អន្តរជាតិ
លោក ត្រាំ សន្យាផ្ទេរអំណាចសន្តិវិធី ក្រោយសភាទទួលស្គាល់ជ័យជម្នះលោក បៃឌិន លោកចូ បៃឌិន ប្រធានាធិបតីជាប់ឆ្នោតអាមេរិក។ រូបភាព៖AP
× នៅថ្ងៃទី៧ ខែមករា (ព្រឹកនៅអាមេរិក) សភាអាមេរិកទាំងពីរថ្នាក់បញ្ជាក់ជាផ្លូវការពីជ័យជម្នះរបស់លោក ចូ បៃឌិន ជាប្រធានាធិបតីជាប់ឆ្នោតទី៤៦ និងលោកស្រីកាម៉ាឡា ហេរីសជាអនុប្រធានាធិបតីជាប់ឆ្នោតទី៤៩។ ភ្លាមៗ លោកប្រធានាធិបតី ដូណាល់ ត្រាំ ក៏សន្យាផ្ទេរអំណាចឲ្យបានត្រឹមត្រូវ បើទោះបីជាលោកមិនទទួលស្គាល់លទ្ធផលបោះឆ្នោតក្តី។
ទីបំផុតទៅ ជ័យជម្នះរបស់លោក ចូ បៃឌិន ជារឿងផ្លូវការមែនទែនហើយ។ ការបញ្ជាក់ជាផ្លូវការដោយសភានេះ បើកផ្លូវឲ្យលោក ចូ បៃឌិន និងលោកស្រី កាម៉ាឡា ហារី ស្បថចូលកាន់តំណែងនៅថ្ងៃទី២០ មករា។
ក្នុងកិច្ចប្រជុំដែលធ្វើឡើងក្រោយការអុកឡុក លោក បៃឌិន បានប្រតិភូគាំទ្រចំនួន៣០៦ ចំណែកឯលោកត្រាំទទួលបាន ២៣២ ។ ដើម្បីក្លាយជាប្រធានាធិបតីបេក្ខជន ត្រូវទទួលបានប្រតិភូគាំទ្រចាប់ពី២៧០ឡើងទៅ។ កិច្ចប្រជុំដែលដឹកនាំដោយលោក ម៉ៃ ផេន មានគោលដៅរាប់ចំនួនប្រតិភូដែលគាំទ្របេក្ខជនប្រធានាធិបតី ដែលវាគ្រាន់តែជានីតិវិធីផ្លូវការប៉ុណ្ណោះ ព្រោះអ្នកឈ្នះត្រូវបានដឹងឮអស់ទៅហើយ គឺលោក បៃឌិន មកពីបក្សប្រជាធិបតេយ្យ។
«បើទោះបីជាខ្ញុំមិនយល់ស្រប នឹងលទ្ធផលឆ្នោតយ៉ាងណាក្តី នឹងមានការផ្ទេរអំណាចដោយមានសណ្តាប់ធ្នាប់នៅថ្ងៃទី២០ មករា»។ នេះជាសេចក្តីថ្លែងការណ៍របស់លោក ដូណាល់ ត្រាំ បង្ហោះភ្លាមៗក្នុងបណ្តាញសង្គម Twitter របស់អ្នកនាំពាក្យសេតវិមាន។ គណនីរបស់លោក ត្រាំ ត្រូវបានហាមមិនឲ្យបង្ហោះសារអ្វីទាំងអស់រយៈពេល១២ម៉ោង។
ការបញ្ជាក់ដោយព្រឹទ្ធសភានេះ ជាការបដិសេធការលើកឡើងរបស់លោក ត្រាំ ដែលនិយាយថា មានការលួចសន្លឹកឆ្នោត នៅតាមរដ្ឋប្រទាញប្រទង់មួយចំនួន។ ការប្រជុំរបស់សភា រងការរំខានដោយការអុកឡុករបស់កុបករគាំទ្រលោកត្រាំ ដែលនាំឲ្យតំណាងរាស្ត្រ និងសមាជិកព្រឹទ្ធសភាត្រូវជម្លៀសខ្លួន និងផ្អាកការប្រជុំជាង៦ម៉ោង។ក្រោយប៉ូលិសគ្រប់គ្រងស្ថានការណ៍បានហើយ សភាទាំងពីរ ក៏បានបន្តកិច្ចប្រជុំរបស់ខ្លួនបន្តទៀតដើម្បីរាប់សំឡេងគាំទ្ររបស់លោក បៃឌិន ។
អំឡុងពេលប្រជុំ តំណាងរាស្ត្រ និងសមាជិកព្រឹទ្ធសភាជាមួយចំនួនតូចបានជំទាស់ទៅនឹងលទ្ធផលឆ្នោតពីរដ្ឋ Georgia, Pennsylvania, Arizona, Michigan និងWisconsin។ ការទាមទារដោយសមាជិកសភាដែលគាំទ្រលោក ត្រាំ ពុំបានបង្ហាញភស្តុតាងអ្វីឡើយ និងសុទ្ធសឹងតែរឿងដែលតុលាការបានច្រានចោលរួចអស់ហើយ។ ការជំទាស់ទាំងអស់នោះ ត្រូវបានសមាជិកព្រឹទ្ធសភា និងតំណាងរាស្ត្រទាំងពីបក្ស បោះឆ្នោតបដិសេធដោយសំឡេងច្រើនលើសលុប៕
© រក្សាសិទ្ធិដោយ thmeythmey.com