ ក្រសួងការបរទេស បានបន្ថែមថា ក្រសួង និងបណ្តាស្ថានតំណាងនៅចិន បានបង្កើតបណ្តាញ WeChat រួមគ្នាជាមួយក្រុមនិស្សិតខ្មែរនៅតាមតំបន់នានាដើម្បីទទួលបានព័ត៌មានទាន់ពេលវេលា។
សម្រាប់អាណាព្យាបាលដែលមានចំងល់ទាក់ទងស្ថានភាពកូនៗរបស់ខ្លួននៅចិន ក៏អាចទាក់ទងសាកសួរមន្ត្រីការបរទេសផងដែរ ក្នុងនោះតាមរយៈលោក ជ័យ រដ្ឋា (០៧៧ ៥៧៥ ៨០៧) លោក យស សុខេមរិន (០១២ ៤៤៥ ៩៥៩) និងលោក ហាន ឧសភា (០៨៩ ៩២១ ៦៥ ៩៩)៕
© រក្សាសិទ្ធិដោយ thmeythmey.com