ស្របពេលមានការបង្រ្កាប និងបាញ់សម្លាប់លើក្រុមបាតុករមីយ៉ាន់ម៉ា ជប៉ុន នៅចុងខែមីនាកន្លងទៅ បានសម្រេចផ្អាកផ្តល់ជំនួយអភិវឌ្ឍន៍ផ្លូវការ (ODA) ទៅមីយ៉ាន់ម៉ា ដើម្បីដាក់សម្ពាធលើរបបសឹក។ យ៉ាងណាមិញ ការផ្តាច់ជំនួយនោះ មិនអាចគាបសង្កត់លើរដ្ឋាភិបាលយោធាមីយ៉ាន់ម៉ាឡើយ។ 

 

ជាថ្មីម្តងទៀត ជប៉ុនបានព្រមានយ៉ាងធ្ងន់ៗថា ខ្លួននឹងបញ្ឈប់ការផ្តល់ជំនួសអភិវឌ្ឍទាំងអស់ទៅមីយ៉ាន់ម៉ា ប្រសិនបើស្ថានការណ៍ក្នុងប្រទេសអាស៊ីអាគ្នេយ៍មួយនេះ មិនមានការផ្លាស់ប្តូរ។ នៅក្នុងកិច្ចសម្ភាសជាមួយកាសែត Nikkei Asia រដ្ឋមន្រ្តីការបរទេសជប៉ុន លោក Toshimitsu Motegi បានសង្កត់ធ្ងន់ថា បើសិនបើការបង្រ្កាប ឬការដឹកនាំដោយយោធានៅតែបន្ត ជប៉ុនគ្មានជម្រើសឡើងក្រៅពីគិតគូរម្តងទៀតលើជំនួយអភិវឌ្ឍន៍របស់ខ្លួនទៅមីយ៉ាន់ម៉ា។ 

 

«យើងមិនចង់ធ្វើបែបនោះឡើយ ប៉ុន្តែយើងត្រូវតែបញ្ជាក់ឱ្យច្បាស់ថា វានឹងមានផលវិបាក ប្រសិនបើមីយ៉ាន់ម៉ានៅបន្តស្ថិតក្នុងស្ថានភាពបែបនោះ»។ លោក Motegi បានបញ្ជាក់បែបនេះ ដោយបន្ថែមថា ជាប្រទេសដែលគាំទ្រលទ្ធិប្រជាធិបតេយ្យរបស់មីយ៉ាន់ម៉ា ជប៉ុននឹងតំណាងសហគមន៍អន្តរជាតិ និងប្រាប់ទៅរបបសឹកពីជំហររបស់ខ្លួន។ 

 

ជប៉ុន ជាម្ចាស់ជំនួយដ៏ធំ និងជាអ្នកវិនិយោគលំដាប់ទី៥ នៅមីយ៉ាន់ម៉ា។ ក្រសួងការបរទេសជប៉ុន បានអះអាងថា ជប៉ុន បានផ្តល់ជំនួយអភិវឌ្ឍន៍រហូតដល់ ១,៧ពាន់លានដុល្លារទៅមីយ៉ាន់ម៉ា នៅក្នុងឆ្នាំ២០១៩។ ចំនួននេះ គឺធំជាងចិនទៅទៀត។

 

ក្នុងកិច្ចសម្ភាសដដែល ប្រមុខការទូតជប៉ុនរូបនេះ បានបន្តថា ជប៉ុននឹងបន្តជជែកជាមួយរដ្ឋាភិបាលយោធា ដោយសារខ្លួនមានបណ្តាញទំនាក់ទំនងច្រើននៅក្នុងជួរយោធាមីយ៉ាន់ម៉ា ជាងអាមេរិក និងសហភាពអឺរ៉ុប។ 

 

គួររំលឹកថា អ្នកកាសែតជប៉ុនម្នាក់ ត្រូវបានចាប់ខ្លួននៅក្នុងខែមេសាកន្លងទៅ ប៉ុន្តែក្រោយមក ត្រូវដោះលែងវិញ។ ការដោះលែងអ្នកកាសែតជប៉ុនរូបនេះ ធ្វើឡើងបន្ទាប់ពី ជប៉ុនបានជំនួយបន្ទាន់មួយ ដែលមានតម្លៃ ៤លានដុល្លារ តាមរយៈកម្មវិធីស្បៀងអាហារពិភពលោក (WFP)៕