ឆ្នាំ២០១៦ អ្នកកាសែតថ្មីៗមានបេសកកម្ម១៣លើកនៅបរទេស ពិសេសនៅចិន និងអាមេរិក

ជាតិ

ឆ្នាំ២០១៦ អ្នកកាសែតថ្មីៗមានបេសកកម្ម១៣លើកនៅបរទេស ពិសេសនៅចិន និងអាមេរិក

03, Jan 2017 , 5:11 pm

រូបភាព

ដោយ: ថ្មីៗ

ដូចឆ្នាំ២០១៥ដែរ អ្នកកាសែតនៃសារព័ត៌មានអនឡាញថ្មីៗ នៅតែទទួលបានការផ្តល់តម្លៃពីស្ថានទូតបរទេស អង្គការក្រៅរដ្ឋាភិបាលនិងក្រុមហ៊ុនធំៗប្រចាំនៅកម្ពុជា តាមរយៈការអញ្ជើញអ្នកកាសែតថ្មីៗឲ្យចូលរួមយកព័ត៌មាននៅក្នុងកម្មវិធីអន្តរជាតិធំៗនៅបរទេស។ នៅក្នុងឆ្នាំ២០១៦កន្លងទៅ អ្នកសារព័ត៌មានថ្មីៗ ៤រូបបានធ្វើដំណើរទៅប្រទេសចិនក្នុងតំបន់ផ្សេងៗគ្នាតាមរយៈការអញ្ជើញរបស់ស្ថានទូត ស្ថាប័នរដ្ឋ និងឯកជនរបស់ប្រទេសចិន។ ចំណែកឯស្ថានទូតអាមេរិក ស្ថានទូតនេះបានអញ្ជើញសារព័ត៌មានថ្មីៗ៣ដង ដើម្បីឲ្យយកព័ត៌មាន២ដងនៅសហរដ្ឋអាមេរិក និងមួយដងនៅក្នុងប្រទេសឡាវ។

លោក ជា ធីរិទ្ធ ជានិពន្ធនាយករង បានស្ថិតនៅក្នុងចំណោមអ្នកកាសែតកម្ពុជាចំនួន១៤រូបផ្សេងទៀត ដែលត្រូវបានជ្រើសរើសឲ្យចូលរួមយកព័ត៌មានក្នុងព្រឹត្តិការណ៍បោះឆ្នោតប្រធានាធិបតីអាមេរិកនៅក្នុងខែវិច្ឆិកា។ ទស្សនកិច្ចសិក្សា និងការយកព័ត៌មានបោះឆ្នោតនេះ ត្រូវបានឧបត្ថម្ភដោយស្ថានទូតអាមេរិកប្រចាំកម្ពុជា។

លោក ទេព អ៊ី វិសាល អ្នកកាសែតផ្នែកព័ត៌មានអន្តរជាតិ ទទួលបន្ទុកកិច្ចការអាស៊ាន ត្រូវបាន ស្ថានទូតអាមេរិកប្រចាំកម្ពុជា អញ្ជើញឲ្យចូលរួមយកព័ត៌មាន ជាមួយអ្នកកាសែតនៃប្រទេសសមាជិកអាស៊ាន ក្នុងជំនួបកំពូលរវាងប្រធានាធិបតីអាមេរិក បារ៉ាក់ អូបាម៉ា ជាមួយក្រុមយុវជនអាស៊ាន (YSEALI) នៅក្រុងលួងប្រាបាង្គ នៃប្រទេសឡាវ កាលពីខែ កញ្ញា។

លោក សៅ ផល និស្ស័យ ជានិពន្ធនាយករងសារព័ត៌មានថ្មីៗ ទទួលបន្ទុកប្រធានផ្នែកព័ត៌មានអន្តរជាតិ បានចូលរួមយកព័ត៌មាននៅក្នុងជំនួបកំពូលអាមេរិក-អាស៊ាន ដែលត្រូវបានរៀបចំលើកដំបូងនៅរដ្ឋកាលីហ្វ័រនីញ៉ានៃសហរដ្ឋអាមេរិក នៅក្នុងខែកុម្ភៈឆ្នាំ២០១៦។ និស្ស័យ ត្រូវបានជ្រើសរើសដោយស្ថានទូតអាមេរិកប្រចាំកម្ពុជា។

លោក គី សុខលីម ស្ថាបនិក និងជាអ្នកយកព័ត៌មានជាន់ខ្ពស់ បានចូលរួមក្នុងកម្មវិធីរឹតចំណងមិត្តភាពរវាងសង្គមស៊ីវិល ចិន-កម្ពុជា នៅក្នុងទីក្រុងប៉េកាំងនៃប្រទេសចិន កាលពីខែឧសភា។ កម្មវិធីនេះត្រូវបានរៀបចំដោយ China Foundation។

លោក លាង ដឺលុច ស្ថាបនិក និងជាអ្នកយកព័ត៌មានជាន់ខ្ពស់បានចូលរួមក្នុងវេទិកាសហប្រតិបត្តិការសារព័ត៌មានឆ្នាំ២០១៦ស្តីពី វិថីមួយ ខ្សែក្រវ៉ាត់មួយ និងវេទិកាសារព័ត៌មានអាស៊ានចិន នៅក្នុងទីក្រុងប៉េកាំងនៃប្រទេសចិន។ វេទិកាអន្តរជាតិប្រចាំឆ្នាំកាលពីខែកក្កដានេះ ត្រូវបានរៀបចំដោយកាសែត People’s Daily ដ៏មានឥទ្ធិពលរបស់ប្រទេសចិន។

លោក រំដួល ចិត្រា ជាការីនិពន្ធ ត្រូវបានស្ថានទូតចិនប្រចាំកម្ពុជាអញ្ជើញឲ្យចូលរួមយកព័ត៌មានក្នុងកម្មវិធីផ្លាស់ប្តូរពិសោធន៍ក្នុងការផ្សព្វផ្សាយរវាងអ្នកកាសែតចិននិងកម្ពុជា នៅក្នុងខេត្ត ជាំងស៊ូនៃប្រទេសចិន។ កម្មវិធីនេះបានប្រព្រឹត្តិទៅនៅក្នុងខែវិច្ឆិកា។

កញ្ញា ខន ចំប៉ា ដែលការីនិពន្ធ បានបំពេញបេសកកម្មនៅក្នុងប្រទេសថៃ និងប្រទេសវៀតណាម ក្នុងឆ្នាំ២០១៦។ នៅក្នុងខែកក្កដា កញ្ញា ខន ចំប៉ា ត្រូវបានជ្រើសរើសឲ្យចូលរួមក្នុងវគ្គបណ្តុះបណ្តាលស្តីពី Mekong partnership for the environment នៅក្នុងប្រទេសថៃ។ សិក្ខាសាលានេះត្រូវបានរៀបចំដោយអង្គការ Pact និង USAID។ បន្ទាប់មក នៅក្នុងសីហា ចំប៉ា ត្រូវបានអញ្ជើញឲ្យធ្វើទស្សនកិច្ចសិក្សានៅក្នុងប្រទេសវៀតណាម បន្ទាប់ពីកញ្ញាបានប្រឡងជាប់ចំណាត់ថ្នាក់លេខ ២ ក្នុងការប្រកួតប្រជែងអត្ថបទសារព័ត៌មានស្តីពីការពាក់មួកសុវត្ថិភាព។ ទស្សនកិច្ចសិក្សានេះត្រូវបានរៀបចំដោយអង្គការមូលនិធិបង្ការរបួសអាស៊ី AIP។

លោក រ៉ឹម ភារី ត្រូវបានជ្រើសរើសឲ្យចូលរួមក្នុងវគ្គបណ្តុះបណ្តាលស្តីពី ការប្រែប្រួលអាកាសធាតុនៅក្នុងទីក្រុងហាណូយនៃប្រទេសវៀតណាមកាលពីខែកញ្ញា។ វគ្គបណ្តុះបណ្តាលនេះដែលចូលរួមដោយអ្នកកាសែតនៃប្រទេសសមាជិកអាស៊ាន ត្រូវបានរៀបចំដោយសមាគមអ្នកកាសែតវៀតណាម។

លោក រឿន ភារុន បានចូលរួមក្នុងដំណើរទស្សនកិច្ចមួយទៅខេត្តហៃណាន (Hainan) ប្រទេសចិន នៅក្នុងខែធ្នូឆ្នាំ២០១៦។ ដំណើរទស្សនកិច្ចនេះត្រូវបានរៀបចំដោយក្រុមហ៊ុនទីភ្នាក់ងារទេសចរណ៍ចិន I Khmer trip ។

លោក ទេព ពិទូរ្យ ត្រូវបានអញ្ជើញឲ្យចូលរួមយកព័ត៌មានក្នុងព្រឹត្តិការណ៍ Ford Adventure ដែលជាកម្មវិធីប្រចាំឆ្នាំរបស់ក្រុមហ៊ុនរថយន្ត Ford។ វាជាកម្មវិធីធ្វើដំណើរតាមរថយន្ត Ford ដោយមានការចូលរួមពីអតិថិជនរបស់ Ford ពីប្រទេសកម្ពុជាទៅខេត្តបូរីរ៉ាំ នៃប្រទេសថៃ។

លោក អ៊ឹង ចំរើន ជានិពន្ធនាយក បានបំពេញបេសកកម្មការងារនៅក្នុងប្រទេសជប៉ុន និងនៅសាធារណរដ្ឋឆែកនៅក្នុងឆ្នាំ២០១៦នេះ។ នៅក្នុងព្រឹត្តិការណ៍សម្ពោធជើងហោះហើរផ្ទាល់របស់ក្រុមហ៊ុនអាកាសចរណ៍ជប៉ុន (តូក្យូ-ភ្នំពេញ) នៅដើមខែកញ្ញា ក្រសួងការបរទេសជប៉ុនបានអញ្ជើញលោក អ៊ឹង ចំរើន ឲ្យទស្សនកិច្ចប្រទេសជប៉ុន ដើម្បីបង្ហាញអំពីទំនាក់ទំនងរវាងជប៉ុន និងកម្ពុជា។ នៅក្នុងខែវិច្ឆិកា លោក អ៊ឹង ចំរើន ត្រូវបានអញ្ជើញឲ្យចូលរួមក្នុងវេទិកា MDIF Media Forum 2016 នៅក្នុងទីក្រុងប្រាកនៃសាធារណរដ្ឋឆែក។