ជាតិ
បុរាណវិទូ លឹម វណ្ណច័ន្ទ ពន្យល់ពីប្រវត្តិនៃការសង់ស្ដូបបុរីអូរស្វាយ នៅស្ទឹងត្រែង
× ស្ទឹងត្រែង៖ នៅពេលភ្ញៀវទេសចរ បានទៅដល់ស្រុកបុរីអូរស្វាយ ខេត្តស្ទឹងត្រែង ប្រាកដជាបានឃើញស្តូបបុរាណមួយ មានរាងដូចជួង កម្ពស់៤ម៉ែត្រ នៅក្បែរមាត់ទន្លេមេគង្គ ដែលមានចម្លាក់៤ជ្រុង។ លោក លឹម វណ្ណច័ន្ទ បុរាណវិទូនៃក្រសួងបរិស្ថាន ពន្យល់ថា ស្ដូបនេះ ជានិមិត្តរូបនៃការសាងសង់ ដែលចង់បង្ហាញពីព្រះរាជសកម្មភាពរបស់ព្រះបាទ នរោត្តម សីហនុ ក្នុងសម័យសង្គមរាស្ត្រនិយម។
សូមអញ្ជើញលោក-អ្នកនាង ទស្សនាបទសម្ភាសរវាងកញ្ញា ផាត ដាណេ អ្នកសារព័ត៌មាន នៃសារព័ត៌មាន ThmeyThmey25 និងលោក លឹម វណ្ណច័ន្ទ បុរាណវិទូនៃក្រសួងបរិស្ថាន ខាងក្រោមដូចតទៅ៖
លោក លឹម វណ្ណច័ន្ទ បញ្ជាក់ថា ស្ដូបបុរីអូស្វាយ ត្រូវបានសាងសង់ឡើងក្នុងសម័យព្រះករុណាព្រះបាទនរោត្តមសីហនុ ឆ្នាំ១៩៦៤។ ក្នុងអតីតកាល បុរីអូរស្វាយ បានរៀបចំទៅជាកូនក្រុងមួយ មានសួនច្បារ មានផ្ទះពលរដ្ឋជាច្រើនរស់នៅជុំវិញទីនោះ ដែលមានសាលារៀន និងមន្ទីរពេទ្យផងដែរ។ រហូតដល់ឆ្នាំ២០១៩ រដ្ឋាភិបាលបានផ្លាស់ប្តូរទីនោះ ទៅជាស្រុកបូរីអូរស្វាយសែនជ័យ នៃខេត្តស្ទឹងត្រែង វិញ។
ស្តូបបុរីអូរស្វាយនេះ ត្រូវបានព្រះបាទ នរោត្តម សីហនុ បង្កើតឡើងដើម្បីការពារព្រំដែនកម្ពុជា ពីការឈ្លានពានរបស់ប្រទេសជិតខាង។ មុនពេលបង្កើតក្រុងនៅគ្រានោះ បុរីអូរស្វាយ មិនមានមនុស្សរស់នៅឡើយ ប៉ុន្តែព្រះបាទសីហនុ បានកេណ្ឌពលរដ្ឋគ្មានផ្ទះសម្បែង ឲ្យមករស់នៅ និងប្រកបរបរចិញ្ចឹមជីវិត ក្នុងតំបន់នោះ។ នេះបើតាម ឯកសារពីការស្រាវជ្រាវរបស់លោកបុរាណវិទូ លឹម វណ្ណច័ន្ទ។
លោក បុរាណវិទូរូបនេះ បានប្រាប់ ThmeyThmey25 ដូច្នេះថា៖
«ស្តូបនេះជានិមិត្តរូបនៅពេលសាងសង។ យើងចង់និយាយថា យើងសម្គាល់មួយ ជាស្នាព្រះហស្ថរបស់ព្រះអង្គ ដូចយើងឃើញអ៊ីចឹង។ ស្តូបនេះមាន៨ជ្រុង ហើយបានបង្ហាញពីព្រះរាជសកម្មភាពរបស់ព្រះអង្គខ្លះដែរ។ យើងអាចដើរពិនិត្យមើលទៅ ដូចជាមានរូប ពេលព្រះអង្គឡើងគ្រងរាជ្យ ព្រះសកម្មភាពព្រះអង្គធ្វើពលកម្មជាមួយប្រជាជន និងកីឡា»។
មានរាងដូចជួង កម្ពស់៤ម៉ែត្រ និងមានជ្រុងចំនួន៨ អមដោយផ្ទាំងចម្លាក់ថ្ម ស្តូបបុរីអូរស្វាយ បង្ហាញពី ព្រះរាជសកម្មភាពរបស់ព្រះបាទ នរោត្តម សីហនុ ក្នុងសម័យសង្គមរាស្ត្រនិយម។ ក្នុងការរៀបចំក្រុងបុរីអូរស្វាយនៅសម័យនោះ ព្រះបាទ នរោត្តម សីហនុ ក៏បានចូលរួមសម្ពោធ នៅថ្ងៃទី១៧ ខែឧសភា ឆ្នាំ១៩៦៨ ផងដែរ។
មកទល់ពេលបច្ចុប្បន្ន ស្រុកបូរីអូរស្វាយសែនជ័យ ក្នុងខេត្តស្ទឹងត្រែង មានឃុំចំនួន៣ ដូចជា ឃុំកោះស្នែ មានភូមិចំនួន៣, ឃុំអូរស្វាយ មានភូមិចំនួន៥ និងឃុំព្រះរំកិល មានភូមិចំនួន៨។ លើសពីនោះ ស្រុកបូរីអូរស្វាយសែនជ័យ បានក្លាយជាតំបន់សក្ដានុពលទេសចរណ៍ធម្មជាតិមួយក្នុងប្រទេសកម្ពុជា មានទាំងធនធានធម្មជាតិចម្រុះ ព្រៃលិចទឹកតាមដងទន្លេមេគង្គ ជង្រុកមច្ឆជាតិ ទីតាំងប្រវត្តិសាស្ត្រ រួមទាំងរក្សាបានការរស់នៅបែបប្រពៃណីថែមទៀតផង៕
Tag:
ស្ដូបបុរាណ
ស្ទឹងត្រែង
© រក្សាសិទ្ធិដោយ thmeythmey.com