អន្តរជាតិ
អាមេរិកព្រមានអំពីអំពើហិង្សាធ្ងន់ធ្ងរនៅអាហ្វហ្គានីស្ថានថា អាចនាំឲ្យអន្តរាយកិច្ចព្រមព្រៀងសន្តិភាពជាមួយក្រុមតាលីបង់
រូបឯកសារ៖ បុរសអាហ្វហ្គានីស្ថានម្នាក់ ត្រួតពិនិត្យបំណែកនៃរថយន្តនៅកន្លែងនៃការបំផ្ទុះគ្រាប់បែកនៅក្នុងស្រុក Ghani Khel ខេត្ត Nangarhar ប្រទេសអាហ្វហ្គានីស្ថានកាលពីថ្ងៃទី៣ ខែតុលា ឆ្នាំ២០២០។
×![]()
ដោយ: VOA
សហរដ្ឋអាមេរិកបានព្រមានថា អំពើហិង្សាកម្រិតខ្ពស់ដ៏គួរឲ្យបារម្ភក្នុងប្រទេសអាហ្វហ្គានីស្ថាននោះ កំពុងគំរាមកំហែង និងអាចនាំឲ្យអន្តរាយដល់កិច្ចព្រមព្រៀងសន្តិភាពរបស់រដ្ឋាភិបាលអាមេរិក ជាមួយក្រុមឧទ្ទាមតាលីបង់ និងដំណើរការចរចាសន្តិភាពផ្ទៃក្នុងដែលកំពុងកើតមាន ក្នុងប្រទេសអាហ្វហ្គានីស្ថាន។
លោក Zalmay Khalilzad (ហ្សាល់មេ ខាល់លីហ្សាដ) បេសកជនពិសេសសហរដ្ឋអាមេរិក សម្រាប់ប្រទេសដែលរងនូវភាពច្របូកច្របល់ខ្លាំងមួយនេះ បានចេញផ្សាយនូវសេចក្តីព្រមានកាលពីថ្ងៃចន្ទយ៉ាងដូច្នេះ គឺកើតឡើងក្រោយពេលដែលក្រុមតាលីបង់បានបង្កើនការវាយប្រហារលើកងកម្លាំងសន្តិសុខរបស់ប្រទេសអាហ្វហ្គានីស្ថានតាមសមរភូមិជាច្រើន ដែលរួមមានការវាយប្រហារក្នុងទ្រង់ទ្រាយធំកាលពីសបា្តហ៍មុន ក្នុងខេត្ត Helmand (ហែលមែន) ស្ថិតនៅភាគខាងត្បូងរបស់ប្រទេសនេះផងដែរ។
លោកបានថ្លែងក្នុងសារជាបន្តបន្ទាប់លើបណ្តាញទ្វីតធឺថា ការរំពឹងរបស់យើងគឺថា អំពើហិង្សានឹងថមថយ។
អំពើហិង្សាគួរត្រូវបានកាត់បន្ថយជានិរន្ត ក្រោយកិច្ចព្រមព្រៀងជាប្រវត្តិសាស្ត្រដែលសហរដ្ឋអាមេរិក បានចុះហត្ថលេខា ជាមួយក្រុមតាលីបង់កាលពីខែកុម្ភៈកន្លងទៅ ក្នុងការលើកកម្ពស់ការបញ្ចប់នូវជម្លោះក្នុងប្រទេសអាហ្វហ្គានីស្ថាន ដែលមានរយៈពេល១៩ឆ្នាំ តាមរយៈការចរចា និងជាការខិតខំដ៏យូរបំផុតរបស់អាមេរិកនោះ។
កាលពីថ្ងៃអាទិត្យ ក្រុមឧទ្ទាមសកម្មប្រយុទ្ធ បានលើកឡើងថា យោធាអាមេរិកបានរំលោភទៅលើខ្លឹមសារនៃកិច្ចព្រមព្រៀងនោះ។ ទោះជាយ៉ាងនេះក្តី អ្នកនាំពាក្យយោធាអាមេរិក បានប្រកាសទាត់ចោល ការចោទប្រកាន់នោះជាបន្ទាន់ ហើយបានដាក់ការស្តីបន្ទោសដល់ក្រុមតាលីបង់ ថាបានធ្វើសកម្មភាពដែលធ្វើឲ្យប៉ះពាល់ដល់ដំណើរការសន្តិភាពនោះ។
លោក Khalilzad បានបដិសេធការចោទប្រកាន់របស់ក្រុមឧទ្ទាមប៉ះបោរថា មិនមែនជារឿងពិត និងប្រើវោហារសាស្ត្រដុតរោល។ លោកថា វោហារសាស្ត្រចោទប្រកាន់និងដុតរោលទាំងនោះ មិនបានជួយឲ្យដំណើរការសន្តិភាពធ្វើដំណើរទៅមុខនោះទេ។ លោកក៏បានលើកឡើងពីភាពចាំបាច់ ក្នុងការអនុវត្តន៍នូវខ្លឹមសារនៃកិច្ចព្រមព្រៀងរវាងសហរដ្ឋអាមេរិកនិងក្រុមតាលីបង់ និងការយោគយល់គ្នារបស់រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងកាប៊ុល ក្នុងការកាត់បន្ថយនូវអរិភាពក្នុងប្រទេសអាហ្វហ្គានីស្ថាននោះ៕
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
