ក្នុងសុន្ទរកថាបើកវេទិកាបូអាវដើម្បីអាស៊ី ប្រធានាធិបតីចិន ស៊ី ជិនភីង  បានលើកឡើងពីបញ្ហាជាច្រើន ដូចជាពាណិជ្ជកម្ម បទដ្ឋានអន្តរជាតិ កិច្ចសហប្រតិបត្តិការ និងបញ្ហាជាច្រើនទៀត តាមប្រព័ន្ធវីដេអូ នៅថ្ងៃទី២០ ខែមេសា។ លោក ស៊ី  ក៏និយាយដល់បញ្ហាអភិបាលកិច្ចពិភពលោកផងដែរ។ 

 

«អភិបាលកិច្ចពិភពលោក ត្រូវតែបង្ហាញនូវការវិវត្តផ្នែកនយោបាយ និងសេដ្ឋកិច្ចរបស់ពិភពលោក កិច្ចសហប្រតិបត្តិការឈ្នះ ដើម្បីដោះស្រាយបញ្ហាប្រឈម»។ លោកស៊ី បានលើកឡើងបែបនេះ ដោយបញ្ជាក់បន្ថែមថា ពិភពលោក គួរគោរពតាមគោលការណ៍នៃការពិភាក្សា ផលប្រយោជន៍រួម ប្រព័ន្ធពហុភាគីនិយម សំដៅធ្វើឱ្យប្រព័ន្ធអភិបាលកិច្ចពិភពលោកកាន់តែមានភាពត្រឹមត្រូវ និងសមភាព។ 

 

បើតាមប្រធានាធិបតីចិន ពិភពលោកគួរការពារប្រព័ន្ធអន្តរជាតិ ដែលមានអង្គការសហប្រជាជាតិជាស្នូល ចំណែកសណ្តាប់ធ្នាប់អន្តរជាតិ គួរតែផ្អែកលើច្បាប់អន្តរជាតិ។ ក្នុងន័យនេះ ប្រមុខរដ្ឋចិន សង្កត់ធ្ងន់ថា អនាគតរបស់ពិភពលោក គួរតែត្រូវបានសម្រេចដោយប្រទេសទាំងអស់ តាមរយៈកិច្ចសហការជាមួយគ្នា។

 

លោក ស៊ី បន្តថា ប្រព័ន្ធពហុភាគីនិយមរបស់ពិភពលោក ក៏មិនតម្រូវឱ្យប្រទេសមួយក្តាប់តូច កំណត់ច្បាប់មកលើប្រទេសមួយចំនួនធំផងដែរ។ « អ្វីដែលពិភពលោកសព្វថ្ងៃត្រូវការ គឺយុត្តិធម៌ មិនមែនអនុត្តរភាពឡើយ។ ប្រទេសធំៗ គួរតែមានឥរិយាបថឱ្យសមនឹងឋានៈខ្លួន ដោយភ្ជាប់មកជាមួយការទទួលខុសត្រូវដ៏ខ្ពស់មួយ។» លោកបញ្ជាក់បែបនេះ។

 

ក្រៅពីបញ្ហាខាងលើ ប្រធានាធិបតីចិន ក៏បានលើកឡើងពីការរៀបចំសេដ្ឋកិច្ចឡើងវិញក្រោយកូវីដ-១៩, ការប្រយុទ្ធប្រឆាំងជាមួយជំងឺឆ្លងសកល, ការបង្កើនកិច្ចសហប្រតិបត្តិការ, ការប្រឆាំងនឹងគំនិតសង្រ្គាមត្រជាក់ និងមនោគមន៍វិជ្ជា និងការមិនជ្រៀតជ្រែតកិច្ចការផ្ទៃក្នុងរបស់ប្រទេសមួយចំនួនជាដើម៕