ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
អត្ថបទពាណិជ្ជកម្ម
បទយកការណ៍/សម្ភាស
COVID-19
ជាតិ
ត្រឹម២០ថ្ងៃ ព្រឹត្តិការណ៍២០កុម្ភៈ មានអ្នកឆ្លងច្រើនជាងពាក់កណ្តាលនៃករណីសរុប ស្លាប់១នាក់
11, Mar 2021 ,
7:26 pm
រូបភាព
×
ដោយ:
អុឹង ចំរើន (Ung Chamroeun)
ព្រឹត្តិការណ៍សហគមន៍២០កុម្ភៈ អូសបន្លាយបាន២០ថ្ងៃហើយ ដោយគិតត្រឹមថ្ងៃទី១១ ខែមីនា នេះ ដែលក្នុងនោះមានអ្នកឆ្លង៦៥២នាក់ក្នុងចំណោមករណីសរុប១១៦៣នៅក្នុងប្រទេសកម្ពុជា។ ព្រឹត្តិការណ៍នេះ បង្កឲ្យមានករណីស្លាប់ដំបូងបំផុតក្នុងប្រទេស ដោយអ្នកជំងឺជា
ជនជាតិខ្មែរអាយុ៥០ឆ្នាំ
។
កម្ពុជាបានប្រកាសពីករណីកូវីដ-១៩ ដំបូងបំផុតកាលពីថ្ងៃទី២៧ ខែមករា ឆ្នាំ២០២០ ដោយអ្នកជំងឺជាទេសចរជនជាតិចិនអាយុ៥០ឆ្នាំ ម្នាក់នៅខេត្តព្រះសីហនុ។ សម្រាប់ជនជាតិខ្មែរ អ្នកជំងឺដំបូងបំផុតគឺបុរសអាយុ៣៨ឆ្នាំម្នាក់នៅខេត្តសៀមរាប ដែលត្រូវបានប្រកាសកាលពីថ្ងសទី៧ ខែមីនា ឆ្នាំ២០២០។
ក្រោយមក ករណីនាំចូលពីបរទេសទាំងពលរដ្ឋខ្មែរ និងបរទេស កើតមានជាបន្តបន្ទាប់ ដោយរាប់ទាំងពលរដ្ឋទៅចូលរួមពិធីសាសនា រួមទាំងមន្ត្រីទូត ខណៈមនុស្សពាក់ព័ន្ធជាច្រើននាក់ត្រូវបានតម្រូវឲ្យធ្វើចត្តាឡីស័ក។ កម្ពុជា ក៏មានប្រវត្តិព្យាបាលអ្នកជំងឺជាសះស្បើយ១០០ភាគរយចំនួន២លើកផងដែរ។
«ព្រឹត្តិការណ៍៣វិច្ឆិកា» ត្រូវបានចាត់ទុកថា ជាករណីឆ្លងតគ្នាលើកដំបូងនៅកម្ពុជា ដោយប្រមុខរដ្ឋាភិបាល សម្រេចហៅឈ្មោះបែបនេះ ដើម្បីកុំឲ្យប៉ះពាល់ដល់ទំនាក់ទំនងការទូតកម្ពុជា-ហុងគ្រី។ ករណីនេះ បានកើតឡើងនាដំណើរទស្សនកិច្ចរបស់រដ្ឋមន្ត្រីការបរទេសហុងគ្រីនៅកម្ពុជា ហើយរដ្ឋមន្ត្រីនេះ មានលទ្ធផលតេស្តវិជ្ជមានកូវីដ-១៩។
សម្តេច ហ៊ុន សែនផ្ទាល់ រួមជាមួយមន្ត្រីជាន់ខ្ពស់ ក្រុមគ្រួសារ និងអ្នកពាក់ព័ន្ធដោយប្រយោល និងផ្ទាល់ សរុបជាង១៨០០នាក់ បានធ្វើតេស្ត និងធ្វើចត្តាឡីស័ក ហើយលទ្ធផលមានតែមនុស្ស៤នាក់ប៉ុណ្ណោះ វិជ្ជមានកូវីដ-១៩ ដែលក្នុងនោះមានអ្នកតំណាងរាស្ត្រមួយរូប មន្ត្រីជាន់ខ្ពស់ក្រសួងកសិកម្ម១រូប អង្គរក្សការពារ១រូប និងទូតហុងគ្រីប្រចាំកម្ពុជា-វៀតណាម។
នៅថ្ងៃទី១៨ ខែវិច្ឆិកា សម្តេចនាយករដ្ឋមន្ត្រី ហ៊ុន សែនបានប្រកាសបិទ «ព្រឹត្តិការណ៍៣វិច្ឆិកា» ពោលគឺបន្ទាប់ពីសម្តេច និងភរិយា ក៏ដូចជាមន្ត្រីជាន់ខ្ពស់ផ្សេងទៀតសុទ្ធតែមានលទ្ធផលអវិជ្ជមាន ក្រោយតេស្តចំនួន៤លើក និងឈានដល់គម្រប់ពេលវេលានៃការធ្វើចត្តាឡីស័ក។
មិនមានគម្លាតពេលយូរឡើយ ព្រឹត្តិការណ៍សហគមន៍មួយទៀត បានកើតឡើង ដោយសម្តេចនាយករដ្ឋមន្ត្រី កំណត់ឈ្មោះថា «ព្រឹត្តិការណ៍សហគមន៍២៨វិច្ឆិកា»។ ព្រឹត្តិការណ៍នេះ សំដៅលើការរកឃើញករណីជំងឺកូវីដ-១៩ លើស្ត្រីម្នាក់ជាភរិយាមន្ត្រីជាន់ខ្ពស់ក្រសួងមហាផ្ទៃ ហើយឆ្លងតៗគ្នាជាបន្តបន្ទាប់ក្នុងក្រុមគ្រួសារ និងអ្នកពាក់ព័ន្ធ។
សម្តេច ហ៊ុន សែន បានចាត់ទុកថា នេះជាព្រឹត្តិការណ៍ឆ្លងសហគមន៍លើកដំបូងនៅកម្ពុជា ហើយការដាក់ឈ្មោះព្រឹត្តិការណ៍សហគមន៍២៨វិច្ឆិកា គឺដើម្បីទប់ស្កាត់កុំឲ្យមានការរើសអើងលើបុគ្គល។ ហាងមួយចំនួននៅរាជធានីភ្នំពេញ ត្រូវបានតម្រូវឲ្យបិទទ្វារជាបណ្តោះអាសន្ន ខណៈបុគ្គលិក និងអតិថិជន ត្រូវរកឃើញករណីវិជ្ជមានជាបន្តបន្ទាប់។
ពីទីក្រុងតាខ្មៅ សម្តេច ហ៊ុន សែន
បានប្រកាសបិទបញ្ចប់ព្រឹត្តិការណ៍នេះ
ក្រោយអ្នកជំងឺសះស្បើយជាបន្តបន្ទាប់ក្នុងចំណោមករណីវិជ្ជមាន៤១នាក់ ប៉ុន្តែសម្តេចបានព្រមានពីការរាលដាលសារជាថ្មី ប្រសិនបើពលរដ្ឋខ្មែរ មិនគោរពតាមវិធានការក្រសួងសុខាភិបាលឲ្យបានត្រឹមត្រូវ។
ចាប់ពីថ្ងៃទី២០ ខែធ្នូ ឆ្នាំ២០២០ មក ប្រទេសថៃមានករណីឆ្លងចូលសហគមន៍ដ៏ច្រើន ជាពិសេសក្នុងចំណោមពលករបរទេសដែលរស់នៅទីនោះ។ ពលករខ្មែរបានវិលមកកាន់ប្រទេសវិញជាបន្តបន្ទាប់ បើទោះបីជាប្រមុខរដ្ឋាភិបាលស្នើឲ្យពួកគេបន្តនៅថៃក៏ដោយ។
ក្រោយការមកដល់នៅតាមច្រកព្រំដែន និងការតេស្តនាអំឡុងចត្តាឡីស័ក ពលរដ្ឋសរុប៩០នាក់ (ស្រី៦៩នាក់) តេស្តវិជ្ជមានកូវីដ-១៩ ហើយត្រូវបានដាក់ឲ្យសម្រាកព្យាបាលនៅតាមមន្ទីរពេទ្យបង្អែកនៃបណ្តាខេត្តជាប់ព្រំដែនរួម បន្ទាយមានជ័យ ប៉ៃលិន បាត់ដំបង និងឧត្តរមានជ័យ។ នៅថ្ងៃទី២ ខែមីនា ក្រសួងសុខាភិបាល បានប្រកាសពីករណីជាសះស្បើយចុងក្រោយក្នុងចំណោមពលករ។
ខណៈស្ថានភាពឆ្លងកូវីដ-១៩ ក្នុងចំណោមពលករស្ងប់ស្ងាត់ ស្រាប់តែសម្តេចនាយករដ្ឋមន្ត្រី ហ៊ុន សែន បានប្រកាសតាមកញ្ចក់ទូរទស្សន៍ និង Facebook Live ពីក្រុងតាខ្មៅនូវ «ព្រឹត្តិការណ៍សហគមន៍ ២០កុម្ភៈ»។ បើតាមសម្តេច ករណីនេះ កើតឡើងក្រោយមានការបើកដៃពីសំណាក់សន្តិសុខនៅសណ្ឋាគារសុខា ឲ្យស្ត្រីចិន៤នាក់ចេញពីកន្លែងចត្តាឡីស័កដែលក្នុងនោះមាន២នាក់វិជ្ជមានកូវីដ-១៩។
ការឆ្លងរាលដាលជាបន្តបន្ទាប់កើតចេញពីក្លិបកម្សាន្តដែលមានឈ្មោះថា N8 ជាពិសេសក្នុងចំណោមជនជាតិចិន។ អាជ្ញាធរបានឃើញករណីនេះ បន្ទាប់ពីជនជាតិចិនបានទៅសុំលិខិតបញ្ជាក់សុខភាព ករណីឆ្លងចេះតែកើនឡើងពីមួយថ្ងៃទៅមួយថ្ងៃក្នុងចំណោមជនជាតិចិន ខ្មែរ វៀតណាម និងជាតិសាសន៍ដទៃ។ ទីតាំងជាច្រើនត្រូវបានបិទទ្វារ ហើយកន្លែងព្យាបាល និងមណ្ឌលចត្តាឡីស័កត្រូវបានរៀបចំឡើងជាបន្តបន្ទាប់។
ផ្តើមចេញពីរាជធានីភ្នំពេញ ករណីសហគមន៍២០កុម្ភៈ រាលដាលដល់ខេត្តកណ្តាល បន្តទៅខេត្តព្រះសីហនុ ដែលសម្បូរទៅដោយជនជាតិចិនរស់នៅ។ ខេត្តផ្សេងទៀតដែលមានករណីសហគមន៍នេះដែរ រួមមាន ព្រៃវែង ស្វាយរៀង កោះកុង កំពង់ធំ កំពង់ចាម សៀមរាប និងបាត់ដំបង។
ករណីសហគមន៍២០កុម្ភៈកើនដល់៦៥២នាក់ក្នុងចំណោមតួលេខសរុប១១៦៣នាក់នៅកម្ពុជា ដោយគិតត្រឹមសេចក្តីប្រកាសថ្ងៃទី១០ ខែមីនា ឆ្នាំ២០២១។ កន្លងមក អ្នកជំងឺជនជាតិចិនម្នាក់បានស្លាប់នៅមណ្ឌលចត្តាឡីស័ក ដោយក្រសួងសុខាភិបាលអះអាងថា មិនមែនដោយសារកូវីដ-១៩ឡើយ តែពីរើមេថ្នាំញៀនធ្ងន់ធ្ងរ បណ្តាលឲ្យគាំងបេះដូងស្លាប់។
២០ថ្ងៃក្រោយព្រឹត្តិការណ៍សហគមន៍នេះ កម្ពុជាបានប្រកាសពីករណីស្លាប់ដំបូង ដោយអ្នកជំងឺជាបុរសជនជាតិខ្មែរអាយុ៥០ឆ្នាំ។ គាត់បានស្លាប់នៅវេលាម៉ោង១០ និង៤០នាទីព្រឹកថ្ងៃទី១១ ខែមីនា ក្រោយត្រូវបានរកឃើញវិជ្ជមានកូវីដ-១៩ កាលពីថ្ងៃទី២៧ ខែកុម្ភៈ។ បុរសដែលស្លាប់ដំបូងនេះ មានលំនៅដ្ឋាននៅសង្កាត់ចាក់អង្រែ ខណ្ឌមានជ័យ ជាអ្នកបើកបររថយន្តឲ្យថៅកែជនជាតិចិននៅខេត្តព្រះសីហនុ។
បច្ចុប្បន្នកម្ពុជាកំពុងដំណើរការចាក់វ៉ាក់សាំងកូវីដ-១៩ ដោយវ៉ាក់សាំងស៊ីណូហ្វាមដែលជាជំនួយរបស់ចិន ត្រូវចាក់ជូនអ្នកដែលមានអាយុពី១៨ទៅ៥៩ឆ្នាំ រីឯវ៉ាក់សាំងកូវីសែល (Covisheld) ដែលទទួលអាជ្ញាបណ្ណផលិតដោយក្រុមហ៊ុន AstraZeneca សម្រាប់ក្រុមមនុស្សអាយុចាប់ពី៦០ឆ្នាំឡើងទៅ។ ការចាក់វ៉ាក់សាំងស៊ីណូហ្វាម សម្រាប់ដូសទី១ឈានដល់ការផ្អាកបណ្តោះអាសន្នជាបន្តបន្ទាប់ ប៉ុន្តែនៅដំណើរការសម្រាប់អ្នកចាក់ដូសទី២ ខណៈកម្ពុជាកំពុងចាំការមកដល់បន្ថែមនូវវ៉ាក់សាំងដែលជាជំនួយចិន និងការត្រៀមបញ្ជាទិញផ្សេងៗ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
អត្ថបទពេញនិយម
សណ្ដែកកួរ ឡើងដល់៤ម៉ឺនរៀល ក្នុងមួយគីឡូក្រាម
5 ថ្ងៃ
«ប្រទានកម្ម»មានន័យដូចម្តេច?
2 ម៉ោង
«ប្រសប់»និង«ប្រសព្វ» មានសូរសព្ទដូចគ្នា តែន័យខុសគ្នា!
1 សប្តាហ៍
តើពេលណាដែលគេសរសេរ«បរិបូរ, បរិបូណ៌ និង បរិបូរណ៍»នៅក្នុងសំណេរភាសាខ្មែរ?
1 ថ្ងៃ
«រឭក»,«រំឮក»,«រំលឹក» និង«រម្លឹក» ពាក្យណាត្រឹមត្រូវ?
2 ថ្ងៃ
អត្ថបទពេញនិយមបន្ថែម