សម្តេច ហ៊ុន សែន យកឯ.ឧ កឹម សុខា ជាដៃគូសន្ទនា

ជាតិ

នយោបាយជាតិ

សម្តេច ហ៊ុន សែន យកឯ.ឧ កឹម សុខា ជាដៃគូសន្ទនា

07, Dec 2016 , 10:54 am

រូបភាព

ដោយ: រំដួល ចិត្រា (Romdoul Chetra)

ប្រធានគណបក្សប្រជាជនកម្ពុជា សម្តេច ហ៊ុន សែន បានថ្លែងការពារការសម្រេចរបស់សម្តេច ហេង សំរិន ចំពោះតួនាទីនៅក្នុងរដ្ឋសភារបស់ឯកឧត្តម កឹម សុខា ថា ជាការត្រឹមត្រូវ។ ជាងនេះទៀត សម្តេច ហ៊ុន សែន ក៏ទទួលស្គាល់ ឯកឧត្តម កឹម សុខា ថា គឺជាដៃគូសន្ទនារបស់ខ្លួន។

សម្តេច ហ៊ុន សែន បកស្រាយថា ការសម្រេចរបស់សម្តេច ហេង សំរិន ឲ្យឯកឧត្តម កឹម សុខា កាន់តំណែងជាប្រធានក្រុមមតិភាគតិចនៅក្នុងរដ្ឋភាផង ជាប្រធានក្រុមតំណាងរាស្ត្រគណបក្សសង្គ្រោះជាតិនៅក្នុងរដ្ឋសភាផង គឺជារឿងត្រឹមត្រូវ ដែលស្របនឹងមាត្រា ៤៨ ថ្មី (បី) នៃច្បាប់ស្តីពីបទបញ្ជាផ្ទៃក្នុងនៃរដ្ឋសភា។ ដូច្នេះសម្តេច បញ្ជាក់ថា ឯកឧត្តម កឹម សុខា គឺជាដៃគូសន្ទនាជាមួយខ្លួន។ ការថ្លែងការពាររបស់សម្តេច ហ៊ុន សែន ពេលនេះ ដើម្បីឆ្លើយតបនឹងអត្ថបទរបស់សារព័ត៌មានថ្មីៗមួយ មានចំណងជើងថា «តំណែងថ្មីរបស់ឯ.ឧ កឹម សុខា នៅរដ្ឋសភា នៅចម្រូងចម្រាស» ដែលបានចុះផ្សាយកាលពីយប់ថ្ងៃអង្គារ។

សម្តេចនាយករដ្ឋមន្ត្រីដែលអះអាងថា មាត្រា ៤៨ ថ្មីបីនេះ គឺខ្លួនជាអ្នកតាក់តែងឡើង បានពន្យល់ថា នៅក្នុងមាត្រានេះ មិនតម្រូវឲ្យមនុស្សពីរនាក់ កាន់តំណែងពីរដាច់ដោយឡែកពីគ្នា ពោលគឺជាប្រធានក្រុមតំណាងរាស្ត្រ និងប្រធានក្រុមមតិភាគតិចនោះទេ តែមនុស្សម្នាក់កាន់តំណែងទាំងពីរនេះ។ «បើសិនមិនអាចទទួលនូវការតែងតាំងនេះ បាន គឺមានតែធ្វើវិធីដក ដោយធ្វើវិសោធនកកម្មមាត្រា ៤៨ ថ្មីបី ដោយដកចេញនៅតួនាទីទាំងឡាយ ហើយវិលត្រឡប់ទៅមាត្រា ៤៨ ថ្មីពីរវិញ»។ សម្តេចមានប្រសាសន៍យ៉ាងនេះនៅក្នុងកិច្ចប្រជុំរដ្ឋសភានៅថ្ងៃនេះហើយ ក៏បន្តលើកឡើងយ៉ាងនេះទៀតថា៖«តែជាការល្អដែរ ដែលឯកឧត្តម កឹម សុខា ក៏បានបញ្ជាក់។ ឥឡូវឯកឧត្តម ក្លាយជាដៃគូជាមួយសម្តេច ស ខេង ក្នុងឋានៈជាប្រធានក្រុមតំណាងរាស្ត្រ ហើយធ្វើជាដៃគូរបស់ខ្ញុំពិភាក្សាដោះស្រាយបញ្ហាប្រទេសជាតិ (ក្នុងឋានៈជាប្រធានក្រុមមតិភាគតិច) ។

ប្រមុខរដ្ឋាភិបាលរូបនេះ បានរម្លឹកពីបុព្វហេតុនៃការតាក់តែងមាត្រា ៤៨ ថ្មីបី ដូច្នេះថា៖«មាត្រានេះ ខ្ញុំជាអ្នកតាក់តែង ដើម្បីឲ្យឯកឧត្តម សម រង្ស៊ី មានការងារធ្វើ។ ដូច្នេះ ចំណុចនេះ សុំសាធារណៈមតិ ក៏ដូចជា ការភន្តច្រឡំណាមួយ នូវការបកស្រាយខុស ក្នុងប៉ុន្មានសិបម៉ោងមកនេះ សុំមេត្តាឈប់និយាយខុសគ្នាថា ប្រធានរដ្ឋសភា ធ្វើមិនត្រឹមត្រូវ»។

ការស្នើសុំកុំឲ្យមានការបកស្រាយខុសរបស់សម្តេច ហ៊ុន សែន ពេលនេះ បន្ទាប់ពីឯកឧត្តម សម រង្ស៊ី ប្រធានគណបក្សសង្គ្រោះជាតិ ដែលថ្លែងការពារតំណែងរបស់ខ្លួនថា តួនាទីប្រធានក្រុមមតិភាគតិចនៅរដ្ឋសភា ដើម្បីជជែកជាមួយសម្តេច ហ៊ុន សែន នៅតែជារបស់ឯកឧត្តម។ ចំណែកឯកឧត្តម កឹម សុខា អនុប្រធានគណបក្សសង្គ្រោះជាតិ គ្រាន់តែជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភាសម្រាប់ជជែកជាមួយសម្តេច ស ខេង តែប៉ុណ្ណោះ។ នេះបញ្ជាក់របស់ឯកឧត្តម នៅតាមបណ្តាញសង្គម Twitter កាលពីថ្ងៃទី ៤ ធ្នូ។

បន្ទាប់ពីសម្តេច ហ៊ុន សែន ថ្លែងចប់ហើយ ឯកឧត្តម កឹម សុខា ដែលទើបបានតំណែងពីរថ្មីនៅក្នុងរដ្ឋសភា បានក្រោកឈរអត្ថាធិប្បាយអំពីភាពចម្រូងចម្រាសនៃតំណែងនេះបែបនេះថា៖« ចំពោះតំណែង ឬតួនាទី វាគ្រាន់តែជាមធ្យោបាយសម្រាប់យើងធ្វើដំណើរទៅរកគោលដៅប៉ុណ្ណោះ។ តែទោះបីតួនាទី ធំ ប៉ុណ្ណាក៏ដោយ តែបើយើងដើរខុសគោលដៅ ក៏យើងមិនអាចជោគជ័យដែរ»។ ឯកឧត្តម សុខា បន្ថែមបែបនេះថា៖«យើងត្រូវដោះស្រាយបញ្ហាជាមួយខ្មែរនឹងខ្មែរ។ ថ្ងៃនេះជាថ្ងៃចាប់ផ្តើម យើងត្រូវប្រុងប្រយ័ត្ន កុំឲ្យមានការរំខានណាមួយ ដែលធ្វើឲ្យដំណើរការរបស់យើងមិនឲ្យដល់គោលដៅ។ គោលដៅ គឺឯកភាពជាតិ សន្តិភាព និងអភិវឌ្ឍសម្រាប់ជាតិ ប្រជាពលរដ្ឋយើង»។

នៅក្នុងកិច្ចប្រនៅព្រឹកនេះផងដែរ ស្របពេលដែលរដ្ឋសភា កំពុងបើកកិច្ចប្រជុំ ឯកឧត្តម កឹម សុខា បានឆ្លៀតជួបពិភាក្សាជាមួយសម្តេច ហ៊ុន សែន នៅក្នុងបន្ទប់របស់សម្តេចអស់រយៈពេលប្រមាណ ១ ម៉ោង។ បន្ទាប់មកឯកឧត្តម កឹម សុខា បន្តជួបពិភាក្សាជាមួយសម្តេច ស ខេង។ យ៉ាងណា របៀបវារៈនៃជំនួបមេដឹកនាំគណបក្សទាំងពីរ នៅមិនទាន់មានមន្រ្តីណាប្រាប់អ្នកកាសែតនោះឡើយ៕