COVID-19
ជាតិ
១០៥នាក់វិជ្ជមានកូវីដ-១៩ ជាករណីថ្មីច្រើនបំផុតដែលប្រកាសប្រចាំថ្ងៃ ករណីវិជ្ជមាន៣នាក់នៅមូលដ្ឋានខណ្ឌឫស្សីកែវ កាលពីយប់ឈានចូលថ្ងៃទី១៥ ខែមីនា។ រូបថត ហ្វេសប៊ុកលោក ជា ពិសី
× មនុស្សចំនួន១០៥នាក់បន្ថែមទៀត មានលទ្ធផលវិជ្ជមានកូវីដ-១៩ ។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលនាព្រឹកថ្ងៃអង្គារ ទី១៦ ខែមីនា។ ការបន្តកើនឡើងនេះ នាំឲ្យកម្ពុជាមានអ្នកកើតកូវីដ-១៩ សរុបចំនួន១៤៣០នាក់ ដោយ៩១៥នាក់ ពាក់ព័ន្ធករណីសហគមន៍២០កុម្ភៈ ដែលរាលដាលដល់១០រាជធានី-ខេត្ត ផ្តើមពីភ្នំពេញ ដល់កណ្តាល ព្រះសីហនុ ព្រៃវែង ស្វាយរៀង កោះកុង កំពង់ចាម កំពង់ធំ សៀមរាប និងបាត់ដំបង។ ស្របពេលជាមួយគ្នា អ្នកជំងឺចំនួន៨៨នាក់ទៀតបានជាសះស្បើយផងដែរ។
១០៥នាក់ថ្មីសុទ្ធតែជាករណីសហគមន៍២០កុម្ភៈ ក្នុងនោះ៦៤នាក់នៅខេត្តកណ្តាល ២៩នាក់នៅភ្នំពេញ ៨នាក់នៅព្រះសីហនុ ៣នាក់នៅកោះកុង និង១នាក់នៅព្រៃវែង។
ករណីនៅខេត្តកណ្តាល មានអ្នកជំងឺជាជនជាតិខ្មែរ ចិន ថៃ និងវៀតណាម ដែលសុទ្ធតែស្ថិតនៅក្នុងភូមិព្រែកស៊ឹង ឃុំសំពៅពូន ស្រុកកោះធំ។ នៅភ្នំពេញ ករណីមាននៅសង្កាត់ទន្លេបាសាក់ ខណ្ឌចំការមន សង្កាត់និរោធ ខណ្ឌច្បារអំពៅ សង្កាត់ត្រពាំងក្រសាំង ខណ្ឌច្បារអំពៅ សង្កាត់បឹងកេងកង១ ខណ្ឌបឹងកេងកង សង្កាត់ផ្សារថ្មី២ ខណ្ឌដូនពេញ និងសង្កាត់-ខណ្ឌផ្សេងៗទៀត។ នៅព្រះសីហនុ ករណីទាំងអស់ស្ថិតនៅសង្កាត់លេខ៣ ក្រុងព្រះសីហនុ។ ករណីនៅកោះកុង កើតនៅភូមិកូនកុក ឃុំភ្ញីមាស ស្រុកគិរីសាគរ រីឯ១ករណីនៅព្រៃវែងស្ថិតនៅឃុំព្រែកខ្សាយ ករ ស្រុកពាមរ៍។
រីឯករណីសះស្បើយ៨៨នាក់ មាន៥នាក់នៅមន្ទីរពេទ្យមិត្តភាពខ្មែរសូវៀត ១០នាក់នៅមណ្ឌលសុខភាពចាក់អង្រែ ៣នាក់នៅមន្ទីរពេទ្យបង្អែកជ័យជម្នះខេត្តកណ្តាល ៦៥នាក់នៅសណ្ឋាគារក្រេតឌុក។ រីឯ៥នាក់ទៀត ត្រូវបានក្រសួងសុខាភិបាលបញ្ជាក់ថា បានជាសះស្បើយចាកចេញពីមណ្ឌលចត្តាឡីស័កមុនថ្ងៃបញ្ជូនទៅកាន់សណ្ឋាគារក្រេតឌុក។ ក្រសួងសម្រេចដកចំនួនអ្នកជំងឺ៥នាក់ចេញពីតារាងនៃអ្នកកំពុងសម្រាកព្យាបាល ដែលធ្វើឲ្យចំនួនអ្នកកំពុងសម្រាកព្យាបាលមាន៦០៩នាក់។
មកដល់ពេលនេះ កម្ពុជាមានករណីសរុប១៤៣០ ក្នុងនោះ៩១៥ជាករណីសហគមន៍២០កុម្ភៈ។ អ្នកជំងឺ៨១៨នាក់ បានជាសះស្បើយ និងស្លាប់១នាក់៕
© រក្សាសិទ្ធិដោយ thmeythmey.com