ជាតិ
កសិផលធ្លាក់ចុះ! កសិករគួរយល់ដឹងពីវិធីក្នុងការច្នៃផលិតផលកសិកម្ម ផលប៉េងប៉ោះដែលកសិករប្រមូលបាន(រូបពីហ្វេសប៊ុកលោក វេង សាខុន)
× ភ្នំពេញ៖ បច្ចុប្បន្ន តម្លៃផលិតផលកសិកម្មមួយចំនួនមានការធ្លាក់ថ្លៃ ធ្វើឲ្យកសិករពិបាកនឹងទទួលបានប្រាក់ចំណេញ។ គេអាចយកផលិតផលកសិកម្មទាំងនោះ ទៅច្នៃជាដំណាប់ ឬទឹកផ្លែឈើបាន។ ដើម្បីចៀសវាងការទុំជ្រុះចោល កសិករគួរស្វែងរកវិធីច្នៃផលិតផលទាំងនោះ ព្រោះអាចរក្សាទុកបានយូរ និងមានការចាប់អារម្មណ៍ពីអតិថិជនទៀតផង។
សម្រាប់កសិផលដែលអាចយកទៅច្នៃមានដូចជា ផ្លែស្វាយ ប៉េងប៉ោះ ត្រឡាច ខ្នុរ ចេក ល្ពៅ ល្ហុង ម្នាស់ ជាដើម។ ថ្ងៃនេះសារព័ត៌មានThmeyThmey25 សូមលើកយកវិធីច្នៃផលិតផលកសិកម្ម ដើម្បីរក្សាទុកបានយូរ ពីសៀវភៅបច្ចេកទេសកសិកម្មរបស់ក្រសួងកសិកម្ម រុក្ខាប្រមាញ់និងនេសាទ ចែករំលែកដល់បងប្អូនដើម្បីងាយស្រួលក្នុងការច្នៃផលិតផលកសិកម្ម។
ការធ្វើដំណាប់ផ្លែឈើ៖ ការធ្វើដំណាប់ចែកចេញជា២របៀប មានការធ្វើដំណាប់របៀប បន្ទះ រឹងស្ងួត និងការធ្វើដំណាប់របៀបខាប់។ ត្រូវយកផ្លែឈើដែលទុំ ឬទុំដោយបន្ទុំ សម្រាប់ធ្វើដំណាប់ បន្ទាប់មកត្រូវបកសម្បក និងយកគ្រាប់ចេញ។ សម្រាប់គ្រឿងផ្សំរួមមាន៖ ផ្លែឈើ,ស្ករស,អំបិល,កំបោរ(បើផ្លែឈើ១គីឡូ ក្រាមត្រូវប្រើកំបោរ១ខាំ) និងសម្ភារសម្រាប់ទុកដាក់។
របៀបធ្វើ៖ ត្រូវយកផ្លែឈើមកត្រាំទឹក(ដាក់តាមប្រភេទផ្លែឈើ) រួចផ្អាប់ទុកមួយយប់។ បន្ទាប់ពីត្រាំបានមួយយប់ ត្រូវស្រង់ឲ្យស្រស់ទឹក រួចយកទៅហាលថ្ងៃបានស្ងួត។ នៅពេលផ្លែឈើហាលបានស្ងួតហើយ ត្រូវយកទៅត្រាំទឹកអំបិលផ្អាប់ទុកមួយយប់ បន្ទាប់មកស្រង់ឲ្យស្រស់ទឹក។ បន្ទាប់មកទៀតត្រូវយកទៅប្រឡាក់ជាមួយស្ករ រួចយកទៅហាលជាការស្រេច។ ការវេចខ្ចប់បានត្រឹមត្រូវ នឹងអាចរក្សាទុកក្នុងរយៈពេលពី ៤ខែទៅ ៦ខែ។
ការធ្វើដំណាប់ផ្លែឈើខាប់៖ សម្រាប់ដំណាប់ម្នាស់ ត្រូវមានផ្លែម្នាស់១គីឡូក្រាម(ចិតសម្បក ឆ្កឹះបណ្ដូលចេញ) ស្ករស១គីឡូក្រាម និងអំបិលកន្លះស្លាបព្រាកាហ្វេ។
របៀបធ្វើ៖ យកម្នាស់ដែលចិតរួចនោះទៅកិនដោយម៉ាស៊ីកាឡុក(រួចច្រោះកាកចេញ) លាយជាមួយស្ករស។ បន្ទាប់មកត្រូវយកទឹកម្នាស់ដែលកិនរួចនោះទៅដាក់ដាំជាមួយស្ករ(ដាក់ភ្លើងតិចៗ រួចកូរយឺតៗ) ហើយត្រូវកូររហូតដាច់ជាតិទឹក។ បន្ទាប់ពីកូរឲ្យដាច់ទឹក ត្រូវចាក់ក្នុងកែវរក្សាទុកឲ្យបានល្អជាការស្រេច។
យើងអាចកែច្នៃផ្លែឈើដទៃតាមរបៀបខាងលើនេះ សម្រាប់ជាចំណីទទួលទានខ្លួនឯង និងលក់ដើម្បីបន្ថែមប្រាក់ចំណូល។ ការធ្វើបែបនេះនឹងជួយកសិករមួយផ្នែក ដើម្បីកាត់បន្ថយការខាតដើមទុននៅពេលកសិផលគ្មានទីផ្សារ៕
© រក្សាសិទ្ធិដោយ thmeythmey.com