​សេចក្តីសម្រេចរបស់រដ្ឋបាលរាជធានីភ្នំពេញ តំបន់ក្រហម ជាតំបន់ដែលមានការរាលដាល​ជំងឺកូវីដ-១៩ខ្លាំង កាន់តែរួមតូចជាមុន ដោយបច្ចុប្បន្ននៅសល់តែ១១ភូមិ និងទីតាំងប៉ុណ្ណោះ។ តំបន់ក្រហមដែលនៅសល់ មានប្លុកបុរីកីឡាទាំង៨អរគា នៅក្នុងសង្កាត់វាលវង់ ខណ្ឌ៧មករា។ ផ្នែកខ្លះនៃភូមិដើមចាន់ ចំណុច​ខាងក្រោយយឿត្រី នៃសង្កាត់ច្បារអំពៅទី២ ខណ្ឌច្បារអំពៅ។ ភូមិ១០ នៃសង្កាត់បឹងសាឡាង និងភូមិ២៣ នៃសង្កាត់បឹងកក់ ក្នុងខណ្ឌទួលគោក។ ខណ្ឌពោធិ៍សែនជ័យវិញ តំបន់ក្រហមនៅសល់តែ២ភូមិប៉ុណ្ណោះ គឺភូមិត្រពាំងថ្លឹង១ និងភូមិត្រពាំងថ្លឹង២ ក្នុងសង្កាត់ចោមចៅទី១ ខណៈពីមុនមានតំបន់ក្រហមដល់ទៅ៦ ភូមិឯណោះ។ តំបន់ក្រហមនៅក្នុងខណ្ឌឫស្សីកែវ  ក៏រួមតូចជាងមុនដែរ ដោយនៅសល់ផ្នែកខ្លះនៃភូមិទួលសង្កែ ផ្នែកខ្លះនៃភូមិចុងខ្សាច់ និងផ្នែកខ្លះនៃភូមិបាក់ទូក ខណៈពីមុនទូទាំងភូមិទាំង៣នេះ គឺជាតំបន់ក្រហមទាំងស្រុង។
 

ខណ្ឌមានជ័យ ដែលកន្លងមកមានការឆ្លងរាលដាលនៃជំងឺកូវីដ-១៩ខ្លាំងក្លាជាងគេ ហើយក៏ត្រូវបានកំណត់ជាតំបន់ក្រហមមុនគេនោះ ប​ច្ចុប្បន្នក៏កាន់តែរួមតូចតំបន់ក្រហមដែរ។ កាលពីមួយសប្តាហ៍មុន ខណ្ឌមានជ័យមានភូមិចំនួន ៨ជាតំបន់ក្រហម ខណៈពេល​នៅសល់តែផ្នែកនៃភូមិ ចំណួន ៤ ប៉ុណ្ណោះ។តំបន់ក្រហមនៅខណ្ឌមានជ័យ នៅសល់តែផ្នែកខ្លះនៃភូមិ៥ ក្នុងសង្កាត់ស្ទឹងមានជ័យ ទី២ , ផ្នែកខ្លះនៃភូមិទ្រា៤ , ផ្នែកខ្លះនៃភូមិនដំណាក់ធំ២ និងដំណាក់ធំ៣ នៃសង្កាត់ស្ទឹងមានជ័យប៉ុណ្ណោះ។

 

បើតាមរដ្ឋសេចក្តីសម្រេចរបស់រដ្ឋបាលរាជធានីភ្នំពេញ តំបន់លឿងទុំ ជាតំបន់ដែលមានការរាលដាលជំងឺកូវីដ-១៩កម្រិតមធ្យម ក៏កាន់តែរួមតូចដែរ ហើយតំបន់លឿងមានទំហំកាន់តែធំ។  
 

ក្នុងអំឡុងបិទខ្ទប់តំបន់ក្រហម និងតំបន់លឿងទុំ ហាមពលរដ្ឋធ្វើដំណើរ និងចេញចូលក្នុងតំបន់ទាំងនេះ។ ចំណែកតំបន់លឿង ដែលរាលដាលនូវជំងឺកូវីដ-១៩កម្រិតស្រាល គឺមិនត្រូវបានបិទខ្ទប់ឡើយ ប៉ុន្តែត្រូវអនុវត្តតាមវិធានការរដ្ឋបាល។ 

 

សូមបញ្ជាក់ថា បច្ចុប្បន្ន កម្ពុ​ជាមាន​អ្នក​ឆ្លង​កូ​វីដ​-១៩ សរុប ២០ ២២៣​នាក់​ហើយ ដោយ​ករណី​នាំចូល​មាន​៥៨៨​ករណី​។ ចំណែក​អ្នកជា​សះស្បើយ​៨ ១៧០​នាក់ ខណៈ​អ្នកស្លាប់​កើន​ដល់ ១៣១​នាក់​៕