រាជធានីភ្នំពេញ៖ ថ្ងៃទី០៥ ខែកុម្ភៈ ឆ្នាំ២០២១ - ក្រុម Green Terrance ដែលជាសេវាកម្មជួយអ្នកប្រើប្រាស់ បង្កើតសួនបន្លែតាមសំយ៉ាបផ្ទះ បានឈ្នះទឹកប្រាក់ ៣០០០ដុល្លារ ពីក្រុមហ៊ុន Smart Axiata ក្នុងកម្មវិធី SmartSpark។ កម្មវិធី SmartSpark ដែលបង្កើតឡើងសម្រាប់ជំរុញឲ្យមានការរីកដុះដាល នៃសហគ្រិនសង្គមនៅក្នុងប្រទេសកម្ពុជា ដើម្បីចូលរួមចំណែក ក្នុងការសម្រេចបាននូវគោលដៅអភិវឌ្ឍន៍ប្រកបដោយចីរភាព ជាសាកល (SDGs) ។
បង្កើតឡើងកាលពីខែសីហា ឆ្នាំ២០១៨ ដោយក្រុមហ៊ុន Smart Axiata និង Impact Hub Phnom Penh កម្មវិធី SmartSpark មានរយៈពេលបីឆ្នាំ ដែលមានកម្មវិធីរហូតដល់ប្រាំបួនជំនាន់ ក្នុងការស្វែងរកក្រុមសហគ្រិនវ័យក្មេង មានគំនិតបង្កើតអាជីវកម្មសង្គម ដែលចូលរួមចំណែក ក្នុងការអភិវឌ្ឍប្រកបដោយចីរភាព។
ក្រុម Green Terrance ត្រូវបានជ្រើសរើសជាជ័យលាភី ក្នុងចំណោមក្រុមសហគ្រិនសង្គមចំនួនប្រាំមួយក្រុម ដែលស្ថិតក្នុងជំនាន់ទី ៦ នៃកម្មវិធី SmartSpark ដែលផ្ដោតលើដំណោះស្រាយសង្គម និងគំនិតអាជីវកម្មផ្នែកបរិស្ថាន ជាពិសេសគឺបញ្ហា ប្លាស្ទិកប្រើបានតែមួយដង។ Green Terrace បង្កើតឡើងដើម្បីផ្តល់ជាសេវាកម្មរៀបចំសួនបន្លែតាមផ្ទះ ដែលមានផ្តល់ជាគ្រាប់ពូជ សម្ភារ និងការរៀបចំរចនា តាមតម្រូវការរបស់អតិថិជន។
ក្រុមទាំង៦ ក្រុមបានចំណាយពេល ៣ ខែ ធ្វើការជាមួយអ្នកណែនាំ និងអ្នកបណ្ដុះបណ្ដាលពី Impact Hub ដើម្បីអភិវឌ្ឍគំនិតរបស់ពួកគេ មុនពេលវគ្គជម្រុះចុងក្រោយ នៅថ្ងៃសុក្រ ទី២៩ ខែមករា។
សហស្ថាបនិក នៃ Green Terrace ឈ្មោះ ឈូន វីរៈរដ្ឋា បាននិយាយថា៖ «ខ្ញុំពិតជាមានមោទកភាព ចំពោះទំនុកចិត្តដែលសមាជិកក្រុមរបស់យើង បានបង្ហាញក្នុងកម្មវិធី។ សូមអរគុណដល់ Impact Hub Phnom Penh និងក្រុមហ៊ុន Smart Axiata ដែលបានផ្តល់ឱកាស និងការគាំទ្រផ្នែកហិរញ្ញវត្ថុ ដើម្បីអភិវឌ្ឍកម្មវិធីបស់យើង។ ហើយសេវាកម្មរបស់យើង នឹងមានឥទ្ធិពលធំធេង និងវិជ្ជមានទៅលើបរិស្ថាន»។
ក្នុងជំនាន់ទី៦ នៃកម្មវិធី SmartSpark (បរិស្ថាន) មានគំនិតអាជីវកម្មល្អៗ ចំនួនប្រាំមួយ ដើម្បីកំណត់ឥទ្ធិពលប៉ះពាល់លើបរិស្ថាន រួមមាន៖
- Et-Jay ដែលជាកម្មវិធីទូរសព្ទ app ដែលអាចឲ្យអ្នកប្រើប្រាស់អាចលក់វត្ថុ ដែលអាចកែច្នៃឡើងវិញបាន យ៉ាងងាយស្រួល និងជំរុញការប្រមូលដបប្លាស្ទិក កំប៉ុងអាលុយមីញ៉ូម និងវត្ថុដែលអាចកែច្នៃឡើងវិញបានផ្សេងទៀតផងដែរ។
- Bamboo Eco ផ្តល់ជាផលិតផលធ្វើពីឫស្សី ដែលគាំទ្រដល់កសិករ ដែលជាអ្នកផលិត ជំនួសឲ្យផលិតផលប្លាស្ទិក ដែលប្រើបានតែមួយដង ដូចជាដបឬកែវទឹកជាដើម។
- BestInBox ដែលជាវេបសាយ ជួយកាត់បន្ថយកាកសំណល់វេចខ្ចប់អាហារ តាមរយៈសម្ភារវេចខ្ចប់ ដែលមិនប៉ះពាល់ដល់បរិស្ថាន និងកញ្ចប់គ្រឿងផ្សំម្ហូប ដែលអ្នកចង់ចម្អិន ជាមួយការរៀបចំវេចខ្ចប់សម និងបរិមាណដែលអ្នកត្រូវការរួចជាស្រេច។
- Xpanz ជាក្រុមយុវជន ដែលលៃលកដោះស្រាយកាកសំណល់ ពីឧស្សាហកម្មកាត់ដេរ តាមរយៈការកែច្នៃសំណល់កំណាត់ ឬសម្លៀកបំពាក់ ចាស់ឲ្យចេញជាផលិតផលសម្រេចថ្មី។
- Mart Veckchob ដែលជាសេវាប្រើប្រាស់កញ្ចប់ដែលអាចប្រើឡើងវិញបាន ដើម្បីកាត់បន្ថយការប្រើប្រាស់ប្លាស្ទិក ដែលមិនចាំបាច់នៅក្នុងសេវាកម្មចែកចាយអាហារ។
អ្នកនាង Melanie Mossard នាយកនៃសហគ្រិនភាព និងនវានុវត្តន៍ ប្រចាំ Impact Hub Phnom Penh សរសើរ និងគាំទ្រដល់គំនិតផ្ដួចផ្ដើមនេះ។ អ្នកនាងបន្តថា៖ «នៅ Impact Hub យើងជឿថាសហគ្រិនភាព គឺជាផ្នែកមួយយ៉ាងសំខាន់ និងមានឥទ្ធិពលក្នុងការជួយរួមចំណែកដោះស្រាយ បញ្ហានៅជុំវិញខ្លួនយើង។ នៅក្នុងកម្មវិធី SmartSpark ជំនាន់ទី៦ នេះ យើងបានប្រមូលផ្តុំ នូវយុវជនដែលមានឆន្ទៈជា សហគ្រិនមកពីជំនាញខុសៗគ្នា ដូចជា កសិកម្ម វិស្វកម្ម រចនា និងជំនួញ ដែលពួកគាត់មានគោលជំហរួមមួយគឺ ស្វែងរក និងបង្កើតដំណោះស្រាយ។ អស់រយៈពេល ៣ខែ កន្លងមក ពួកគាត់បានចំណាយពេលសិក្សាពីចំណោទបញ្ហា សិក្សាពីទីផ្សារ បង្កើតជាគំរូផលិតផល និងសាកល្បងវាក្នុងទីផ្សារ។ យើងសង្ឃឹមថា កម្មវិធីនេះ និងផ្តល់ជាគ្រឹះសម្រាប់ឲ្យក្រុមរបស់ពួកគាត់ ដើម្បីអភិវឌ្ឍ ជំនាញ ចំណង់ចំណូលចិត្ត និងការតាំងចិត្តក្នុងការបង្កើតធុរកិច្ចបង្កើតថ្មី របស់ពួកគេ»។
លោក គាំ ទីវា ប្រធានផ្នែកកិច្ចការសាធារណៈ ប្រចាំក្រុមហ៊ុន Smart Axiata បានមានប្រសាសន៍ថា៖ «បម្រែបម្រួលអាកាសធាតុ និងផលប៉ះពាល់របស់យើង ទៅលើចីរភាពនៃបរិស្ថាន គឺជាបញ្ហាប្រឈមដ៏សំខាន់បំផុត ក្នុងជំនាន់របស់យើង ហើយយើងមិនសល់ពេលវេលាច្រើននោះទេ ដើម្បីផ្លាស់ប្តូរអ្វីដែលយើងចាំបាច់។ ខណៈពេលដែលវាងាយនឹងមានទុទិដ្ឋិនិយម អំពីស្ថានភាពនៃភពផែនដីរបស់យើង នេះគឺជាសកម្មភាពលើកទឹកចិត្ដមួយ ដែលបានចែករំលែកនូវចំណង់ចំណូលចិត្ត និងការប្តេជ្ញាចិត្តពីសហគ្រិនសង្គមវ័យក្មេង ក្នុងកម្មវិធី SmartSpark ជំនាន់ទី៦ ដែលយល់ដឹងថា អ្នកអាចធ្វើឱ្យមានការផ្លាស់ប្តូរពិតប្រាកដ សូម្បីតែនៅកម្រិតសហគមន៍មូលដ្ឋាន ដោយការអភិវឌ្ឍគំនិតឆ្លាតវៃ ដែលលើកកម្ពស់ការយល់ដឹងអំពីបញ្ហា និងជួយដោះស្រាយបញ្ហាជីវិតពិត»៕
(អត្ថបទពាណិជ្ជកម្ម)