«កូរ៉េខាងត្បូងបញ្ឈប់ការផ្តល់ហិរញ្ញប្បទានសាធារណៈសម្រាប់រោងចក្រផលិតថាមពលអគ្គិសនីដោយធ្យូងថ្មដល់បរទេស»។ នេះជាការថ្លែងរបស់ប្រមុខដឹកនាំកូរ៉េខាងត្បូង មូន ចេអ៊ីន នាជំនួបកំពូលស្ដីពីអាកាសធាតុដែលរៀបចំដោយសមភាគីអាមេរិក ចូ បៃឌិន នៅថ្ងៃទី២២ ខែមេសា។ 
 

មិនត្រឹមតែចូលរួមបញ្ចប់ការប្រើប្រាស់ធ្យូងថ្មនៅបរទេសឡើយ លោក មូន ក៏ប្រាប់មេដឹកនាំជាច្រើនដែលចូលរួមជំនួនអនឡាញថា កូរ៉េខាងត្បូង នឹងពង្រីកវិធានការបញ្ឈប់ការប្រើធ្យូងថ្មដែលជាប្រភពថាមពលកខ្វក់ជាងគេផងដែរ។
 

ប្រធានាធិបតីកូរ៉េខាងត្បូងរូបនេះបន្ថែមថា វាពិតជាការចាំបាច់ណាស់សម្រាប់ពិភពលោកក្នុងការចូលរួមកាត់បន្ថយរោងចក្រផលិតថាមពលដើរដោយធ្យូងថ្មនេះ ទោះបីជាប្រទេសកំពុងអភិវឌ្ឍមួយចំនួនអាចនឹងជួបផលលំបាកដោយសារតែការពឹងផ្អែកខ្លាំងលើការប្រើប្រាស់ធ្យូងថ្ម។ លោកស្នើឱ្យមានការពិចារណានិងការគាំទ្របានត្រឹមត្រូវសម្រាប់ប្រទេសទាំងនោះ។

ស្របពេលនេះ ក្រុមអ្នកបរិស្ថានក៏រំពឹងថា កូរ៉េខាងត្បូងនឹងប្រកាសសកម្មភាពនានាបន្ថែមទៀតនាកិច្ចប្រជុំស្តីពីអាកាសធាតុនៅខែក្រោយនេះ (COP26) ដែលអង់គ្លេសជាម្ចាស់ផ្ទះ។ បើតាមការសិក្សារបស់ Greenpeace កូរ៉េខាងត្បូងបានផ្តល់ទឹកប្រាក់ប្រមាណ៥,៧ពាន់លានដុល្លាលើវិស័យរោងចក្រធ្យូងថ្មនៅបរទេសចន្លោះខែមករា ឆ្នាំ២០១៣ ដល់ខែសីហា ឆ្នាំ២០១៩។
 

លោកស្រី Helen Mountford អនុប្រធានផ្នែកអាកាសធាតុ និងសេដ្ឋកិច្ចនៃវិទ្យាស្ថានធនធានពិភពលោកថា នេះជាប្រវត្តិសាស្រ្តហើយដែលកូរ៉េខាងត្បូងសម្រេចចិត្តប្រឆាំងលើវិស័យរោងចក្រធ្យូងថ្ម។
 

សូមបញ្ជាក់ថា កូរ៉េខាងត្បូង ជាប្រទេសវិនិយោគធំបំផុតទី៣ នៅបរទេសលើវិស័យរោងចក្រផលិតថាមពលអគ្គិសនីដោយធ្យូងថ្ម ដោយបានវិនិយោគទឹកប្រាក់ប្រមាណ៥៥ពាន់លានដុល្លាចន្លោះឆ្នាំ២០០៩ដល់២០២០។ នៅឆ្នាំ២០១០ កូរ៉េខាងត្បូងបានផ្តល់ជំនួយផ្នែករោងចក្រធ្យូងថ្មដល់ប្រទេសមួយចំនួនដូចជាវៀតណាម ឥណ្ឌូណេស៊ី និងបង់ក្លាដេស ជាដើម។

យ៉ាងណាមិញ រោងចក្រធ្យូងថ្មចំនួន១៦កន្លែងក្នុងស្រុកត្រូវបានបិទកាលពីចុងឆ្នាំ២០២០ និងដើមឆ្នាំ២០២១ ដើម្បីចូលរូមកាត់បន្ថយនូវខ្យល់បំពុលបរិយាកាស៕