ខ្សែប្រយុទ្ធសញ្ជាតិប្រេស៊ីល Neymar រូបនេះបានចំណាយពេលរួមរស់ជាមួយក្រុម PSG អស់រយៈពេល៤ឆ្នាំហើយ ដោយទើបតែបន្តកុងត្រាថ្មី ៤ឆ្នាំទៀត ជាមួយក្រុមអ្នកមានបារាំងមួយនេះ។ ក្នុងពេលថ្មីៗនេះដែរ Neymar បាននិយាយថា រូបគេចង់លេងជាមួយ Cristiano Ronaldo នៅក្លឹប PSG ផ្ទាល់តែម្តង ។
 

Neymar បាននិយាយប្រាប់ទស្សនាវដ្តី GQ France ថា៖«ខ្ញុំចង់លេងជាមួយ Cristiano Ronaldo ។ ខ្ញុំធ្លាប់បានលេងជាមួយកីឡាករឆ្នើមដ៏អស្ចារ្យដូចជា Lionel Messi ក៏ដូចជា Kylian Mbappe ប៉ុន្តែខ្ញុំមិនដែលបានលេងជាមួយ Ronaldo នៅឡើយ»។ 
 

មិនត្រឹមតែបំណងចង់លេងជាមួយ Ronaldo តែមួយឡើយ Neymar ថែមទាំងមានបំណងចង់ឈ្នះពានរង្វាន់សម្រាប់PSG និងពាន World Cup ជាមួយក្រុមជម្រើសជាតិទៀតផង។ ខ្សែប្រយុទ្ធសញ្ជាតិប្រេស៊ីលរូបនេះ បានបន្តថា៖«ខ្ញុំចង់ឈ្នះ World Cup វាជាសុបិនដ៏ធំមួយសម្រាប់ខ្ញុំ ហើយខ្ញុំចង់ឈ្នះពានរង្វាន់ទាំងអស់ជាមួយក្លឹប PSG តែម្តង។ខ្ញុំមានវ័យជិត៣០ឆ្នាំហើយ ខ្ញុំមានអាជីពយ៉ាងល្អប្រសើរនិងកម្រិតលេងមួយដ៏ប្រសើរសម្រាប់អាជីពមួយនេះ»។

 

ដោយឡែកអនាគតខ្សែប្រយុទ្ធឆ្នើមសញ្ជាតិព័រទុយហ្គាល Cristiano Ronaldo ហាក់មិនច្បាស់លាស់នៅឡើយ ជាមួយនឹងក្រុម Juventus ។ Ronaldo អាចនឹងចាកចេញក្នុងរដូវខាងមុខនេះ ដោយសារក្លឹបហាក់ធ្វើមិនបានល្អឡើយ។
 

នៅរដូវកាលនេះ Juventus បានធ្លាក់ចេញពីពានរង្វាន់ UEFA Champion League ត្រឹមវគ្គ១៦ក្រុម ។ មិនតែប៉ុណ្ណោះ Juventus កំពុងស្ថិតនៅលេខ៥ ដែលត្រូវប្រទាញប្រទង់កៅអី Champion league នៅរដូវកាលក្រោយនៅឡើយ៕