ជាតិ
នយោបាយជាតិ
សម្ដេច ហ៊ុន សែន ចង់ឲ្យសភាពការណ៍ស្ងប់ស្ងាត់ ក្នុងឱកាសភ្ជុំបិណ្ឌ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ប្រកាសមិនឆ្លងឆ្លើយនយោបាយអ្វីឡើយនៅក្នុងបរិបទបុណ្យភ្ជុំបិណ្ឌនេះ ដោយសម្ដេច បញ្ជាក់ថា «ខ្ញុំចង់ឲ្យសភាពការណ៍ស្ងប់ស្ងាត់» ។ ថ្លែងចំពោះមុខនិស្សិតជាង១ពាន់នាក់នៅសណ្ឋាគារសុខាព្រឹកនេះ ប្រមុខរដ្ឋាភិបាល បានលើកឡើងថា ស្ថានការណ៍ស្ងប់ស្ងាត់ក្នុងឱកាសភ្ជុំបិណ្ឌនេះ គឺជារឿងល្អ ដែលគួរតែនាំគ្នាទៅវត្ត ធ្វើបុណ្យទាំងអស់គ្នា ក្រោយពីសម្ដេច ហ៊ុន សែន បញ្ចេញសម្តីលាយឡំពី«បទឈប់បាញ់» គ្នានៅក្នុងថ្ងៃភ្ជុំបិណ្ឌនេះ។ ប៉ុន្តែ«បទឈប់បាញ់» នេះ លោកនាយករដ្ឋមន្ត្រី ហ៊ុន សែន មិនបានបញ្ជាក់ន័យឲ្យច្បាស់នោះទេ ដោយសម្ដេច បន្ថែមថា លោករង់ចាំមើលថា តើអ្នកណាជាអ្នកចាប់ផ្ដើមមុន។
ពីពិធីចែកសញ្ញាបត្រដល់និស្សិតនៃសាកលវិទ្យាល័យពុទ្ឋិសាស្ត្រព្រឹកនេះ ប្រមុខរដ្ឋាភិបាល បានបញ្ជាក់ដូច្នេះថា៖
ទាក់ទិននឹងបញ្ហានយោបាយនេះ មន្ត្រីជាន់ខ្ពស់គណបក្សសង្គ្រោះជាតិ លោក អ៊ូ ចន្ទឫទ្ធិ យល់ថា ការលើកឡើងរបស់សម្ដេច ហ៊ុន សែន នេះគឺជារឿងល្អ ព្រោះគណបក្សលោកក៏ចង់បានស្ថានភាពស្ងប់ស្ងាត់ដូចសម្ដេចដែរ។«ខ្ញុំគិតថាជារឿងល្អ។ ខ្ញុំសូមស្វាគមន៍ចំពោះមតិសម្ដេច ដែលចង់បានភាពស្ងប់ស្ងាត់ក្នុងពេលភ្ជុំបិណ្ឌនេះ ប៉ុន្តែយើងមិនមែនចង់បានភាពស្ងប់ស្ងាត់តែពេលភ្ជុំបិណ្ឌនេះទេ គឺចង់បន្តស្ងប់ស្ងាត់រហូត។ មានការស្ងប់ស្ងាត់បាន ដោយយើងចង់ឲ្យមានការបញ្ឈប់ការយកប្រព័ន្ធតុលាការមកគំរាមកំហែងមកលើមន្ត្រីបក្សប្រឆាំង»។ នេះជាការបញ្ជាក់របស់លោក អ៊ូ ចន្ទឫទ្ធិ ។
ចំណែកតំណាងរាស្ត្រគណបក្សសង្គ្រោះជាតិ លោក សុន ឆ័យ ធ្លាប់បានបញ្ជាក់កន្លងមកថា តំណាងរាស្របក្សលោកកំពុងពិចារណាចូលបំពេញការងារនៅក្នុងរដ្ឋសភាវិញ នៅខែក្រោយនេះ បន្ទាប់ពីលឺសម្ដេចនាយករដ្ឋមន្ត្រី ហ៊ុន សែន បានព្រលយពាក្យកាលពីពេលថ្មីៗនេះថា កន្លែងជួបចរចាគ្នា គឺមានតែនៅក្នុងរដ្ឋសភា។
សម្រាប់អ្នកវិភាគនយោបាយវិញយល់ថា អ្នកនយោបាយគណបក្សជាប់ឆ្នោតមានអាសនក្នុងរដ្ឋសភាទាំងពីរ គួរតែចូលតុចរចាដោយសម្បទានគ្នាទៅវិញទៅមក តាមរយៈវប្បធម៌សន្ទនា ដើម្បីបញ្ចប់ជម្លោះនយោបាយ ហើយងាកមករកដំណោះស្រាយជូនប្រជាពលរដ្ឋ និងគិតពីផលប្រយោជន៍ជាតិជាធំវិញ៕
Tag:
ហ៊ុន សែន
ភ្ជុំបិណ្ឌ
© រក្សាសិទ្ធិដោយ thmeythmey.com