ជាតិ
ពលរដ្ឋ២លាននាក់ បាត់បង់សិទ្ធិបោះឆ្នោតជ្រើសរើសមេឃុំ-សង្កាត់
× ភ្នំពេញ៖ ពលរដ្ឋកម្ពុជាប្រមាណជា ២លាននាក់ ត្រូវបាត់បង់សិទ្ធិបោះឆ្នោតជ្រើសរើសមេឃុំ-សង្កាត់ នៅឆ្នាំក្រោយនេះ ដោយសារតែពួកគេខកខានមិនបានមកចុះឈ្មោះបោះឆ្នោតមុនតាមកាលកំណត់ក្នុងរយៈពេលបីខែ ដែលត្រូវបានបិទត្រឹមថ្ងៃទី២៩ វិច្ឆិកានេះ។
យុទ្ធនាការរយៈពេលបីខែធ្វើបញ្ជីឈ្មោះអ្នកបោះឆ្នោតថ្មីនៅកម្ពុជាត្រូវបានបបញ្ចប់ជាស្ថាពរ ដោយបន្សល់ទុក នូវពលរដ្ឋប្រមាណជា ២លាននាក់គ្មានសិទ្ធិចូលរួមបោះឆ្នោតជ្រើសរើសមេឃុំ-សង្កាត់នៅឆ្នាំក្រោយ ដោយសារតែពួកគេខកខានមិនបានមកចុះឈ្មោះបោះឆ្នោតតាមកាលកំណត់។
ក្រោយបញ្ចប់ការចុះឈ្មោះបោះឆ្នោតប្រជាពលរដ្ឋខ្មែរ បានទៅចុះឈ្មោះបោះឆ្នោតចំនួន ៧,៨៧៣,១៩៤ ប៉ុណ្ណោះ ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះបង្ហាញឲ្យឃើញការថយចុះជិត ២លាននាក់ប្រៀបទៅនឹង ៩លាន ២សែននាក់ដែលគ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១។ នាពេលនោះ គេប៉ាន់ស្មានថាមានពលរដ្ឋគ្រប់អាយុមានសិទ្ធិបោះឆ្នោតបានប្រមាណ ៩លាន ៦សែននាក់។
ពាក់ព័ន្ធនឹងបញ្ហានេះសមាជិកគណៈកម្មាធិការរៀបចំការបោះឆ្នោត គជប លោក សូ សុផាត បានបញ្ជាក់ថា មូលហេតុដែលពលរដ្ឋចុះឈ្មោះមិនគ្រប់ចំនួនតាមការប៉ាន់ស្មានស្ថិតិនោះ បណ្ដាលមកពី ពលរដ្ឋដែលចំណាកស្រុកបម្រើការងារនៅក្រៅប្រទេសទាំងស្របច្បាប់ និងខុសច្បាប់នោះមានចំនូនជាង១លាននាក់។ ចំណែកពលរដ្ឋពលរដ្ឋមិនអាចទៅចុះឈ្មោះបាននោះ មកពី កំពុងស្ថិតនៅក្នុងស្ថានភាពជាប់ពន្ធនាគារ។ កំពុងសម្រាកព្យាបាលជំងឺនៅតាមមន្ទីពេទ្យ។ ជនចាស់ជរាឬជនពិការដែលពិបាកធ្វើដំណើរការ និងករណីទទួលមរណភាព។ បើតាមលោក សូ សុផាត ពលរដ្ឋដែលមានសិទ្ធិបោះឆ្នោតមួយចំនួន ក៏ពុំសូវយកចិត្តទុកដាក់ក្នុងការចុះឈ្មោះបោះឆ្នោត បើទោះជាមានការជំរុញ និងបង្កលក្ខណៈងាយស្រួលយ៉ាងណាក៏ដោយ។ តែយ៉ាងណាសមាជិកគជបរូបនេះ ចាត់ទុកការចុះឈ្មោះបោះឆ្នោតថ្មីៗ ប្រព្រឹត្តិទៅដោយសុវត្ថិភាព និងលទ្ធផលល្អ ដោយមានក្របខណ្ឌ «ប.ន.ប.ថ» ផែនការការងារ ,គម្រោងថវិកា ,ការត្រៀមសម្ភារៈ និងការចូលរួមពីភាគីពាក់ព័ន្ធក្នុងការចូលរួមការសន្តិសុខក្នុងការចុះឈ្មោះបោះឆ្នោតនេះ។
មេដឹកនាំគណបក្សនយោបាយធំៗ គឺសម្តេចនាយករដ្ឋមន្ត្រី ហ៊ុន សែន និងឯកឧត្តម សម រង្ស៊ី ធ្លាប់បាន ប្រកាសអំពាវនាវដូចគ្នា ឲ្យប្រជាពលរដ្ឋដែលមិនទាន់ចុះឈ្មោះបោះឆ្នោតទៅចុះឈ្មោះបោះឆ្នោតឲ្យបានគ្រប់គ្នាមុនឱសានវាទបិទបញ្ជីមកដល់។ ក្នុងកិច្ចខិតខំចុងក្រោយរបស់ខ្លួន គណៈបក្សសង្គ្រោះជាតិបានស្វែងរកអន្តរាគមន៍របស់គ.ជ.ប ឲ្យពន្យារពេលការចុះឈ្មោះបន្តិចទៀត ប៉ុន្តែការប៉ុនប៉ងនេះហាក់ដូចជាត្រូវបានបរាជ័យ ដោយសារតែគ.ជ.ប អាចពន្យារពេលថែមតែមួយថ្ងៃប៉ុណ្ណោះ។
អ្នកវិភាគនយោបាយលោកបណ្ឌិត មាស នី យល់ថា ប្រជាពលរដ្ឋដែលមិនទាន់ចុះឈ្មោះបោះឆ្នោតទាំងនោះ ភាគច្រើនជាកម្មករទៅធ្វើការនៅក្រៅប្រទេស និងប្រជាពលរដ្ឋដែលនៅក្នុងប្រទេសខ្លះ តែមិនខ្វល់ពីរឿងបោះឆ្នោត។ «អ្នកខ្លះគិតថា បោះឆ្នោតគ្មានប្រយោជន៍សម្រាប់គេ។ ម្យ៉ាងអាចដោយសារការចុះឈ្មោះលើកនេះ តឹងតែង និងអាចមានភាពសុក្រឹតជាងអាណត្តិកន្លងទៅ ទើបចំនួនអ្នកចុះឈ្មោះហាក់យឺតជាងអាណត្តិមុន»។ នេះជាការបញ្ជាក់របស់លោក មាស នី ទន្ទឹមនឹងលោកស្នើឲ្យគណៈកម្មាធិការជាតិរៀបចំការបោះឆ្នោត ពន្យារពេលនៃការចុះឈ្មោះបោះឆ្នោតដូច្នេះថា៖«តែពន្យារពេល មិនមែននៅស្ងៀមទេ ត្រូវរកវិធីឬផ្សព្វផ្សាយបន្ថែមទៀត ដើម្បីឲ្យប្រជាពលរដ្ឋទៅចុះឈ្មោះ។ ជាងនេះ ត្រូវរកមើលប្រភពបញ្ហាដែលនាំឲ្យពលរដ្ឋមិនទៅចុះឈ្មោះ និងដោះស្រាយវា។ ខ្ញុំគិតថា បើប្រជាពលរដ្ឋមិនចុះឈ្មោះបោះឆ្នោតច្រើន បក្សទាំងអស់គឺខាតដូចតែគ្នា»។
© រក្សាសិទ្ធិដោយ thmeythmey.com