ជាតិ
តុលាការសម្រេចផ្តន្ទាទោសមេឃុំគណបក្សសម រង្ស៊ី ដាក់ពន្ធនាគារ៥ឆ្នាំ
×
ភ្នំពេញ៖ នៅព្រឹកនេះចៅក្រមសាលាដំបូងរាជធានីភ្នំពេញលោក កៅ វណ្ឌី បានសម្រេចផ្តន្ទាទោសមេឃុំគណបក្សសម រងស៊ី លោក ស៊ាង ចែត ឲ្យជាប់ពន្ធនាគារ៥ឆ្នាំ ពីបទចោទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។
លោក សំ សុខគង់ មេធាវីការពារក្តីលោក ស៊ាង ចែត យល់ថា ការសម្រេចរបស់តុលាការនេះហាក់ដូចជាគ្មានអង្គហេតុច្បាស់លាស់ ក្នុងការដាក់បន្ទុកលើកូនក្តីលោកឡើយ។ លោក សំ សុខគង់ មិនអាចទទួលយកការសម្រេចរបស់តុលាការបែបនេះឡើយ ដោយសារតែការផ្តន្ទាទោសកូនក្តីលោកមានភាពធ្ងន់ធ្ងរ មិនស្របតាមនីតិវិធីច្បាប់។ ថ្លែងប្រាប់សារព័ត៌មានថ្មីៗ មេធាវីការពារក្តីលោក ស៊ាង ចែត រូបនេះ បានបញ្ជាក់ដូច្នេះថា៖«ខ្ញុំយល់ថា ការសម្រេចទោសនេះមានកម្រិតធ្ងន់ធ្ងរលើកូនក្តីខ្ញុំ ហើយតុលាការក៏មិនដាក់ព្យួរ ឲ្យតាមនីតិវីធីច្បាប់ទៀត។ ដូច្នេះខ្ញុំមិនអាចទទួលយកបានទេ ព្រោះអង្គហេតុ និងភស្តុតាង គ្មានភាពច្បាស់លាស់ ហាក់ដូចជាគ្រាន់តែមានការសង្ស័យប៉ុណ្ណោះ»។
បើតាមលោក សំ សុខគង់ រូបលោកនិងមេធាវីផ្សេង នឹងប្រជុំពិភាក្សាជាមួយលោក ស៊ាង ចែត ដើម្បីប្ដឹងទៅសាលាឧទ្ធរណ៍ជំទាស់នឹងការសម្រេចរបស់សាលាដំបូងនេះ។
លោក ស៊ាង ចែង ដែលជាមេឃុំស្រក ស្រុកកំពង់សៀម ខេត្តកំពង់ចាម ត្រូវបានតុលាការ ចោទពីបទ «សូកប៉ាន់សាក្សី» ពាក់ព័ន្ធនឹងរឿងរ៉ាវរបស់កញ្ញា ខុម ចន្ទតារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។ រឿងនេះបានផ្ទុះឡើង បន្ទាប់ពីស្រីមុំ សរសេរលិខិតចំហមួយច្បាប់ ហើយលាតត្រដាងជាសាធារណៈ ក្នុងអំឡុងខែមេសា ឆ្នាំ២០១៦ ដោយចោទលោក ស៊ាង ចែត ថាបានយកប្រាក់ចំនួន៥០០ដុល្លារ ទៅសូកម្តាយរបស់នាង។
ស្រីមុំ បានបញ្ជាក់ក្នុងលិខិតនោះថា លោក ស៊ាង ចែត មេឃុំគណបក្សសម រង្ស៊ីរូបនេះ បានប្រើប្រាស់ទឹកប្រាក់ទាំងនោះ ដើម្បីបញ្ចុះបញ្ចូលម្តាយ ឲ្យលួងលោមរូបនាង កុំឲ្យនិយាយការពិត ពីរឿងអាស្រូវរបស់នាង ជាមួយនឹងឯកឧត្តម កឹម សុខា។ ដោយសារតែលិខិតនេះ ទើបលោក ស៊ាង ចែត ត្រូវបានឃាត់ខ្លួន កាលពីអំឡុងខែមេសា ឆ្នាំ២០១៦ ។
ក្រៅពីលោក ស៊ាង ចែត នៅមានមន្ត្រីការពារសិទ្ធិមនុស្សនៃសមាគមអាដហុកបួនរូប និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោតមួយរូប កំពុងជាប់ពន្ធនាគារផងដែរ ដោយសារតែរឿងរ៉ាវរបស់ស្រីមុំ៕
Tag:
ស៊ាង ចែត
កឹម សុខា
ស្រីមុំ
© រក្សាសិទ្ធិដោយ thmeythmey.com