COVID-19
អន្តរជាតិ
COVID-19៖ ស្ងាត់ជាង២០ថ្ងៃ វៀតណាមរកឃើញ១៧ករណីថ្មី ខណៈថៃឡើងដល់៣០០០នាក់
× ក្រោយស្ងប់ស្ងាត់អស់រយៈពេលប្រមាណ៣សប្តាហ៍ វៀតណាមបានប្រកាសពីការរកឃើញករណីឆ្លង COVID-19 ចំនួន១៧ទៀត ដែលសុទ្ធតែជាករណីនាំចូល។ ការរកឃើញនេះ ចំពេលដែលវៀតណាម បានបន្ធូរបន្ថយការរឹតបន្តឹងមួយចំនួនក្នុងប្រទេស។ ជាមួយគ្នានេះ ថៃ ទើបរកឃើញករណីថ្មីចំនួន៨ទៀត ដែលធ្វើឲ្យចំនួនអ្នកឆ្លងទូទាំងប្រទេសឡើងដល់៣០០០នាក់ហើយ។
ក្នុងបណ្តាប្រទេសអាស៊ីអាគ្នេយ៍ វៀតណាម គឺជាមួយក្នុងចំណោមប្រទេសផ្សេងទៀត ដែលមានចំណាត់ការល្អ ក្នុងការទប់ស្កាត់ជំងឺរលាកសួតប្រភេទថ្មី។ ចាប់តាំងពីថ្ងៃទី២៤ ខែមេសា មកដល់ពេលនេះ វៀតណាមរកឃើញ COVID-19 ថ្មីក្នុងរយៈពេលតែពីរថ្ងៃគត់។ ក្នុងនោះមានដូចជា ថ្ងៃទី១ ខែឧសភា វៀតណាម បានរាយករណ៍ថា មានករណីឆ្លងចំនួន ១ករណី ។
ដោយឡែកសម្រាប់ថ្ងៃទី៧ ខែឧសភាវិញ វៀតណាម បានរកឃើញករណីកូរ៉ូណាវីរុសថ្មីចំនួន ១៧ករណី ហើយអ្នកទាំងនោះ គឺជាប្រជាពលរដ្ឋ វៀតណាម ដែលត្រូវបានគេជម្លៀសមកពីអេមីរ៉ាតអារ៉ាប់រួម។
ការរកឃើញថ្មីនេះ គឺធ្វើឡើងបន្ទាប់ពីវៀតណាម មិនបានរកឃើញករណីឆ្លងជាសហគមន៍ ក្នុងរយៈពេលចំនួន ២១ថ្ងៃមកហើយ។ តួលេខសរុបនៃ COVID-19 នៅវៀតណាមបានកើនដល់ចំនួន ២៨៨ករណី ប៉ុន្តែមិនមានករណីស្លាប់ និងអ្នកជាសះស្បើយមានចំនួន ២៣៣នាក់។ នេះបើតាមតួលេខរបស់វ៉ិបសាយ Worldometers។
យ៉ាងណាមិញ នៅថ្ងៃទី៧ ខែឧសភានេះ នាយករដ្ឋមន្ត្រីវៀតណាម បានយល់ព្រមបន្ធូរបន្ថយការរឹតត្បិតសេវាកម្ម សកម្មភាពជំនួញមួយចំនួន និងសកម្មភាពកីឡា ប៉ុន្តែក្លឹបរាត្រី និងកន្លែងរាំច្រៀង នៅតែបន្តបិទដដែល។ ចំណែករថយន្តក្រុង តាក់ស៊ី យន្តហោះជាដើម រដ្ឋាភិបាលវៀតណាម បានយល់ព្រមបន្ធូរបន្ថយការរឹតត្បិតតាំងពីថ្ងៃទី៦ ខែឧសភាមកម្លេះ។ សម្រាប់សាលារៀនមួយចំនួន ក៏បានចាប់ផ្តើមបើកទ្វារទទួលសិស្សវិញដែរ។
នៅថ្ងៃទី៨ ខែឧសភា នេះ ថៃ បានរកឃើញ៨ករណីបន្ថែមទៀត ដែលភាគច្រើននៅមណ្ឌលជនភៀសខ្លួនក្នុងខេត្តសុងក្លា។ បច្ចុប្បន្ន ថៃមានអ្នកឆ្លងសរុប៣០០០នាក់ ក្នុងនោះស្លាប់៥៥នាក់ និងសះស្បើយ២៧៨៤នាក់៕
© រក្សាសិទ្ធិដោយ thmeythmey.com