ស្ថានីយ៍ទូរទស្សន៍ឈានមុខគេលើវិស័យភាពយន្តខ្មែរ នៅកម្ពុជា ភីអិនអិន បានផលិតនូវស្នាដៃរឿងភាគក្នុងស្រុកជាច្រើនរឿង ដែលទទួលបានការគាំទ្រយ៉ាងខ្លាំងពីទស្សនិកជន។ ឈានមកដល់ដំណាច់ឆ្នាំ ២០២០នេះដែរ ភីអិនអិន ក៏បានបញ្ចេញនូវគម្រោងនៃ ការផលិតកម្មវិធីកម្សាន្ត ក៏ដូចជាខ្សែភាពយន្តភាគដ៏ច្រើនបន្តបន្ទាប់ ដើម្បីបម្រើអារម្មណ៍ អ្នកគាំទ្រផងដែរ។
នៅថ្ងៃទី ០៥ ខែវិច្ឆិកា ឆ្នាំ២០២០ ស្ថានីយទូរទស្សន៍ភីអិនអិន បានរៀបចំពិធីក្រុងពាលីរឿងភាគថ្មីដ៏ធំ សម្រាប់ឆ្នាំ ២០២១ គឺរឿង «ស្នាមស្នេហ៍សមុទ្ររាម» ។ ទស្សនិកជន និងអ្នកនិយមតាមដានរឿងភាគខ្មែរមួយចំនួនធំ ប្រហែលជាធ្លាប់បានទស្សនារឿងនេះ រួចទៅហើយកាលពីប៉ុន្មានឆ្នាំមុន។ ដោយមើលឃើញពី ប្រជាប្រិយភាព និងការនៅតែចងចាំនូវខ្សែភាពយន្តភាគខ្មែរដ៏ល្អមួយនេះ ភីអិនអិន ក៏បានធ្វើការរៀបចំផលិតសារឡើងវិញ ដែលនាំមកជាមួយនឹងការដឹកនាំថ្មី តួអង្គសម្តែងថ្មី និងកម្រិតរូបភាព មានគុណភាពខ្ពស់។
ប្រធានគ្រប់គ្រងកម្មវិធីផ្សាយប្រចាំស្ថានីយទូរទស្សន៍ភីអិនអិន កញ្ញា ទូច បុប្ផា បានមានប្រសាសន៍ថា បច្ចុប្បន្នទស្សនិកជនភាគច្រើនគឺដក់អារម្មណ៍ជាមួយរឿងភាគខ្មែរបែបស្នេហាផិតក្បត់ ដែលហាក់មិនបានបង្ហាញពីតុល្យភាពសង្គមរស់នៅ ដូច្នេះហើយទើបខាងក្រុមការងារយើងខ្ញុំគាស់កកាយយក រឿង ស្នាមស្នេហ៍សមុទ្ររាម មកធ្វើការផលិតជាថ្មីម្តងទៀតនេះ ដោយសៀតបញ្ចូលនូវសាច់រឿងថ្មីបន្ថែមមួយផ្នែកទៀតដែលបង្ហាញពីក្តីស្រលាញ់ស្មោះស្ម័គ្រ ការតស៊ូ និងអនុស្សាវរីយ៍ដ៏រ៉ូមែនតិចដើម្បីបម្រើជូនទៅដល់ទស្សនិកជន និងផ្តល់នូវចំណីអារម្មណ៍កម្សាន្តពីអនុស្សាវរីយ៍នៃដំណើរសាច់រឿង រំលឹកថយក្រោយ កាលពីជាង១០ឆ្នាំមុន ។
មិនតែប៉ុណ្ណោះ ខ្សែភាពយន្តនេះក៏បានចែករំលែកនូវបទពិសោធន៍ជីវិត ស្នេហាតស៊ូរបស់គូស្នេហ៍មួយគូ ដែលបង្កើតបានជាសាច់រឿងមនោសញ្ចេតនា ដ៏ផ្អែមល្ហែមមួយនេះឡើង។ កញ្ញា បានបន្តទៀតថា សម្រាប់វត្តមានខ្សែភាពយន្តភាគខ្មែររឿង ស្នាមស្នេហ៍សមុទ្ររាម ក៏ជាចំណងដៃផលិតរឿងភាគចុងក្រោយរបស់កវិនិពន្ធជើងចាស់ អ្នកស្រី ពាន់ បុប្ផា ផងដែរ ដែលក្នុងនោះ ស្ថានីយ៍ទូរទស្សន៍ភីអិនអិន នឹងធ្វើយ៉ាងណាសហការជាមួយផលិតករ ក៏ដូចជាអ្នកដឹកនាំ ដើម្បីឲ្យខ្សែភាពយន្តភាគមួយនេះ ប្រកបដោយគុណភាពខ្ពស់។
រឿង «ស្នាមស្នេហ៍សមុទ្ររាម» ដែលស្ថានីយទូរទស្សន៍ភីអិនអិន លើកយកមកផលិតជាថ្មីម្តងទៀតនេះ គឺមានសាច់រឿងរហូតដល់ទៅ២ វគ្គ ដែលវគ្គទីមួយ និងវគ្គទីពីរ មានចំណងបញ្ហាប្រទាក់ក្រឡាគ្នា ពីជំនាន់ឪពុកម្តាយ រហូតដល់ជំនាន់កូនៗ។
ទាំងអស់នេះហើយ ដែលកាន់តែធ្វើឲ្យទស្សនិកជនប្លែកអារម្មណ៍ជាមួយនឹងវត្តមានតួអង្គឯក ២ គូរ ដែលសម្តែងដោយតារាល្បី ៗ រួមមានដូចជា កញ្ញា សំណាង អេលីណា ( បវរកញ្ញាចក្រវាល ឆ្នាំ ២០១៩ ) សម្តែងជាតួឯកស្រី , លោក ខាត់ វ៉ៃ ហាំង( តួឯក ប្រុស ) , កញ្ញា អឿន រ៉ូហ្សា ( តួឯកស្រី ) , លោក ពៅ ពិសិដ្ឋ( តួឯកប្រុស ) និងចូលរួមពីសំណាក់តារាផ្សេងទៀតរួមមានន លោក រីមន្ត រិទ្ធ អ្នកនាង សំ ម៉ាណា , កញ្ញា វី យ៉ាដា,ម៉ុង ប៊ុន ណូរ៉ា, លោក ខេម, កញ្ញា នីតា វរវង្ស និងតារាល្បីៗជាច្រើនដួងទៀត។
ក្រោមបរិយាកាសជួបជុំទាំងផលិតករ តារាសម្តែង និងថ្នាក់ដឹកនាំរបស់ស្ថានីយទូរទស្សន៍ភីអិនអិន នៅក្នុងពិធីក្រុងពាលីរឿងនេះ ក៏បានបង្ហាញពីអារម្មណ៍សប្បាយរីករាយ និងព្យាយាម ប្រឹងប្រែងសហការគ្នា ផលិតរឿងភាគឲ្យកាន់តែល្អប្រសើរ។ យ៉ាងណាមិញ ទស្សនិកជន ក៏ដូចជាអ្នកតាមដាន សូមបន្តការគាំទ្រ កាន់តែច្រើន ដើម្បីជាការលើកទឹកចិត្តដល់ផលិតករ សិល្បៈករ ទទួលបានកម្លាំងចិត្ត ឈរលើថ្នាលសិល្បៈក្នុងវិស័យភាពយន្តខ្មែរ៕