ហាងស្រា ភោជនីយដ្ឋាន ហាងកាហ្វេ  រោងកុង សារមន្ទីរ និងកន្លែងកីឡាផ្សេងៗ ត្រូវបានអនុញ្ញាតឱ្យបើកដំណើរការទទួលភ្ញៀវទាំងក្នុងហាង និងក្រៅហាងជាធម្មតាវិញទូទាំងអង់គ្លេស វែល និងតំបន់មួយភាគធំនៃស្កុតឡែន។ នេះបើយោងតាមការបន្ធូរវិធានការថ្មីចាប់ពីថ្ងៃទី១៧ ខែឧសភាទៅ។ 
 

បើតាមទីភ្នាក់ងារព័ត៌មាន AFP លើសពីនេះ ប្រជាជនអង់គ្លេស ក៏អាចធ្វើដំណើរទៅលេងក្រុមគ្រួសារ តែត្រូវអនុវត្តវិធានការមួយចំនួន ស្របពេលការធ្វើដំណើរទៅក្រៅប្រទេសក៏បានចាប់ផ្តើមដំណើរការវិញដោយអនុញ្ញាតឱ្យធ្វើការហោះហើរទៅតាមបញ្ជីប្រទេសដែលមានអត្រាឆ្លងទាប។
 

«យើងបានឈានដល់ចំណុចមួយផ្សេងទៀតនៅលើផែនទីបង្ហាញផ្លូវរបស់ពួកយើងដោយចេញពីការរស់នៅពីការបិទខ្ទប់ ប៉ុន្តែយើងត្រូវតែឈានទៅជំហានបន្ទាប់ទៀតជាមួយការប្រុងប្រយ័ត្នខ្ពស់។ លោក បូរីស ចនសុន នាយករដ្ឋមន្រ្ដីអង់គ្លេស បានថ្លែងបែបនេះនៅថ្ងៃទី១៦ខែឧសភា។ លោករំឭកប្រជាជនអង់គ្លេសឱ្យបន្តប្រុងប្រយ័ត្ន ក្រោយពីអង់គ្លេសរកឃើញវីរុសកូវីដ-១៩បំប្លែងថ្មីដែលឆ្លងយ៉ាងរហ័សដែលមានប្រភពពីឥណ្ឌា។
 

កាលពីសប្តាហ៍មុន អ្នកឆ្លងវីរុសកូវីដ-១៩ បំប្លែងថ្មីដែលរកឃើញនៅឥណ្ឌា កើនឡើងច្រើនជាងទ្វេដងពីចំនួន៥២០ករណីទៅ១,៣១៣ករណី ។ យ៉ាងណាមិញ អង់គ្លេសក៏កំពុងបង្កើនល្បឿនយុទ្ធនាការចាក់វ៉ាក់សាំងរបស់ខ្លួនផងដែរ។ គិតត្រឹមថ្ងៃទី១៦ ខែឧសភា នៅអង់គ្លេសចំនួនអ្នកទទួលវ៉ាក់សាំងដូសដំបូង មាន៣៦,៥៧៣,៣៥៤នាក់ និងទទួលគ្រប់ពីរដូសមានប្រមាណ២០,១០៣,៦៥៨នាក់៕