ជាតិ
រូបពីហ្វេសប៊ុកមជ្ឈមណ្ឌលសកម្មភាពកំចាត់មីនកម្ពុជា - CMAC
×![]()
ដោយ: ឡាយ សុភាវតី
ភ្នំពេញ៖ ទោះបីវិស័យបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះ ជាការងារប្រឈមនឹងគ្រោះថ្នាក់និងជួបបញ្ហាលំបាកច្រើនក៏ពិតមែន ប៉ុន្តែចំនួនក្រុមការងារស្រី្តក្នុងវិស័យនេះ នៅតែបន្តកើនឡើង ហើយដើរតួនាទីកាន់តែសំខាន់។ មិនត្រឹមតែធ្វើការងារបោសសម្អាតមីនបានយ៉ាងល្អនោះទេ ស្ត្រីបោសសម្អាត ក៏ដើរតួនាទីយ៉ាងសំខាន់ក្នុងការបញ្ជ្រាបចំណេះដឹងដល់ពលរដ្ឋ និងពង្រឹងវិន័យក្នុងក្រុមការងារទៀតផង។ 
ជាអ្នកប្រតិបត្តិការផ្ទាល់លើវិស័យបោសសម្អាតមីន លោកស្រី ស្រៀង ស្រីនី រៀបរាប់ថា ខ្លួនមិនមានការព្រួយបារម្ភក្នុងពេលចុះប្រតិបត្តិការកំចាត់មីននោះទេ ព្រោះលោកស្រី និងក្រុមការងារសុទ្ធតែទទួលបានការបណ្ដុះបណ្ដាលនិងមានបទពិសោធន៍។ ប៉ុន្តែបញ្ហាលំបាកសម្រាប់អ្នកឯកទេសកំចាត់មីនរបស់ CMAC រូបនេះ គឺការចុះប្រតិបត្តិការឆ្ងាយពីផ្ទះទៅចំការមីន ដោយត្រូវហាលខ្យល់ ហាលភ្លៀងគ្រប់ពេល ខុសពីការងារនៅការិយាល័យ។
កញ្ញា ស្រៀង ស្រីម៉ៅ (មានកន្សែងបង់ក ដៃកាន់ស្លាកសញ្ញាមីន) និងក្រុមការងារ CMAC ចុះផ្សព្វផ្សាយការយល់ដឹងអំពីមីនដល់ពលរដ្ឋនៅតាមមូលដ្ឋាន។
«ដោយសារចិត្តស្រលាញការងារនេះ ទើបតស៊ូជម្នះរាល់ការលំបាក ប្រសិនបើអ្នកគ្មានចំណូលចិត្តនឹងការងារនេះ គឺងាយនឹងបោះបង់ចោលណាស់។ រដូវភ្ញៀងពិបាកធ្វើដំណើរ ពិបាកចុះប្រតិបត្តិការដោះមីន ព្រោះដីសើម។ ហើយរដូវប្រាំងក្ដៅខ្លាំង ដូចដឹងហើយចំការមីនឬកន្លែងចុះបោសសម្អាតមីននៅតាមវាល ក្នុងដុបព្រៃ...»។ នេះបើតាមការលើកឡើងរបស់លោកស្រី នី ដែលលើកទឹកចិត្តឲ្យស្រី្តដទៃ បន្តជម្នះរាល់ការងារលំបាករបស់ខ្លួន ពិសេសស្រី្តក្នុងវិស័យដោះមីន។
លោកស្រី នី ដែលមានបំណងចង់ជួយពលរដ្ឋឲ្យជៀសផុតពីគ្រោះថ្នាក់បង្កដោយគ្រាប់មិនទាន់ផ្ទុះ តែងចុះជួបពលរដ្ឋនិងចែករំលែកការយល់ដឹងអំពីគ្រាប់មិនទាន់ផ្ទុះ ដល់ពលរដ្ឋតាមតំបន់ជាហូរហែផងដែរ។
លោកស្រី ជឹម ស្រីម៉ៅ ប្រធានក្រុមសុនខហិតមីន ថ្លែងប្រាប់សារព័ត៌មានថ្មីៗថា ខ្លួនតស៊ូជាមួយការងារវិស័យបោសសម្អាតមីននេះ អស់ជាង២០ឆ្នាំហើយ។ សម្រាប់លោកស្រី ម៉ៅ ការងារប្រចាំថ្ងៃមិនសូវលំបាកខ្លាំងនោះទេ ព្រោះមានបទពិសោធន៍យូរឆ្នាំមកហើយ។ លោកស្រីក៏បានលើពីបញ្ហាប្រឈមដូចកញ្ញាស្រីនីដែរ គឺស្ថានភាពផ្លូវពិបាកធ្វើដំណើរទៅតំបន់ប្រតិបត្តិការកំចាត់មីន។
កញ្ញា ស្រៀង ស្រីម៉ៅ ចុះស្រាវជ្រាវរកគ្រាប់មិនទាន់ផ្ទុះ។
«សុនខដែលចុះប្រតិបត្តិការ គឺទទួលបានការបង្ហាត់រួចហើយ ប៉ុន្តែយើងនូវតែត្រូវការអ្នកដែលចេះស្រលាញ់សត្វ ការអត់ធ្មត់ខ្ពស់ ពិសេសស្រី្ត។ ត្បិតស្រី្តកម្លាំងខ្សោយ តែមានការតស៊ូ ល្អិតល្អន់ជាមួយការងារជាងបុរស។ ប៉ុន្តែការងារប្រចាំក្រុមត្រូវតែមានសមាជិកទាំងស្រី្តនឹងបុរសទើបការងារដំណើរការបានល្អ»។ នេះបើតាមការលើកឡើងរបស់លោកស្រី ម៉ៅ ដោយជំរុញឲ្យស្រី្តចូលរួមការងារក្នុងវិស័យដោះមីនឲ្យបានកាន់តែច្រើន ដើម្បីជួយដល់សង្គម។
លោកស្រីក៏បានណែនាំថា ការងារបោសសម្អាតមីននេះ មិនមែនជាការងារគ្រោះថ្នាក់ឡើយ ព្រោះក្រុមការងារមានការបណ្ដុះបណ្ដាលច្បាស់លាស់ ហើយចុះប្រតិបត្តិការមួយអ្នកមានបទពិសោធន៍។
ក្នុងកិច្ចសម្ភាសន៍ជាមួយសារព័ត៌មានថ្មីៗ (Thmey Thmey) លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានបញ្ជាក់ថា ស្រី្តដែលធ្វើការផ្ទាល់ផ្នែកដោះមីន គឺជួបបញ្ហាលំបាកច្រើន ពិសេសនៅពេលមានគភ៌(ផ្ទៃពោះ) ព្រោះការងារនេះ ទាមទារឲ្យលូនក្រាបឬចាក់ឆ្កឹះគ្រាប់មីន ដែលអាចនឹងប៉ះពាល់ដល់សុខភាពស្រី្ត។ ដូច្នេះ លោក ហេង រតនា អះអាងថា CMAC មានគោលការផ្លាស់ប្ដូរក្រុមស្រី្តដែលមានគភ៌ ឲ្យក្លាយជាជំនួយការនៃក្រុមបោសសម្អាតវិញ។
លោក ហេង រតនា សង្កត់ធ្ងន់ថា៖ «ស្រី្តដើរតួនាទីសំខាន់ច្រើនយ៉ាងក្នុងវិស័យបោសសម្អាតមីននេះ គឺជួយបញ្ជ្រាបចំណេះដឹងពីគ្រាប់មីនបានយ៉ាងល្អដល់ពលរដ្ឋ ពិសេសកុមារនិងស្រី្ត។ ស្រី្តថែមទាំងជាអ្នកចូលរួមយ៉ាងសកម្មក្នុងការរៀបចំផែនការយុទ្ធសាស្ត្របោសសម្អាតមីន, ការចូលរួមដោះគ្រាប់មិនទាន់ផ្ទុះគ្រប់ប្រភេទ និងជួយចូលរួមពង្រឹងវិន័យក្នុងសកម្មភាពដោះមីនបានយ៉ាងប្រុងប្រយ័ត្នទៀត»។
របាយការណ៍របស់ CMAC បានបញ្ហាញថា ចំនួនស្រី្តនៅអង្គភាពរបស់ខ្លួន គឺមានកម្លាំងស្ត្រី១២ភាគរយ ពោលគឺមានជាង១៧០នាក់ ក្នុងចំណោមបុគ្គលិករួមជាង១៣០០នាក់។ ចំនួននេះ គឺមានការកើនឡើង គួរឲ្យកត់សម្គាល់ បើធៀបនឹងឆ្នាំ២០០៥ CMAC មានចំនួនស្រី្តប្រមាណតែ២ភាគរយនៃចំនួនបុគ្គលិករួមប៉ុណ្ណោះ។ សូមជម្រាបថា នៅឆ្នាំ២០២០នេះ CMAC បានរកឃើញនិងបំផ្លាញគ្រាប់មីននិងគ្រាប់មិនទាន់ផ្ទុះជាង៤ម៉ឺនគ្រាប់៕
លោកស្រី ជឹម ស្រីម៉ៅ ប្រធានក្រុមសុនខចុះស្រាវជ្រាវរកគ្រាប់មិនទាន់ផ្ទុះ។
Tag:
ស្រី្តអ្នកដោះមីន
© រក្សាសិទ្ធិដោយ thmeythmey.com
