កីឡាករខ្សែបម្រើ Kevin De Bruyne ត្រូវបានសង្ស័យថា នឹងមិនត្រូវបានចូលរួមជួយក្រុមមេឃខៀវ  ក្នុងការប្រកួតវគ្គផ្តាច់ព្រ័ត្រពានលំដាប់ទីបី League Cup ទល់ជាមួយក្រុម Tottenham Hotspur ក្រោយរូបគេត្រូវបានរងរបួសជើងអំឡុងការប្រកួតទល់ Chelsea នៅពាន់រង្វាន់ FA Cup វគ្គពាក់កណ្តាលផ្តាច់ព្រ័ត្រកាលពីសប្ដាហ៍មុន។ កាលនោះ Man City ចាញ់ក្រុម Chelsea ក្នុងលទ្ធផល ២-១។
 

ការរងរបួសនោះបានក្លាយជាការកង្វល់សម្រាប់ក្រុម Manchester City ក្នុងការចូលលេងវគ្គផ្តាច់ព្រ័ត្រ League Cup នារាត្រីនេះ និងវគ្គពាក់កណ្តាលផ្តាច់ព្រ័ត្រ Champions League ទល់នឹងក្រុម PSG នៅសប្តាហ៍ក្រោយ។
 

ទោះជាយ៉ាងណា អ្នកចាត់ការក្រុមមេឃខៀវលោក Pep Guardiola បាននិយាយនៅក្នុងសន្និសីទសារព័ត៍មានមុនការប្រកួតយប់នេះថា De Bruyne រួមទាំងខ្សែប្រយុទ្ធ Sergio Aguero នឹងអាចចូលលេងវិញបន្ទាប់ពីបានចូលរួមហ្វឹកហាត់ជាមួយក្រុមរួច។ «ពួកគេទាំងពីរគឺត្រៀមខ្លួនរួចរាល់ហើយ ពួកគេទាំងពីរបានចូលរួមក្នុងការហ្វឹកហាត់ជាមួយយើងផងដែរ»។ លោក Guardiola បាននិយាយដូច្នេះ។
 

គួរបញ្ជាក់ដែរថា ក្រុមមេឃខៀវ ត្រូវការ៨ពិន្ទុពី៥ប្រកួតដែរនៅសល់ក្នុងដៃដើម្បីលើកពានរង្វាន់ English Premier League ជាលើកទី៣ ក្នុងរយៈពេលបួនឆ្នាំរបស់ខ្លួន៕